Уундаагийн блог

Баяртай, 2011 он минь!

2011-12-31T18:00:00.002+08:00

Уул нь би блог бичих дуртай, блогийн ачаар нэлээн хөгжсөн гэж өөрийгөө боддог, блогтоо байнга мэдээ оруулах юмсан гэж их хүсдэг хүн л дээ. Яагаад ч юм завдал гарж чадахгүй байсаар байгаад ахиад л нэг шинэ он гарах нь. Баяртай, 2009 он минь, Баяртай 2010 он минь гээд нийтлэл бичиж байсан шигээ энэ удаад Баяртай, 2011 он минь гэж гарчиглаад өнгөрсөн онд юу хийж бүтээсэн, юу хийж чадснаа эргэн дүгнэхээр сууж байна. Сүүлд уншихад дурсамж сэдрээгээд сайхан байх биз дээ.

ХИЧЭЭЛ

Саяхан л их сургуульд орчихоод, төөрч будилаад, өглөө босохгүй гэсэндээ өөр ангийнхантай хичээлд суугаад л явж байсан санагдана. Өнөөдөр гэтэл төгсөх болчихоод, сургууль дээр "хөгшин" хүн нь болчихсон явах юм. Өмнө нь энэ ах шиг болчих юмсан, ингээд явах цаг удахгүй дээ гэж боддог байсан цаг өнгөрчээ.Энэ жил хэд хэдэн судалгааны ажлыг гайхайлтай чадвартай, найзуудтайгаа хамт хийж, эрдэм шинжилгээний хуралд оролцлоо. Хамтдаа нэг баг болж, бие биенээ нөхөн, хэдэн шөнө нойргүй хонож, амжилттай-амжилтгүй олон хуралд хамт орсон Алтан-Өлзий, Батзориг, Энх-Орчлон нартаа баярлалаа. "Гадаад худалдааны гравитацын шинжилгээ""Сошиал Медиа ROI буюу хөрөнгө оруулалтын үр өгөөжийг тооцох нь""Гравитацын шинжилгээ ба валютын ханш""Сайн дурын ажилтны менежмент" /Зоогийтойгоо хамт/"Хүний хөгжлийн мөнгөний нийгэмд үзүүлэх зарим сөрөг үр дагавар""Монгол улсын Зүүн Хойд Азийн чөлөөт хэлэлцээрт нэгдэх боломж""Сонгуулийн дүрэм ба нөөцийн хараал: Дата юу өгүүлнэ вэ?"Ийм ажлуудыг энэ хугацаанд гаргажээ. Өөр зөндөөг хийх боломж, өөр олон санаа байсан ч арай л амжсангүй. Үүнийг ингэж бичсний учир нь дараа нь блогтоо оруулдаг юм уу гэсэн санаатай юм. Үлгэр жишээ авах хүмүүсээсээ, найзуудаасаа, багшаасаа бага ч гэсэн юм сурч, хөгжиж л байна. Сурах, мэдэх юм их байна шүү, их байна!

UBS, SMAM & MANY MORE!- UBS ТВ-ийнхээ буянаар олон газар үзлээ, олон хүнтэй танилцлаа. Маш үнэтэй туршлага хуримтлуулан, маш олон зүйл мэдэж авлаа. Хөлбөмбөгийн холбооны шугамаар, тэдний дэмжлэгтэй хөлбөмбөгийн эх орон БРАЗИЛ улсад очиж үзлээ. Бас л телевизийнхээ ачаар Олимпийн наадмыг 3 дахиа зохиох анхны хот Лондонд очиж үзлээ. Уэмбли, Олимпийн цэнгэлдэх, Биг Бен, Букингем, Abbey Road гээд олон сонирхолтой газруудыг үзэж, зочилж үзлээ.

- Баяка багшийн маань өмнөх төгсөлтийн "ах", Монголын онлайн спортын ертөнцийн загалмайлсан эцэг Хосбаяртай хамтран "Спортын Маркетингийн Агентлаг" гэж компани байгууллаа. Өлзий, Зоогий, Ганби, Бибби, Галдан, Онон, Хангай, Итгэл, Лхагваа гээд гайхалтай залуустай хамт Монголын спортыг мэргэжлийн түвшинд аваачихад, илүү өрсөлдөөнтэй бөгөөд чанартай болгоход хувь нэмрээ оруулна гэдэгт итгэлтэй байна. Бөртэ Чоно, Д.Ховардын айлчлал, Италийн Супер цом гээд богино хугацаанд чамгүй ажлуудыг амжуулжээ.- Италийн зууны шилдэг хөлбөмбөгчин Ф.Барезигаас ярилцлага авч, NBA-ийн супер од Д.Ховардтай зураг авахуулж үзлээ. Лорд С.Коеийг хажуунаас нь харж, Капеллотой хоолны ширээнд зэрэгцэн сууж, Беллетитэй хамт сургалтанд сууж, Сколаритай гар бариж, Лондны олимпийн алтан медалиас адис авч ч үзлээ. Ж.Блантийн гайхалтай тоглолтыг амьдаар нь үзэж, Битлзийн гарцаар алхаж, Ф1-ийн зам дээр очиж, Бекхэмийн сүмд мөргөж үзлээ.

- CSPORTS.mn. Энэ жил би өөрөө тийм ч их анхаарал тавьж чадаагүй ч хэдийн хөлөө олсон, хөлбөмбөгийн том сайт болж чадсан шүү. Олон нийтлэгчдтэй, хэрэглэгчид нь өөрсдөө мэдээгээ ч оруулдаг, хэрэлддэг-хэлэлцдэг-мэтгэлцдэг-маргалддаг талбар болж чадсан. Улам урагшаа тэмүүлж, улам урагшаа хөгжихын төлөө хичээх болно оо.

- Хөлбөмбөгөө хаяагүй тоглож л байгаа шүү :D МУИС-ийн аваргад багтайгаа ахиад түрүүлсэн. Спортын Цонхын цомын тэмцээнд ч гэсэн багтайгаа түрүүлсэн. Дуулианд оролцож байгаа гэж, амжилт үзүүлэх байх гэж найдаж байна.

NEST & P.I.E- Сургууль дээрх клуб маань өргөжин тэлсээр л байна. Магадгүй зөндөө удаашралтай, урагшгүй байсан мэт санагдавч бид хөгжсөөр л байсан. Нөхөрлөл дээр тогтсон клуб маань чамгүй ч гэсэн амжилттай оныг өнгөрөөсөн. Биднээс хойш зөндөө удаан оршино гэдэгт ч итгэлтэй байна. Шинэ гишүүд ч гэсэн нэмж авах санаатай байгаа, сонирхож байгаа найз нөхөддөө дуулгаарай :)

- P.I.E: Promote, Inspire & Entertain! Сонирхол дээр тогтсон оюутнуудын бүлгэм. Би олон хүүхдээс уйдаж байна, нэгэн хэвийн байдлаас залхаж байна, сургууль-гэр-сургууль маршруттай болчихлоо гэдэг үгийг сонсож байсан. Яагаад түүнээс татгалзаж болохгүй гэж? Хамгийн ойроос хамгийн хялбараар хамгийн дуртай зүйлээ ижил сонирхолтой найзуудтайгаа хийж болохгүй гэж? Тэднээс суралцаж, тэдэнтэй туршлагаа хуваалцаж, тэдэнд сургаж өөрсдөө хөгжицгөөе. Энэ л P.I.E хөдөлгөөний хамгийн гол санаа юм.

- P.I.E League анх удаагаа ЭЗС дээр зохиогдох гэж байна. P.I.E Miss & Mister 8хан хоногт 11000 лайк цуглуулсан гайхалтай шалгаруулалт болсон. Тун удахгүй P.I.E Library, P.I.E Photo, P.I.E Online Journal гээд олон зүйлс гарах гэж байна. Сургуульдаа бид сайн судалгаа, сайн бүтээл амжилтыг үлдээж чадахгүй байж болох ч өөр зүйлийг үлдээж яагаад болохгүй гэж? Legacy?

БОЛОР МИНЬ :)- Хайрт Болор минь, чамайг ямар их санаж байна гээч. Үргэлж чамтайгаа хамт байхыг хүсч, чинийхээ гарыг атгаад хаашаа ч хамаагүй алхаж, чинийхээ хоолойг яг дэргэдээс нь сонсож, чамайг мэдэрч, үнсэхийг үнэхээр их хүснэ. Чамтай хамт байсан мөч бүхэн миний хамгийн дурсамжтай мөчүүд минь байсан юм шүү.- Чамтайгаа хамт өнгөрүүлсэн зун, аялал гайхалтай байлаа. Замын Үүд-Бээжин-Манила-Бангкок-Паттаяа-Бангкок-Хат Яай-Куала Лумпур-Сингапур-КЛ- Пенанг-Бангкок-Манила-Бээжин-Улаанбаатар...Чиний гараас атгаад дэлхийг тойроод, сар луу, нар луу түүнээс цаадах руу ч явахад, "нисэхэд" би бэлэн байна!

"Өмнөх жилүүдээсээ үргэлж ахиж, хөгжиж, дэвшиж бай" гэж нэг багш минь байнга хэлдэг. "Алтны дэргэд гууль шарлана" ч гэж би байнга бодож явдаг. Алт шиг хүмүүстэй үргэлж хамт байдаг минь намайг үргэлж хөгжиж дэвшихэд хамгаас их нөлөөлдөг юм шүү. 131dg-ийнхэн минь, Nest-ийнхэн минь, ЭЗО-ийнхэн минь, SMAM-ийнхэн минь, CSPORTS-ийнхэн минь, NorthDucks-ийнхэн минь Твиттерийнхэн минь үргэлж надад эрч хүч өгч, урам зоригийг бадрааж байдаг юм.Та бүхэнд шинэ жилийн баярын мэнд хүргэе! Олон хүнийг санаатай санаагүй уурлуулсан, гомдоосон, мурисан, хулхидсан байх, бүгдээс нь уучлал хүсч байна. 2012 ондоо амжилт бүтээл, эрч хүчээр дүүрэн байж, зорьсон зорилгоо давуулан биелүүлэхийг хүсье. Ирэх онд уулзая даа :)

Thai Pics: The Reclining Buddha

2011-08-06T13:49:00.000+08:00

Зурагнууд-1

2011-05-26T12:15:00.001+08:00

Ирээдүйн Кака, Робиньо 2-той хамт :)

Hellooo Brasil

2011-05-24T03:44:00.000+08:00

Заа салхи оруулаагүй удсан блогтоо энэ оны хамгийн эхнийхээ нийтлэлийг Бразил улсын Сао Паулу хотоос бичиж байна аа. Уундаа нь УБ-ээс Бээжин, Бээжингээс Доха, Дохагаас Сао Паулу гэсэн маршрутаар 26 цагийг онгоцонд өнгөрүүлсний эцэст энд ирчихээд 3 дахь хоног дээрээ явж байна. 2 ч билүү, за мэдэхгүй, цагийн зөрүүнээс болоод бас цаг утасгүй явсан болохоор хэдэн цаг болж байгаа, хэддэх өдөр билээ гэдгээ ч бараг мартах дөхөж байна.
Энд Монголын Хөлбөмбөгийн холбооны шугамаар Олон улсын дасгалжуулагч менежерүүдийн семинар сургалтанд суухаар ирчихээд байгаа нь энэ. Пакистан, Брунэй, Ирак, Ботсван гээд л олон янзын газраас ирсэн нөхдүүдтэй танилцаж байна, их ч зүйлийг мэдэж авч байна гэж.
Тэгэхээр товч бөгөөд тодорхой анхныхаа сэтгэгдлийг энд бичье. Эхний төрсөн сэтгэгдэл ХУУЧИН. Миний байгаа хэсэг тийм ч юм уу, эсвэл угаасаа тийм ч юм уу Сао Паулу их хуучин хот юм. Байшин барилгууд нь цаанаа л нэг хуучин, бас манай зочид буудлын бүх тавилга нь 19-р зууных юм байна лээ, тэгээд тэгж санагдаж байж магадгүй.
Дараагийн сэтгэгдэл нь ЗАВААН. Үнэхээр аймшигтай заваан. Хэтэрхий их ядуу хүмүүс, гуйлгачин, орон гэргүй хүмүүс байгаа болохоор тэр байх. Өглөө эрт явбал дайн болчихсон юм шиг л их хог, цаас хөглөрөөд л. Байшин барилга дээр нь зураг сарааччихсан, ер нь их заваан хот юм.
Сүүлийнх нь сэтгэгдэл ЗАВГҮЙ. Шөнө унтана гэж байхгүй юм аа, өдөр байгаа замын ачаалал, хүмүүс нь шөнө яг адилхан. Шөнө 2 цагт босоод цонхоороо харахад их хотын амьдрал үргэлжилж байна. 4 цагт ч адилхан, 6 цагт ч адилхан. Бүгд адилхан хэхэ.
За нэг иймэрхүү байна, хоол нь зөндөө сонголтоос авч идэж байгаа болохоор их дажгүй юм. Даанч энд англи хэл мэддэг хүн алга аа, тэр их асуудал байна, энэ талаар дараа жич бичимз. Тэгэхээр одооноос өдөрт нэг нийтлэл оруулахыг хичээх болно. Бас csports.mn дээр CSPORTS SPECIAL from Brasil нийтлэлүүдийг цувралаар оруулах санаатай байгаа. Бас CITY NEWS-ээр мэдээ шидэх санаатай байна, хичээнэ дээ.

За тэгээд түр баяртай, дараа нь зөндөө зураг оруулна аа :)

Баяртай 2010 он минь!!!

2010-12-31T23:39:00.004+08:00

Яг ийм нэртэй, гэхдээ он нь 2009 гэсэн нийтлэлийг би яг жилийн өмнө яг энэ цагт бичиж сууж. Дурсамжтай, хөгжилтэй, харуусалтай, гунигтай гээд сэтгэл хөдлөл бүхнээр дүүрэн 2010 оноо бүр мөсөн үдэн явуулахад хэдхэн минут үлдээд байгаа энэ үед хэзээ нэгэн цагт эргэн уншихад эсвэл хэзээ нэгэн цагт дурсахад хэрэгтэй юм гээд энэ нийтлэлийг бичиж сууна. 2010 он "гайхалтай + аймшигтай = гайхамшигтай" жил байлаа. :)

Хичээл
2-р курсээ төгсөөд 3-р курсийн "том" оюутан болжээ. Зарим хүүхдүүд шиг үхтлээ хичээлээ хийгээгүй ээ, өдөр шөнөгүй сууж, ядаргаанд ортлоо давтаагүй ээ. Гэхдээ хэмжээндээ бас хэрэгтэй мэдлэгээ хуримтлуулж, эдийн засаг гэдэг зүйлийн амтанд орж л явна. Эрдэм шинжилгээний хурлуудад найзуудтайгаа хамт сайхан амжилтууд үзүүллээ. 2-р курсдээ Хаврын ЭШХ-д Б.Батпүрэвийнхээ хамтаар Маркетинг-ОУХ-ны тэнхимээс 3-р байр, Сургуулийнхаас бас л 3-р байрын шагналыг хүртлээ. 3-р курст ороод Намрын ЭШХ-д Ч.Алтан-Өлзий, Г.Батзориг нарынхаа хамтаар ЭЗО-ын тэнхимд 1-3-р байрт орж, сургуулийнхаа хуралд тусгай байр эзэллээ. Алтан-Өлзий, Батпүрэв нарынхаа хамтаар Маркетинг-ОУХ-ны тэнхимд түрүүлж, анхны түрүүгээ хүртэж үзлээ. Сургуулийнхаа хуралд тусгай байр л эзэлсэн ч энэ илтгэл маань илүү явах илтгэл байсан гэж хэнд ч бардамнаж бид чадна. Цаашид зөндөө зүйл судлах, зөндөө зүйл мэдэх, хийж үзэх хүслийг бадраасан жил болж өнгөрч байна.

Аа бас, 2010 оны МУИС-ЭЗС-ийн Шилдгийн шилдэг оюутан болчихлоо. Өнгөрсөн жил Бямбасүрэн анд маань болж байсан, NEST-ийнхний цувралыг тасалсангүй :P. Хичээл номоо орхигдуулсан тал байгаа ч 2011 ондоо энэ дутагдлаа засаж, сурсан шиг сурах болно оо гэж бодож л байна. Гэхдээ байнга боддог хойно доо...

----
UBS TV

2010 онд ажилтай боллоо, Уундаа нь :P. Ванкуверийн Өвлийн олимпийн наадмыг UBS TV-ээр сайхан багтай хамт тайлбарлан, үүний дараагаас CITY NEWS мэдээллийн хөтөлбөрт Спортын мэдээ хөтөлдөг боллоо. Сагсан бөмбөгийн ДАШТ, Хөлбөмбөгийн ДАШТ, Сингапурын Азийн Наадам, Клубын ДАШТ гээд олон олон наадмыг шууд биш ч гэсэн тоймыг нь ядаж тайлбарлаж хүргэлээ. Энэ онд надад тохиолдсон хамгийн гайхалтай үйл явдал бол яах аргагүй анхны томилолтоо авсан хэрэг байсан. Гуаньжугийн Азийн наадмыг UBS TV-ийн гайхалтай багийн хамтаар газар дээрээс нь сурвалжласан минь маш том туршлагыг надад өгч, олон зүйлийг мэдүүлж, харуулж, мэдрүүллээ. Том тэмцээн том л байдаг юм байна, олон улсын чанартай зүйлс ийм л байдаг юм байна. Гайхалтай завшаан-боломжийг 2010 он чи надад өгчээ, баярлалаа :)

BE

Be брэндийг хөгжүүлэх багт данстай боллоо. Мобикомоос зарласан төслийн уралдаанд Алтан-Өлзий, Батпүрэв, Золбаяр, Өлзийбаяр нартайгаа баг болон NEST-ийнхээ нэрийн өмнөөс оролцон шилдэг санаа шагналыг хүртэл эцсийн шат хүртэл нь амжилттай явлаа. Маш их зүйлийг амжуулсан, бас маш их зүйлийг сэтгэсэн, маш их хичээсэн гэхдээ бас цалгардуулсан гоё дурсамжтай тэмцээн болсон. Үр дүнд нь шилдэг оролцогчийн урилга хүлээн авч, өдгөө бас л шижигнэсэн залуустай хамт нэг баг болон ажиллаж байна. Магадгүй тийм ч сайн ажиллаагүй байж болох ч надад бас нэг том туршлага болж үлдэх биз ээ. Тэгээд ч зөндөө цаг байна :)

CSPORTS.mn
Алтан-Өлзий, Батцэнгэл, Зол-Эрдэнэ, Мөнхбаяр, Өлзийхутаг, Энх-Оргил нартайгаа хамтран Монголын анхны фантази тааварт спортын вебсайт CSPORTS.mn-ийг санаачлан, үүсгэн байгуулалцаж, нийтлэл бичиж эхэллээ. Хөлбөмбөгөөр дагнан бичдэг анхны гэж хэлж болох энэ сайт маань өдгөө хэдэн мянган уншигчтай, Монголын №1 хөлбөмбөгийн сайт болсон гэж хэлж болно. Нийтлэлээрээ, мэдээгээрээ, чанараараа, чадвараараа ямар ч сайтаас дутахгүй гэж бардам хэлж чадна. Мэдээж алдаа дутагдал, засаж залруулах зүйлс зөндөө байгаа ч олон шинэ зүйлийг санаачилсан, user-friendly сайт болж чадсан болов уу гэж бодож байна. Бидэнд зөндөө олон санаа, зөндөө их хүсэл-тэмүүлэл байгаа болохоор их амжилтанд хүрнэ гэж найдаж байна. Бид чадна аа.

NEST
Өмнөх нийтлэл дээр клубт харьяалагдах боллоо гээд бичиж байсансан. NEST маань өдгөө хүрээгээ тэлж, олон шинэ-шилдэг гишүүдтэй болж, өргөжин тэлж, хөгжин дэвшиж л байна. Шинэ санаагаараа сургуульдаа байтугай Монголд байхгүй клубын өрөөтэй болж :P, зөндөө зүйл төлөвлөн эхнээсээ хэрэгжүүлж байна. Магадгүй бага зэргийн удаашралтай байж болох ч NEST маань чамгүй олон зүйлийг амжуулсныг ЭЗС-ийн оюутнууд "сохор л биш бол" бүгд мэдэрч байгаа байх аа. Болгоомжил, NEST-ийнхэн ирж явна :D

Болор минь :)

2010 онд хайртайгаа учирсан. Яг өнөөдрөөс 1 жилийн өмнө хамгийн анх би түүнтэйгээ уулзаж байсан. Гайхалтай биш гэж үү, сэтгэл хөдөлгөм, сэтгэл догдлуулам, сэтгэл татам, сэтгэл булаам, сэтгэл алдрам, сэтгэл баясгам түүнтэйгээ би учирсан. Чи минь намайг үргэлж гэрэлтүүлэн, гийгүүлж, дүүргэн догдлуулж, жаргалд умбуулан хайранд бялхуулсан. Чи бол миний эрдэнэ, хэзээ ч төсөөлж байгаагүй, хэзээ ч ахиж олдохгүй, хэзээ ч алдаж болохгүй тийм эрдэнэ. 2010 он минь чамд хязгааргүй их баярлалаа, ийм азтай байлгасанд, ийм одтой байлгасанд минь. Болор оо, би чамдаа хайртай :)

Энд дурьдагдаагүй олон зүйлс болоод өнгөрсөн. Уундаа нь рс-н дээр сууж, сошиал ертөнцөд донтсон хэвээрээ. Хөлбөмбөгөө тоглож, ухаанаа алддаг хэвээрээ. Кeane-дээ донтож, хөгжимд хорхойсдог хэвээрээ. Кинонд татагдан, хөвөн дүүлдэг нь ч хэвээрээ. 131dg-ийнхэнтэйгээ уулзаад баярладаг, дурсамж-ирээдүйг хардаг. North Ducks-ийнхантайгаа уулзаад догдолдог, их эрч хүчийг мэдэрдэг. Сургуулийнхантайгаа, клубынхэнтэйгээ, найзуудтайгаа, хамтлагийнхантайгаа, хамт олонотойгоо зөндөө олон зүйлийг бүтээнэ ээ, зөндөө олон зүйлийг хийнэ гэдгээ мэдэж байна. Түүнд минь 2011 он чи туслахыг ч би мэдэж байна. Надад аз-амжилтаааа харамгүй хайрласан 2010 он мтнь баярлалаа, ахиад бүр ихийг 2011 он минь чи надад өгөөрэй!!!

УУНДАА

Сошиал Медиа ба Спорт

2010-08-08T14:44:00.006+08:00

Спорт бол хүн төрөлхтнийг хамгийн “аймшигтайгаар” байлдан дагуулсан, өөртөө татаж чадсан зүйл гэдэгтэй хэн ч маргахгүй биз ээ. Спортоор хичээллэдэггүй юм аа гэхэд спорт сонирхдоггүй, спорт үздэггүй хүн тун цөөхөн, маш бага байдаг. Спорт хүмүүсийг хар тамхи мэт өөртөө татаж, донтуулж, түүнээс бол хүмүүс амиа хорлож, найз нөхөдтэйгөө муудалцаж, гуниж гутарч, харамсаж харуусаж, эсрэгээрээ баярлаж, догдолж, дэвхцэн үсэрч, сэтгэл ханамжийг мэдэрдэг. Хөлбөмбөг ч бай сумо ч бай, шатар ч бай карате ч бай, бүгдэд нь тийм хүч бий.

Тэгвэл өнөөдрийн мэдээллийн эрин зуунд спортоор дамжуулан хэрхэн ашиг олох вэ гэдэг нь ямар ч маркетингийн мэргэжилтнүүдийн өмнө зайлшгүй тавигдах ёстой асуудал болоод байна. Хэдийгээр Монголд тийм ч сайн хөгжөөгүй байгаа ч гэсэн өндөр хөгжилтэй орнуудад энэ асуудал маш сайн хөгжиж, хэрэглэгчдийг татан, үргэлж шинэлэг байж, тэр хэрээрээ хөгжин, ашиг орлогыг олсоор байна.

Бид гадны тамирчдыг ямар их орлого олдог гэдгийг нь сонсоод гайхан бахдаж, атаархан шүүрс алдан ярих дуртай. Тэгж ярьдаг олон хүнийг бид сонссон. Мэргэжлийн спорт буюу зөвхөн тухайн спортыг төгс утгаар нь өөртөө хөгжүүлж, үзэгчдийг баясгаж, хөөргөж, нэгтгэж байгаа тамирчид тийм шагнал хүртэх нь ч аргагүй юм. Зөвхөн Хөлбөмбөгөөр жишээ татаад үзье. Криштиану Роналду хэмээх нэгэн залуугийн төлөө Реал Мадрид хэмээх клуб 132 сая долларыг /!!!/ төлөн багтаа авчирч, бусад өөр 4, 5хан тоглогчийн төлөө 200 орчим сая еврог зарлагдсан нь саяхан. Үүнд бид тэдний авах цалинг тооцсонгүй. Хөлбөмбөгт цалинг долоо хоногоор тооцдог. Долоо хоногийн 100,000-150,000 еврогийн цалин авах нь дундаж хөлбөмбөгчдөд байдаг цалин. /гэхдээ энд тэднээс авдаг “гайхалтай” өндөр татварыг дурьдсангүй/ Тэгвэл тэд толгойдоо “юмтай” л биш юм бол ашиггүй зүйлд хөрөнгө оруулахгүй нь тодорхой тийм үү?

Реал Мадрид клуб К.Роналдуг багтаа авчирснаас 6н сарын дараа гэхэд зөвхөн Мадрид хотноо түүний нэр, дугаар бүхий өмсгөл 1 саяыг борлуулан, 100-аас илүү сая еврогийн ашиг олжээ. Тэдний тоглолтын тасалбарын борлуулалт урьд өмнө хэзээ ч байгаагүйгээр өндөр хувьтайгаар гарсан буюу Хойд Америк, Азид маш ашигтай аялан тоглолт хийх санал тавигдсан гэнэ. Мэдээж тэд зүгээр сууж байгаад мөнгө олохгүй. “Саяыг хаяж, тэрбумыг ол” гэдэгтэй адилаар тэд асар том маркетингийг зах зээлд хийж, тэр хэрээрээ ийн ашиг олсоор байна. Хэдийгээр тэд өнгөрсөн жил ямар нэгэн цом хүртээгүй ч өнгөрсөн жил олсон ашиг орлогоороо бүх төрлийн спортын багууд дундаа эхний 10-т жагсаж байлаа.

Орчин үеийн маркетингийн хандлага хэрэглэгчид рүү чиглэж байгаа буюу тэдний хамгийн ихээр хошууран орж буй сошиал медиад анхаарч байгаатай адилаар спортын маркетингийн бодлого ч гэсэн сошиал медиатай шууд холбогдсоор удлаа. Бүх клубүүд өөрсдийн албан ёсны сайтуудтай болж, түүн дээрх сонирхолтой уралдаанууд болон контендуудаараа өөрсдийн фенүүдийн бүлэг үүсгэж, олон нийттэй харилцах мэдээллийн хэрэгслүүдийн хамгийн том төлөөлөгчид болох Фэйсбүүк, Твиттерд аль хэдийн нэгдэж, мэдээллээ хүргэн, шинэ шинэ фенүүдтэй болон хүрээгээ улам өргөжүүлсээр байна. Тэгвэл одоо хамтдаа сошиал медиагийн спортын клубүүдэд үзүүлэх хамгийн гол 3 нөлөөллийн талаар та бүхэнд хүргэе.

1. Шинэ фенүүдийг татах

Сошиал медиа ертөнцөд, ялангуяа олон нийттэй харилцах мэдээллийн сайтуудаар дамжуулан та одоохондоо ямар нэг багийг дэмжиж эхлээгүй байгаа шинэ хэрэглэгчдийг өөртөө татах боломжтой. Ямар ч клубын, ямар ч спортын цаашид оршин тогтнох гол суурь үндэс нь хөгжөөн дэмжигчид байдаг. Тэд байхгүй бол ашиг байхгүй, ашиг байхгүй бол баг байхгүй. Та фэйсбүүкээр эсвэл твиттерээр дамжуулан тэдэнтэй яриа өрнүүлэн, мэдэхийг хүссэн асуултанд хариулан, яагаад энэ багийг дэмжих хэрэгтэй гэж, энэ багийн нэгэн хэсэг болсноор ямар давуу талтай болохыг мэдрүүлж чадвал тэд гарцаагүй таны багийн дэмжигч болох болно.

Хойд Америкийн Үндэсний Сагсан бөмбөгийн Лос Анжелес Лэйкэрс клуб зөвхөн твиттерд 1,6 сая дагагчтай буюу зөвхөн энэ багийн cheerleaders, наймаа, цуурхал зэргийг жиргэдэг 10 орчим аккоунттай. Хэрвээ та тэдний твиттер хуудас руу орох юм бол хэрхэн хэрэглэгчидтэй яриа өрнүүлж чадаж байгааг харж болно. Гэтэл тэдний гол өрсөлдөгч Бостон Селтикс тэднээс 2 дахин бага жиргэж /2 дахин бага яриа өрнүүлж/, 65 мянган л дагагчтай /25 дахин бага дагагч/ байна. Сошиал медиа бол шинэ хэрэглэгчдийг татах, бидний энэ нөхцөлд шинэ фенүүдийг өөртөө авчрах гол хэрэгслүүдийн нэг юм.

2. Хуучин хэрэглэгчдээ хадгалах

Мэдээж ямар ч бизнесийн бас нэг гол анхаарах ёстой зүйл бол хуучин хэрэглэгчдээ хадгалж үлдэх. Шинэ шинэ, шинэ гээд улайраад гүйчихэлгүй өмнөх фенүүдээ улам үнэнч байлгаж, хайртай болгох хэрэгтэй. Чухам тэдний ухуулгаар маш олон найз нөхөд нь түүний багийг дэмждэг болдог гэдэгтэй санал нийлэхгүй гэж үү. Найз залуу чинь Германыг үхтлээ магтаад, ямар сайныг нь гайхуулахад хөлбөмбөг сонирхдоггүй ч найз охин нь тэр багийн фен болохгүй гэж үү. Word of mouth гэдэг чинь энэ биш гэж үү. Тэгвэл тэднийг яаж багтаа тийм хайртай болгох вэ?

Одоогийн жишгийг харвал фенүүддээ багууд маш олон боломжийг олгодог. Английн Челси клубыг жишээ болгон авч үзье. Тэд сайтад нь бүртгүүлсэн фенүүддээ долоо хоног болгон үнэгүй маш сайн чанарын дэлгэцийн зураг татаж авахыг санал болгож, дэлгүүрээр нь үйлчлүүлэх хямдралын эрхийг бэлэглэдэг. Тэдэнд багтайгаа хамт нэг өдөр бэлтгэл хийх боломж бүхий тоглоом санал болгож, бусад фенүүдтэйгээ ярилцах, мэтгэлцэх боломж олгосон коммьюнитиг үүсгэдэг. Тэдгээрийг чухамхүү сошиал медиа хэрэгслүүдийн тусламжтайгаар бүтээдэг. Тэдэнд зориулан өдөрлөг зохион байгуулж, бүр тэдэнтэй тоглодог гээч.

Германы хөлбөмбөгийн дээд 2 лигт тоглодог 36 багийн 80 хувь нь фенүүдийнхээ эзэмшилд байдаг гэвэл итгэх үү? Хариуд нь Бунделсиг Европын хамгийн олон үзэгчтэй, хамгийн их хүн тв-ээр үздэг, хамгийн их ашиг олдог лиг болсон юм. Байерн Мюнхен клуб зун болгон сайтаараа дамжуулан хамгийн олон хүн элссэн дүүргийн фен клубтэй нөхөрөг тоглолт хийдэг. Фен клубт элсэгчдийн 70 хувь нь сайтаар дамжуулан элсдэг. Сошиал медиагийн тусламжтайгаар бид хэрэглэгчдээ өөртөө үнэнч болгож, хайртай-дуртай болгох хамгийн боломжтой.

3. Фенүүд тань таны хамгийн сайн үйлчлүүлэгч байх болно.

Ямар ч баг зөвхөн амжилт гаргаад ашиг олоод байдаггүй. Тэдэнд тэр амжилтаа үргэлжлүүлэхэд шаардлагатай тоглогчид, дасгалжуулагчид, орчин нөхцөл бүрдүүлэхэд илүү их мөнгө хэрэгтэй. Харин мөнгийг авчрах гол зүйл нь юу вэ?

Энэ бол өмсгөл болон хэрэгслүүд. Өмсгөлөөс гадна бусад хэрэгслүүд. Нэгэнт фен болчихсон, танай баггүйгээр амьдрал нь байхгүй гэж үздэг, эсвэл өөрийгөө бусдад энэ багийн фен юм шүү гэдгээ харуулахыг хүссэн, багаараа бахархдаг хэн бүхэн багтайгаа холбоотой зүйлсийг авахыг хүсдэг. Жинхэнэ фенүүдийн аяган дээр нь, дэрэн дээр нь, бүр оймсон дээр нь хүртэл багийнх нь лого байдаг. Та тэдгээр зүйлсийг сошиал медиагаар дамжуулан худалдах, хүргэх үйлчилгээ үзүүлэх, хямдрал урамшууллын боломж олгох зэргээр ажиллаж чадвал төсөөлөмгүй их ашгийг олж чадна. Бидний өмнө дурьдсанчлан Лос Анжелес Лэйкэрсийн өмсгөл болон бусад зүйлс NBA.com сайтаар дамжуулан хамгийн их зарагдсан жагсаалтыг тэргүүлдэг. Энэ танд нэг юм хэлэхгүй байна гэж үү.

Тасалбар ч гэсэн үүнтэй адилхан. Та дурын NBA, NHL, MLB-ийн багийн сайт руу яг одоо ор. Нүүр хуудасны өмнө интро буюу танилцууга хэсэгт яг одоо онлайнаар тасалбар захиалбал ийм урамшуулалттай, тийм хөнгөлөлттэй гээд санал болгосон зүйлсийг харах болно. Хэн ч тасалбар борлуулах цэг рүү гүйснээс гэрээсээ нетээр дамжуулаад захиалчихыг илүүд үзнэ. Хэрвээ та тийм зүйл хөгжөөгүй харь нутгаас ирчихээгүй бол шүү дээ :) Үзэгчгүй багийн тоглолтыг тв-ээр дамжуулах гэж мөнгө төлөхгүй, үзэх гэж ч мөнгө төлөхгүй, үзэгчгүй багийг аялан тоглолтоор урихгүй, тэднийг хэн ч тоохгүй. Аль болох олон хүнд өөрийн багийн логотой зүйлсийг тараа, тэр хэрээр нь хүмүүс түүнийг авах гэж улайрах болно. Түүнд хүрэх хамгийн сайн арга зам бол сошиал медиа.

Хүн хүнтэйгээ харилцахыг илүүд үздэг. Дэмждэг багийн чинь мэдээллийг зөвхөн чамд тэр багийн хэн нэгэн хүргэнэ гэхээр сайхан санагдахгүй байна уу. Таны асуусан асуултанд, мэдэхийг хүссэн зүйлд тань хариулж байна гээд төсөөл дөө. Барселонагийн фен багтаа хандаад тоглолтынх нь үеэр “энэ Месси өнөөдөр ямар сайн байна вэ” гээд бичихэд өөдөөс тань Барселонагийн логотой 1 сая хүн дагасан хэрэглэгчээс “тэгэлгүй яахав тэр хамгийн шилдэг нь шүү дээ” гээд хариу ирж байна гээд төсөөлдөө. Гайхалтай. Энэ л сошиал медиагийн амжилтын нууц.

Та Монголд энэ байдал ямар байгаа талаар нэг бодоод үзээрэй. Тэгээд хөгжилтэй нь, хүрээтэй нь харьцуулан бодоход ч илүүдэхгүй. Энэ тухай дараа жичдээ ярилцах болно. Энд хүрээд өнөөдөртөө өндөрлөе. Сошиал медиа маркетингийг хэрхэн спортод хэрэглэх тухай, хэрэглэж байгаа тухай, хэрэглэвэл зохих тухай та бүхэнд үргэлж хүргэж байх болно.

Шинэ!!

2010-08-08T14:39:00.003+08:00

Блогтоо хамгийн сүүлд нийтлэл оруулснаас хойш яг 4 сар болжээ. 4.8-8.8. Их юм энэ хооронд болжээ, гунигтай, дурсамжтай, жаргалтай, азтай, харамсалтай олон үйл явдал болж. Гэнэт блогоо санаад идэвхтэй биш юм аа гэхэд хаячихгүйхэн шиг нийтлэл бичдэг баймаар санагдлаа. Өөр сайтууд дээр тавигдаж байгаа нийтлэлүүдээ ядаж блогтоо оруулах болно. Бас хэрэгтэй санагдсан, сонирхолтой байж магадгүй зүйлсээ хуваалцахаар шийдлээ. Дараа харахад ядаж санах байхдаа.
Уундаа

SoccerReview: Байерн хагас шигшээд!

2010-04-08T05:46:00.005+08:00

Тоглолтын эхний 7 минутанд л Даррен Гибсон болон Нани нарыг гоол хийхэд Манчестер Юнайтедийг 3 дахь жилдээ дараалан Аваргуудын лигийн финалд шалгарах нь гэдэгт эргэлзэх хүн тун цөөхөн үлдсэн биз ээ. Гэсэн ч герман машин хэзээ ч бууж өгдөггүйгээ харуулж, энэ жил одтой байгаа голланд хагас хамгаалагч Арьен Роббены гайхалтай гоолын ачаар Байерн Мюнхен 2002 оноос хойш анх удаа хагас шигшээд шалгарлаа.
Өмнөх тоглолтонд шагайндаа гэмтэл аван 3 долоо хоног тоглохгүй хэмээн оношлогдсон Уэйн Рүүни гарааны бүрэлдэхүүнд багтсан нь хамгийн сонирхолтой асуудлуудын нэг байлаа. Сир Алекс Фергюсон хэдийгээр өчигдөрхөн нь түүнийг тоглуулах ямар ч боломжгүй гэсэн ч ийн эцсийн мөчид гарааны бүрэлдэхүүнд багтаасан нь тэр байв. Челсид хожигдсон бүрэлдэхүүнээ Фергюсон нэлээн өөрчилж, Гари Невилл, Пол Скоулз, Райн Гиггз, Димитар Бербатов, Пак Жи Сунг нарыг сэлгээнд суулгасан байв. Харин Байерны бүрэлдэхүүнд Арьен Роббен болон Бастиан Швейнштейгер нар эргэн ирснээс өөр өөрчлөлт гараагүй байсан юм.
Тоглолтын эхлэл Байерны хувьд байж болох хамгийн муугаар эхэлсэн. Тэнцэхэд л дараагийн шатанд шалгарах болзолтой байсан тэд 3 дахь минутанд л тун санамсаргүй гоол алдчих нь тэр. Залуу бразил хамгаалагч Рафаел болон Рүүни нарын довтолгооны хувилбарыг Гибсон тун овжин ашиглан эхний гоолыг оруулсан юм. Хаалгач Буттын харагдах байдлыг Демичелис хаачихсан байсан учраас түүнд хаах боломж олдсонгүй. Байерны хамгийн асуудалтай байрлал болоод байгаа хамгаалалтын шугам тоглолтын эхнээс тун бүтэл муутай тоглолыг үзүүлж байсан нь 7 дахь минутанд алдсан 2 дахь гоолоос харагдана. Баруун жигүүрт Валенси залуу хамгаалагч Бадштюбер дээр хөнгөхөн “тоглож” байгаад талбайн төв рүү газраар дамжуулалт хийснийг Нани “чулуу” болгож онооны харьцааг 2:0 болголоо. Үүнээс хойш МанЮ бүр илт сэргэж, Байерн харин нойрноосоо сэрээгүй харин ч бүр шоконд орсон байдалтай хэсэг хугацаа өнгөрсөн. Энэ үед МанЮ хэд хэдэн сайхан боломжийг алдсан юм. Гэсэн ч 41 дэх минутанд Нани ахин оновчтой цохилт гүйцэтгэн гоол хийж, тооны харьцаа 3:0 болон, Манчестер хагас шигшээгийн “эрхээ” бараг халааслачихсан мэт бүгдэд санагдаж байлаа. Гэхдээ чухам яг энэ мөчөөс эхлэн Байерн, герман машин ажиллаж эхлэн өрсөлдөгчөө сандаргаж эхэлсэн. Төдийлэн бөмбөг эзэмшиж, өөр дээрээ тогтоож чадахгүй байсан төвийн шугам идэвхтэй болж ирэн улмаар Мюллерын дамжуулсан бөмбөгийг Кэрриктэй тэмцэлдсэн тулаанд ялсан Олич хүлээж аван Ван Дер Саарын хаалганд хөнгөхөн бөмбөг оруулан багтаа бага ч гэсэн найдвар өгсөн юм. Дараахан нь Роббены гоёмсог цохилтыг голланд хаалгач ихээхэн ур чадвар гарган байж хаасан бөгөөд ахиад хэдхэн минут байсансан бол германчууд 2 дахь бөмбөгөө хийх тун ойрхон байсан болов уу.
2-р үе эхлээд 5хан минут өнгөрч байхад туршлагагүй залуу хамгаалагч Рафаел франц маестро Риберигийн довтолгоог дүрмийн бус алдаа хийн зогсоож, улмаар 2 дахь шар хуудсаа авсан нь чухамхүү энэ тоглолтын хувь заяаг шийдчихсэн гэж хэлж болно. Эндээс эхлэн Байерн довтолж, МанЮ хамгаалж эхэлсэн юм. Сэлгээнээс орж ирсэн Гомеш болон Рибери нар хэд хэдэн сайхан боломжоо алдсны дараа 74 дэх минутанд Риберигийн булангийн цохилтоос хөөргөж өгсөн бөмбөгийг 16-ын шугамын гаднаас Арьен Роббен шууд цохин, өндөр техникийг үзүүлэн, гайхалтай нэгэн гоолыг хийснээр тооны харьцаа 3:2 болсон. Яг л өмнөх шатанд Фиорентинаг “аргалж” гарч ирсэн шиг дүр зураг Олд Траффордод давтагдаж эхлэв. Улмаар Байерн хамгаалалтандаа ахиж алдаа гаргасангүй, Фергюсоны сэлгээ-Гиггз, Бербатов нар үр дүнгүй тоглосоор 10 хүнтэй Манчестер ялалт байгуулсан ч Аваргуудын лигээс хасагдлаа.
Байерн 2001 онд түрүүлснээсээ хойш, харин Герман клуб 2002 оноос хойш Аваргуудын лигийн хагас шигшээд шалгарч үлдээгүй байсан юм. Харин Английн ямар ч төлөөлөгч шөвгийн 4-т үлдээгүй нь сүүлийн 7 жил гараагүй байсан тохиолдол билээ.
Манчестер Юнайтедын энэхүү хожигдол тэднийг нэг тоглогчоос, Уэйн Рүүнигээс хэт хамааралтай болсныг илтгэж байна. Тэд Рүүнигүй Челситэй маш чухал тоглолтыг хийн, ялагдал хүлээж, сүүлийн 3 жил тэргүүлсэн Премьер лигийн тэргүүллээ алдсан. Харин энэ удаа Рүүни төсөөлөмгүй эргэн ирэлтийг хийж, талбайд гарсан ч шагайн өвчний зовиуртай байгаа нь илт мэдэгдэж, улмаар Рафаелийн улаан хуудасны дараа сэлгэгдсэн юм. Бербатовыг муу довтлогч гэж хэн ч хэлэхгүй ч МанЮ-д арай л гологдож байх шиг. Магадгүй Фергюсоны энэ зун хийх гол ажил нь Рүүниг дэмжих довтолгооны шугамаа хүчирхэгжүүлэх байх болов уу.
Байерн Мюнхен ингэснээр 3 фронтод зэрэг тулалдсан хэвээр үлдэж байна. Тэд Бундеслигийг 2-т яваа Шалькегаас 1 онооны илүүтэй тэргүүлж, Покал буюу цомын тэмцээний финалд Вердер Брементэй тоглохоор болоод байгаа. Аваргуудын лигийн хагас шигшээд яг энэ тоглолттой зэрэг явагдсан Бордо Лион багуудын ялагч болох Лион клубтэй тоглоно. Энэ зун ирсэн Луй Ван Гаалийн тактик болон шинэчлэлт багийн амжилтанд нөлөөлж буй нь тодорхой ч дээрээс нь Роббери буюу Рибери-Роббен гэсэн жигүүрийн 2 дэлхийн зэрэглэлийн тоглогчид тэдний амжилтанд шууд хамаатай. Рибери өнөөдөр тийм сайн байгаагүй ч хамгаалагчдын толгойны өвчин байнга байлаа. Роббены тоглолтыг, түүнийг тоглолтын шилдгээр шалгаруулахад 72 дахь минутанд хийсэн гоол л хангалттай биз ээ. Алдсан гоолууд, гаргасан алдаанууд зэргээсээ хаалгач, төвийн хамгаалалтын тал дээр асуудалтай, энэ зун ажиллах хэрэгтэй болжээ гэдгийг менежер Нерлингер болон Ван Гааль нар анзаарсан гэж найдаж сууя.
1999 оны Аваргуудын лигийн финалд хоорондоо таарч тоглон, шүүгчийн мэдлийн цагт 2 гоолыг хийн МанЮ аварга болж байсан бол 2001 онд Байерн шөвгийн 8-д 2 тоглолтонд МанЮ-г буулгаж аван тэр жилийнхээ аварга болж байсан түүхтэй. Тэгвэл энэ жил яах бол? Бөмбөг бөөрөнхий, бүгдээрээ харж л сууя. Манчестер Юнайтед, Англи улс Аваргуудын лигээс хасагдаж, Байерн Мюнхен 9 жилийн дараа эргэн шилдэг 4-т ирлээ.

SoccerReview: Аваргуудын Лиг!!!

2010-03-23T19:50:00.006+08:00

Өнгөрсөн долоо хоногт зөвхөн хөлбөмбөг сонирхогчдын төдийгүй нийт спорт сонирхогчдын хамгийн анхаарлыг татсан үйл явдал нь Швейцарийн Ньон хотноо байрлах УЕФА-ийн төв байранд болсон 2009-2010 оны улирлын Аваргуудын лигийн шөвгийн найман багийн оноолтыг тодруулах сугалааны үйл ажиллагаа байлаа.

Эхний хосоор Францын багууд тоглохоор болсон. Өнгөрсөн жилийн Францын аварга Бордо, түүний өмнөх 7 жил Францад ноёрхсон Олимпик Лион багууд хоорондоо тоглоно. 2003-2004 оны улиралд Монако, Лион багууд шөвгийн наймд үлдснээс хойш Францын 2 баг шөвгийн наймд үлдсэн анхны тохиолдол болж байгаа бөгөөд чухам тэр жилээс хойш анхны Франц баг шөвгийн 4-т үлдэх нь. Лионыг Реал Мадридтай таарахад хэн ч энд хүрээд ирнэ гэж бодоогүй биз, гэтэл тэд зохион байгуулалттай тоглолт, найдвартай хамгаалалтынхаа ачаар тэднийг буулган авсныг бид харсан. Харин Бордо хэсэгтээ боломжит 18 онооноос 16-г нь авч, долоо дараалан ялаад байгаа билээ. Энэ 2 баг лигтээ шинэ оны өмнөхөн таарч тоглон Бордо Лионыг талбай дээр нь буюу Стаде Герландад 1:0-ээр буулган авч байжээ.Харин ялсан Францын баг нь Сир Алекс Фергюсоноор удирдуулсан өнгөрсөн жилийн финалын баг болох Манчестер Юнайтед болон 2001 онд Аваргуудын лигт түрүүлснээсээ хойш шөвгийн 8-аас цааш шалгарч амжаагүй байгаа Байерн Мюнхен багуудын ялагчтай тоглоно.
Европын дэвжээн дэх хамгийн заналт өрсөлдөгчдийн тулааны эхний тоглолт Аллианз Аренад болно. СҮүлийн 10 гаруй жилд 7 удаа таарсан бөгөөд ердөө нэгт нь АНгличууд хожиж байв. Гэхдээ тэр нэг хожил нь чухам хамгийн үнэтэй нь байсан бөгөөд 1999 оны Аваргуудын лигийн финалд шүүгчийн мэдлийн нэмэлт цагт Оле Сульшер, Тедди Шерингэм нарын гоолын ачаар 2:1-ээр Байерныг буулгаж аван аварга болж байсан билээ. Харин 2001 онд аварга болох ерөөлтэй Байерн шөвгийн наймд “улаан чөтгөрүүд”-ийг 2 тоглолт бүрт 2:1, 1:0-ээр хожиж байсан байна. Энэ 2 баг өмнөх шатанд 2-уул итали багуудыг хожсон билээ.
2006 оны финал дахин давтагдах нь. 2 жил дараалан түрүүлсэн баг болохоор аянаа эхэлсэн Барса, Арсен Венгерээр удирдуулсан залуу Арсеналчуудыг ялж байж энэ зорилгодоо хүрэх боллоо. 2006 онд хүн дутуу Арсеналыг арайхийн Барса хожсноос хойш хоорондоо таарч тоглоогүй тул сонирхолтой тулаан болох нь гарцаагүй. Ялангуяа Т.Анригийн хувьд онцгой тоглолт болох биз. Арсеналын амьд домог, түүхийг бичилцэгч, сэргэн мандалтын эхлэлийг тавигч тэрээр яг одоо Каталаны багийн өмсгөлтэй тоглож байгаа.
Арсенал Барселона багуудын ялагчтай тоглох багийг бид Моксвагаас мэдэх болно. Клубынхээ төдийгүй улсынхаа түүхэнд аваргуудын лигийн шөвгийн наймд анх шалгарсан Москвагийн ЦСКА, тактикийн мэргэжилтэн Ж.Моуриньогоор удирдуулсан Серие А-ийн аварга Интер Милантай тоглохоор боллоо. Сүүлийн 3 жилийн турш даваагүй даваагаа Челсигээр ахиулсан Интер эхний тоглолтоо талбай дээрээ хийнээ. Ньонд ирсэн итали сурвалжлагчид танхимыг бүгд инээмсэглэн гарсан хэдий ч Оросын Аварга Рубин Интертэй хэсэгтээ 1:1-ээр тэнцснийг болон ЦСКА 2005 онд УЕФА-ийн цомын аваргаар шалгарч байсныг мартаж болохгүй биз ээ.
Бөмбөг бөөрөнхий гэдэг. 5-р сарын 22-нд алдарт Сантьяго Бернебауд ямар 2 багийг тоглохыг бид хүлээх л үлдлээ. Бооцоогоо тавьж эхлэх цаг нь болсон бололтой.
Аваргуудын лигийн шөвгийн наймын тоглолтууд 3-р сарын 30, 31-ний өдөр явагдах бол хариу тоглолтууд 4-р сарын 6, 7-ны өдөр явагдана. Цэнхэр гарагийн ногоон талбайн цусгүй тулаанууд үргэлжилсээр....

MusicPreview: Cinema Night 3

2010-03-03T10:38:00.006+08:00

Хөгжим сонирхогчдод өөрсдийн бэлтгэн хүргэдэг шинэлэг бөгөөд сонирхолтой тоглолтуудаараа үргэлж бэлэг барьж байдаг Монгол Улсын Филармонид ахиад нэгэн бэлгээ задалсан тухай мэдээг танд хүргэх гэж байна. Саяхан морин хуурын 2-хон чавхдсаар дэлхийн сонгодог киноны хөгжмүүдийг эгшиглүүлсэн Playing Love тоглолтоо 5 ч удаа тоглож, зөвхөн Филармоний түүхэнд төдийгүй Монголын сонгодог хөгжмийн түүхэнд нэгэн шинэ хуудсыг бичсэн тэд энэ удаа өмнө нь 2 ч удаа тоглож үзэгчдийн таашаалыг хүртээд аль хэдийн амжсан Cinema Night тоглолтоо 3-р сарын 4, 5-ны өдрүүдээр тоглох гэж байна. Оскарын шагнал хүртсэн шилдэг кинонууд болон үзэгчдийн сэтгэлд хоногшсон дуунуудын хөгжмийг төгөлдөр хуурын гоцлол болон сонгодог оркестрийн хамтаар тоглон хүргэдэг тус тоглолтыг өмнө нь үзэх боломж надад тохиож байсан юм. Эхний тоглолт нь үнэхээр сонгодог тоглолт ямар болох ёстойг, ямар болдгийг, ямар болж болдгийг үзэгчдэд өндөр түвшинд харуулсан мэдрүүлсэн тоглолт болсон мэт санагддаг. Удирдаач Б.Лхагвасүрэн, төгөлдөр хуурч Б.Анар нарын өөрсдийн найруулан бэлтгэсэн тус тоглолтын төгсгөлд “Биелэгдэшгүй Даалгавар” киноын цоглог бөгөөд сүрт хөгжмийг тоглон дуусахад танхимд хуран цугласан, үзэгч бүхэн босож талархлаа илэрхийлэн, удаанаас удаан алга ташин, баяр хүргэж байсан нь тухайн үед ойрд харагдаагүй тэсрэлт байсан юм. 2 дахь тоглолт багагүй хүлээлтийн дараа тоглогдсон. Энэ удаа мэргэжлийнхээ дагуу Италид суралцдаг морин хийлч Амармэнд, шилдэг төгөлдөр хуурчдын нэг Анартай хамтран гоцлол хөгжмийг тоглосон юм. Сувдан эрэг, Домог 1900, Мөрөөдлийн Кино Театр зэрэг кинонуудын хөгжмийг үнэхээр үзэгчдийн сэтгэлд хүртэл, дотор нь үйл явдлыг нь санагдуулам, санагдуулаад дурсамжийг сэргээмээр, дурсамжийг сэргээн сэтгэлийг уймруулам, уймруулан уйлуулам аялгууг эгшиглүүлж үнэхээр чадсан.
...3 дахь тоглолтыг зөвхөн би ч биш олон олон хөгжмийн хорхойтнууд удаан хугацаагаар хүлээсэн нь тодорхой. Болох нь ойлгомжтой ч хэзээ нь тодорхойгүй байсан тус тоглолтын анхны тов 12 сард хэмээн гарсансан. Гэвч гайт өвчнйи улмаас үзвэл үйлчилгээний газруудын хуваарьт өөрчлөлт гаран улмаар одоо тоглох гэж байна. Бидний сэтгэлд хоногшсон Форрест Гамп, Хатан Зоригтон, Оддын дайн, Шиндлерийн Бүртгэл зэрэг кинонуудын хөгжмийг бид энэ удаа амьдаар, гэхдээ илүү уянгалаг бөгөөд мэргэжлийн хөгжимчдийн тоглосноор сонсох боломж гарч байна. Үйлчилгээний хувьд шинэлэг зүйлсийг бидэнд зориулах тал дээрээ үргэлж эхний эгнээнд явдаг Филармоний хамт олноос бэлдсэн сюрпризүүдийг нь хүлээсээр байна. Зарлалын хуудасны төгсгөлд хэд хэдэн дуучдын нэрс, мөн Хөгжим Бүжгийн Коллежийн найрал дуучид байсан нь сонирхол татахгүй байхын аргагүй байлаа. Юутай ч удаан хүлээсэн тоглолт тун удахгүй, 3-р сарын 4,5-ны өдөр тоглох гэж байна, би лав үзнэ, таныг ч гэсэн үзэхийг хүсч байна. Хамгийн гол нь бидэнд ийм боломж дахиж олдохгүй ч байж мэднэ. Улсын Филармоний твиттер хуудсаараа мэдэгдснээр магадгүй энэ цувралын сүүлчийнх гэсэн учраас энэ боломжийг, тэр нэгэн гайхалтай мэдрэмжийг амтлах, мэдрэх, сонсох боломжийг бүү алдаарай. Та энэ үдэш сэтгэл хөдөлгөм хөгжмийн яруу эгшгийн аялгуунд уяран хайлж, уйлан ухаарч, догдлон биширч, дурсан сэргэж, инээн баясах болно. Төгсгөлд нь 2009 онд тоглосон 2-р цуврал дээр тоглогдсон Сувдан Эрэг киноны хөгжмийн үеэр хийсэн өөрийн бичлэгээс хуваалцаж байна...

SoccerReview: 2010 оны ДАШТ-ыг шинжихүй /2-р хэсэг/

2010-01-31T20:39:00.001+08:00

Италичууд аваргаа хамгаалж чадах уу, Испаничууд давхар цохилт хийж чадах уу, Бразилчууд алдагдсан нэр хүндээ эргүүлэн авч чадах уу, Англичууд мөнхийн азгүйтлээсээ зугтаж чадах уу. Аль эсвэл Африкийн аль нэг баг нь шуугиан тарьж нутагтаа түрүүлэх болов уу. Анх удаа, эсвэл удаан завсарлаад оролцож байгаа багуудаас нэг нь онцгойрон цойлох юм болов уу. Харж л сууя, бид 4 жил хүлээж болсон юм чинь дахиад хэдхэн сар хүлээхэд юу нь болохгүй гэж .

E хэсэг
Голланд: Урьдчилсан шатнаас хамгийн эхэнд эрхээ авсан Голландчууд өөрсдийн сугалаандаа сэтгэл хангалуун байгаа биз ээ. Саяхан Японыг нөхөрсөг тоглолтонд 3:0-ээр хожсон тэд Евро-2008-д үзүүлсэн тоглолтоо үзүүлбэл хэсгийн тэргүүн багаар хялбархан шалгарах биз. Үеийн үед үзүүштэй, уран, чадварлаг тоглолтоороо гайхуулдаг “нисдэг Голландчууд” энэ ДАШТ-д ч хамгийн сонирхолтой багуудын нэг байх болно.
- Таавар: Хэсгийн 1-р байрт эргэлзээгүй орно. Орон гаран тоглолттойгоороо гайхагддаг өндөр зэрэглэлийн олон тоглогчидтой учир хасагдах шатанд л толгойгоо гашилгаж болох юм.

Дани: Португал, Швед, Унгар гэсэн багуудтай хэсгээс сэтгэл хөдөлгөм тоглолтууд үзүүлсээр 1-р байраар шалгарч гарч ирсэн Данийн шигшээ багт найдлага тавьж байгаа цөөнгүй хүн байна. Тийм ч хүнд сугалаа биш болохоор Мортен Олсений залуус хэсгээс гарах боломж тун өндөр юм.
- Таавар: Бүрэлдэхүүний хувьд, багийн зохион байгуулалтын хувьд тун өндөр түвшин байгаа нь сонгон шалгаруулалтаас харагдсан тул магадгүй хэсгийн тэргүүн байрын төлөө өрсөлдөж болох юм.

Япон: 4 дэхээ дараалан ДАШТ-д шалгаран оролцож байгаа Азийн хамгийн амжилттай багуудын нэг Японы шигшээ багийн хувьд энэ удаа тун хүнд сугалаа татжээ. Хэсгийн бусад 3 баг нь хамгийн сул багаар тэднийг тодруулж, боломжит 3 оноогоо авахаар зүтгэх болно. Сүүлийн нөхөрсөг тоглолтуудад бараг бүгдэд нь хожигдож, чансааны 43-р байрт бичигдэж байгаа Японы шигшээд Ш.Накамурагийн тоглолт хэр байх нь тун чухал.
- Таавар: Хэдийгээр эрч хүчтэй, хурдтай баг хэдий ч тэднийг хэсгээсээ шалгарна гэж хэлэх арай боломж байхгүй мэт. Хэсгийн сүүлийн байрт орохгүй байх нь тэдний хувьд том амжилт гэлтэй. Энэ жил бишээ, магадгүй 2022 онд...

Камерун: Өөрийн тивдээ тоглох Камеруны шигшээг хожих нь тун хэцүү даалгавар байх болов уу. 2006 оны ДАШТ-ыг өнжсөн тэдний хувьд С.Это’о тэргүүтэй тун хүчтэй бөгөөд эрч хүчтэй бүрэлдэхүүнтэйгээр энэ удаа оролцох болно. Тэдний сөрөг довтолгоо болон ширүүн тоглолт эсрэг багтаа хамгийн гай тарьж болох юм.
- Таавар: Тэдний ойрын үеийн формыг харвал хэсгээс гарахын тулд нэлээн ширүүн тэмцлийг өрнүүлэх болов уу. Гэхдээ Данийн багтай хэрхэн тоглохоос тэдний ирээдүй шийдэгдэх биз.

F хэсэг

Итали: Дэлхийн аварга цолыг эзэмшигч Италийн шигшээ ийм сугалаа татсандаа өөрсдийгөө азтайд тооцох хэрэгтэй болов уу. Энэ хэсэгт орсон багуудын дундаж чансаа нь 36 байгаа нь хамгийн сул хэсэг гэсэн статус зүүхэд хүргэж байна. Липпигийн “ахимаг” одод нь хэсгийн тоглолтондоо лав санаа зовохгүй нь.
- Таавар: Парагвайн шигшээ тэдэнд гай тарьж мэдэх ч Италичуудад хэсгийн тэргүүн байрыг эзлэх туршлага, чадвар, боломж дүүрэн байна.

Парагвай: Өмнөд Америкийн сонгон шалгаруулах бүсийн хамгийн шилдгүүдийн нэг нь байсан Р.Санта Крузээр удирдуулсан Парагвайн шигшээд хэсгээсээ гарах бүх тохироо нь бүрджээ. Хэдийгээр голцуу залуусаас бүрдсэн баг байх ч гэсэн сонгон шалгаруулалтад үзүүлсэн эрчтэй, хурдтай тоглолт нь тэднийг энэ хэсгийн фаворитуудын нэг байх нөхцлийг бий болгож байна.
- Таавар: Хэсгээсээ 2-р байраар шалгаран дараагийн шатанд шалгарна. Сугалаа тэдэнд энэ боломжийг өгсөн, харин тэд өөрсдөө үүнийгээ ашиглах ёстой.

Шинэ Зеланд: Далайн бүсийн багуудаа бут ниргэсээр гарч ирсэн тэдний хувьд 1982 онд анх ДАШТ-д оролцсон юм. Гэсэн ч тэр тэмцээнд ганц ч оноогүй буцсан гашуун туршлага нь энэ жил ч давтагдах бололтой. Тэдэнд дундаж түвшний Р.Нелсен гэсэн ганц л тоглогч байна. ДАШТ-д оролцоно гэдэг Шинэ Зеландын багийн хувьд том амжилт, гэхдээ хэн ч тэмцээнд ялагдах гэж ирдэггүй!
- Таавар: Хэсгийн сүүлийн байр. Шуудхан хэлэхэд оноо авахгүй, тэр ч бүү хэл гоол ч оруулахгүй байж мэднэ.

Словак: М.Скртел, М.Хамсик гээд зөвхөн цаасан дээр төдийгүй талбай дээр ч багаа удирдаад аваад явчих залуу одод бүхий Словакийн шигшээ хүчтэй бүрэлдэхүүнтэй байна. Гэсэн ч тусгаар улсын хувиар анх удаа ДАШТ-д оролцож байгаа тэдэнд түүх бүтээж хасагдах шатанд үлдэх боломж тийм ч өндөр биш байна.
- Таавар: Том тэмцээний туршлага тэдэнд хамгийн гол саад болох болно. Тэд Европын аваргад ч оролцож байгаагүй. Бас хэтэрхий залуухан байна. Хэсэгтээ 3-р байр. Гэхдээ тэднийг бүү басаарай, тэд Чехийг мулталсан шүү дээ.

G хэсэг
Бразил: Дунгагийн залуусын хувьд энэ байж болох хамгийн хүнд сугалаа байлаа. Дэлхийн чансааны эхний 10-т байгаа 2 баг багтсан хэсэг үүнээс өөр байхгүй. Ихэнх хүмүүс Кака, Л.Фабиано зэрэг топ тоглогчид нь ид формтой байваас тэднийг хэсгээсээ шалгарах нь тодорхой гэж байгаа ч энэ нь тийм хялбар биш байх болно. Уламжлал ёсоор довтолсон тоглолт үзүүлэх ч “шоудах” цаг олдохгүй л болов уу.
- Таавар: Туршлага болон тоглогчдын ур чадвар зэргийг харгалзвал хэсгийн лидер баг. Гэхдээ “үхлийн хэсэг” үргэлж сюрпризээр дүүрэн байдаг, хэн мэдэхэв.

БНАСАУ: Үхлийн хэсгийн хамгийн сул баг хэмээн нэрлэж байгаа ч үнэн хэрэгтээ тэднийг дэлхий нийт тийм ч сайн мэдэхгүй болохоор тэгж хэлж байна. Монголын шигшээ багтай сонгон шалгаруулалтын эхний тоглолтоо хийж байсныг санаж байгаа биз. Хэрвээ өөр хэсэгт орсон бол “битүү морьд”-д илүү боломж гарах байсан, гэвч бодит байдал дээр энэ тэдний хувьд үнэхээр азгүй сугалаа. Чансааны 86-т бичигдэж байгаа тэд ДАШТ-д 1966 онд анх оролцохдоо шөвгийн 8-д шалгарч гайхуулж байсныг бүү мартаарай.
- Таавар: Тэдний хувьд энэ удаа оноо авах, аль нэг багтай нь тэнцэх нь том амжилт болох болно. Гэхдээ ахин сануулахад хэн ч тэднийг тийм ч сайн мэдэхгүй. Бид мэдэхгүй зүйлээсээ л айдаг шүү дээ.

Зааны Ясан Эрэг: Өнгөрсөн ДАШТ-д анх шалгаран оролцохдоо үхлийн хэсэгт орон харамсалтайгаар нутаг буцаж байсан тэд энэ удаа ч үхлийн хэсэгт орлоо. Гэхдээ энэ удаа тэдний хэсгээс гарах магадлал өндөр. Хэрвээ Бразил хэсгээ тэргүүлнэ гэж үзвэл Португалийн сонгон шалгаруулалтанд үзүүлсэн “аймшигтай” тоглолтуудаас дүгнэн “Заан”-уудыг 2-р байраар шалгарах боломжтой гэж хэлж чадахаар байна. Д.Дрогба, К.Туре, Я.Туре..эд бол тэдний “чихцэлдэж” ядсан оддын энгийн жишээ.
- Таавар: Африк тивд болж байгаа тэмцээнд Африк баг шуугиан тарьж яагаад болохгүй гэж. Тийм баг болох хамгийн магадлалтай нь ЗЯЭ. Хамгийн гол нь тэд Португал, К.Роналдуг ялах ёстой.

Португал: Европын Бразилчуудын яг одоогийн форм тийм ч сайн биш байна. К.Роналду гэмтэх л юм бол К.Кэйрошийн залуусын байдал хэцүүдэх болно. Босниаг тэд зовж байж, магадгүй бага зэргийн азны ачаар ялсан байж болох ч ДАШТ-д тийм зүйл тохиолдохгүй л болов уу. Тэгсэн хэдий ч тэд энэ ДАШТ-д оролцож байгаа хамгийн сайн бүрэлдэхүүнтэй багуудын нэг нь гарцаагүй билээ.
- Таавар: Зааны Ясан Эргийн багтай хийх тоглолт бүхнийг шийдэх болов уу. Тэдэнд туршлага, хангалттай одод бий. Одоо Кэйрошийн тактикт нийцүүлэн, сайн зохион байгуулалттай байх л шаардлагатай.

H хэсэг

Испани: Дэлхийн чансааг тэргүүлэгч, яг одоогийн хамгийн шилдэг баг гэж хэлж болохуйц Испаничуудын хувьд энэ тийм ч хүнд сугалаа биш. Гэхдээ хэсгээс шалгарсны дараа өөрийн хөрш Португалтай таарах магадлал 50 хувь. Европын аваргуудын хувьд энэхүү тэмцээний гол түрүүлэх магадлалтай баг гэдэг нь тодорхой ч бүхнийг эхнээс нь тун болгоомжтой хийх хэрэгтэй. Испаничуудыг бүх цаг үеийн хамгийн азгүй баг гэж зүгээр ч нэг тодорхойлойгүй биз.
- Таавар: Сүүлийн жилүүдэд Европт ноёрхож байгаа Испаничуудад энэ хэсгийг тэргүүлэх нь тийм ч хэцүү биш байх болов уу.

Швейцарь: Шигшээ багийн түвшинд тийм ч туршлагагүй ч дэлхийн шилдгүүдийн нэг О.Хитцфельд дасгалжуулж байгаа Швейцарийн шигшээ Европын аварга шалгаруулах тэмцээнийг зохион байгуулж, өмнөх хэд хэдэн томоохон тэмцээнд оролцож, туршлага хуримтлуулсан тул хэсгээс шалгарах боломж Америк тивийн 2 өрсөлдөгчөөсөө хавьгүй илүү байна.
- Таавар: Хэрэгтэй оноонуудаа авах, бүх боломжоо ашиглах хэрэгтэй. Хамгаалалтаас сөрөг довтолгоонд шилждэг онцлогоо бүрэн гаргаж чадвал 2-р байр халаасанд байна.

Гондурас: 1982 онд ДАШТ-д анх оролцсноосоо хойш дэлхийн хэмжээний тэмцээний утаа үнэрлээгүй Гондурасын багийг дутуу үнэлж болохгүй. Тэд сонгон шалгаруулалтанд гайхалтай тоглолт үзүүлсэн, дээрээс нь У.Паласио, Д.Суазо зэрэг эсрэг багийн хаалгыг мялаачих чадвартай олон тоглогчидтой. Гэсэн ч туршлага дутах өндөр магадлалтай Гондурасчуудын хувьд тэмцээнд оролцоно гэдэг том амжилт юм.
- Таавар: Зарим нэг “шинэ” багуудтай адил тэдний хувьд оноо авах нь амжилттай оролцсныг илтгэх болно. Гэсэн ч хэсгээс шалгарах боломж бараг үгүй л болов уу.

Чили: Өмнөд Америкийн ямар ч багийг хожих тун хэцүү байдаг. Ялангуяа М.Гонзалез, М.Фернандез зэрэг хурдтай бөгөөд чадварлаг жигүүрийн тоглогчидтой Чилийн багийг. 1998 оны ДАШТ-д И.Самароно, М.Салас зэрэг ододтой байх үедээ хамгийн сүүлд оролцсон тэдний хувьд энэ удаагийн тэмцээнд Швейцарийн багтай 2-р байрын төлөө өрсөлдөх даалгавартайгаар ирэх биз ээ.
- Таавар: Гондурасын багтай оноо хувааж болохгүй. Гэхдээ тэр хэмжээгээрээ Испаний багаас оноо авах шаардлагатай. Тэгсэн ч хэсгээс гарах боломж тийм ч өндөр биш.

MusicReview: "Playing Love"

2010-01-24T22:10:00.013+08:00

Монгол Улсын Филармони сүүлийн хэдэн өдөр хөл хөдөлгөөнтэй байлаа. Аль өнгөрсөн жилийн 11-р сараас хойш зарлагдан, үзэгчдийн дунд чамгүй хүлээлт үүсгээд байсан Playing Love тоглолт чухам энэ өдрүүдэд тэнд болсон юм. Миний бие энэхүү тоглолтыг үзэх завшаан олдсныг эхэнд тэмдэглээд, нэгэн гайхалтай үдшийг морин хуурын эгшиг уянгалаг аялгуун дор сэтгэлийн цэнгэлийн мэдрэн "мансууран" өнгөрүүлсэн сэтгэгдлээсээ та бүхэнтэй хуваалцаж байгаадаа таатай байна.
Монгол улсынхаа нэрийг, өв их дурсгал бүхий соёлыг, энгүй их баялаг бүхий хөгжмийг дэлхийд таниулан, сурталчилж яваа Морин Хуурын Чуулгын хөгжимчид өөрсдөө санаачлан, хөгжмийн найруулгыг хийн, Монголын болон Дэлхийд танигдсан киноны хөгжмийг тоглосон онцлог бүхий энэхүү тоглолтоороо зөвхөн Морин хуурын чуулгын 20 жилийн түүхэнд төдийгүй Монголын соёл урлагийн салбарт нэгэн шинэ хуудсыг нээсэн юм. Монголын үзэгчдийн сэтгэл зүрхэнд нэгэнт хоногшин үлдсэн дэлгэцийн бүтээлүүдийн гайхамшигт аялгуунуудыг нэгэн дор, тэгэхдээ бүр "морин хуур"-ын 2-хон чавхдсаар хэрхэн эгшиглүүлж байгааг сонсоод сэтгэл хөөрч, Морин хуурын чуулгаар бахархахгүй байхын, тэдний хөгжимчдөд, удирдаач Ц.Батчулуун болон Д.Түвшинсайхан нарт баяр хүргэхгүй байхын арга байсангүй.
Үүнтэй төсөөтэй уран сайхны киноны хөгжмүүдийг тоглосон тохиолдол өнгөрсөн жил мөн л Улсын Филармонид Cinema Night нэртэйгээр тоглогдон, гэхдээ симфони оркестрийн хөгжимчид тоглон шуугиан тарьж, тасалбар нь олдохгүй үзэгчид овоорч, хэд хэдэн телевизийн сувгаар цацагдаж байсныг та санаж байгаа биз. Энэ удаагийн тоглолтын тасалбар ч эртнээс таамаглаж байсанчлан бараг 4, 5 өдрийн өмнө дуусан, 2хон удаа тоглоно хэмээгдэж байсан ньүзэгчдийн хүсэлтээр бүр 5 удаа болон сунгагдсан нь зүй ёсны төдийгүй сонгодог хөгжмөөр цангасан үзэгчдийн цангааг тайлж бүрэн чадсан, чадах, чадахуйц гайхалтай тоглолт болжээ хэмээн үзэгчийн хувиар би дүгнэмээр байна.
Тоглолт бидний сайн мэдэх "Алтан Өргөө" киноны хөгжмөөр эхлэнэ. Л.Мөрдоржийн энэхүү аялгуу морин хуурын чуулгын хөгжимчдийн чадварлаг тоглолттой хосолсноор таныг хэсэгхэн хугацаанд ч атугай мөрөөдлийн, үлгэрийн тэр нэгэн ертөнцөд аялуулах болно. Үүний дараа Японы хөгжмийн зохиолч Китарогийн бичсэн The Soong Sisters киноны хөгжим тоглогдсон. Магадгүй энд тоглогдсон хөгжмүүдээс бидний хамгийн бага мэдэх нь байж болох ч үзэгчдэд хүрснээрээ ч тэр, аялгуулаг байдал, дуугаралтаараа ч тэр аль ч тоглолтоос дутахгүй хөгжим байлаа. Үүний дараа миний хувьд, магадгүй тэнд ирж, Филармоний танхимын 260 суудлыг дүүргэсэн бусад үзэгчдийн бүгдийнх нь сэтгэлийн нандин бүхнийг бодогдуулж, мэдрүүлсэн, сэтгэлийн тэр утсыг нь хөндөж чадсан бүтээл "Мандухай Сэцэн Хатан" киноны хөгжим эгшиглэлээ. Н.Жанцанноров гуайн өөр нэг бүтээл "Мөнх Тэнгэрийн Хүчин дор" киноны хөгжмөөр энэ үдшийн тоглолт дууссан билээ. Энэ үдшийг түүнээс гадна Л.Мөрдорж, Б.Шарав, Г.Бирваа, З.Хангал зэрэг Монголын сод болсон, дахин давтагдашгүй гайхамшигт бүтээлүүдээрээ бидний сэтгэлд нэгэнт хадагдсан хөгжмийн зохиолчдын бүтээлийг Морин Хуурын Чуулга тоглосноос гадна дэлхийд зартай, хамгийн алдартай киноны хөгжим бичигчид болох Жон Уильямс, Энно Морриконе нар ч чимснийг энд онцолъё. Ялангуяа энэхүү тоглолтын нэр болон залагдсан Э.Морриконегийн бүтээл "Домог 1900" киноны Playing Love хөгжмийн бүтээлийг бидний сонсож дадсан төгөлдөр хуур, хийл зэргээс тэс өөрөөр гэхдээ тэднээс илүү гарна уу гэхээс дутахааргүйгээр эгшиглүүлсэн морин хуурын аялгуу энэ үдшийн бас нэгэн оргил нь байсан юм.

"У на ра У на ра" хэмээн жижигхээн хүүхдүүд солонгос үндэстний хувцастай дуулан, ард нь Морин хуурын чуулга Монголчуудыг нэг хэсэг байлдан дагуулж байсан тв-ийн олон ангит кино Тэ Жангым киноны хөгжмийг тоглосон нь бас нэгэн сюрприз нь байсныг дурьдахгүй байхын аргагүй. Энэ үдэш бүхэлдээ сюрпризээр дүүрэн, морин хуурын уянгалаг аялгуунд мансууруулсан, үнэхээр сонгодог бөгөөд тансаг үдэш байлаа.
Тоглолтын зохион байгуулалтын талаар төгсгөлд нь хэдэн зүйлийг бичихгүй бол алдас болох биз. Урьд өмнө ямар ч сонгодог тоглолтонд ажиглагдаж байгаагүй анхдагч хэмээн нэрлэж болохуйц хэд хэдэн зүйлсийг тэндээс ажиглаж болно. Хөгжим болгоны дундуур тусгай байрлуулсан дэлгэцэн дээр дараагийн тоглох хөгжмийн киноны сэтгэлд хоногшсон хэсгүүд гаран, улмаар нэр нь зарлагдан, морин хуурын чуулга тоглож эхлэх нь таны сэтгэлийг улам хөөргөх нь гарцаагүй. Мөн тоглолтын завсарлага болох 10 минутын үеэр Улсын Филармоний зүгээс цоо шинэлэг үйлчилгээ болох ундаа, жүүс, виногоор "үнэгүй" дайлах болно. Завсарлагааны үеэр үзэгчид хоорондоо тоглогдсон хөгжмийн талаар, хөгжимчдийн талаар, киноны талаар яриа өрнүүлэх боломжийг хангаж өгсөн нь тун ухаалаг бөгөөд үзэгчдэд хүрсэн үйлчилгээ тэнд хуран цугласан үзэгчдийн хүлээж авч байгаа хандлагаас харагдаж байлаа.
Та 2 цагийн турш зурагтаар үзэж, зөвхөн сонгодог хөгжмөөр сонсож байсан аялгуунуудыг тань хэрхэн морин хуураар тоглож болдгийг сонсох болно. Та 120 минутын турш хэрхэн хөгжим хэмээх хүний гараар, хүний оюунаар бүтсэн тэр гайхалтай бүтээл таныг бүрэн эзэмдэж, өөртөө уусгаж чаддагийг мэдрэх болно. Улсын Филармони, Морин хуурын чуулга энэхүү тоглолтоороо өөрсдийн чадвар бололцоо нь ямар өндөр болсныг харуулж, тоглолтыг ийм сайн зохион байгуулж болдог юм шүү гэдгээ үзүүлж чадлаа. Тэд үзэгчдэд амьдралын бүх л мэдрэмжийг мэдрүүлэн, бүх л сэтгэл хөдлөлийг амтлуулан, таныг дайлж, таны цангааг тайлах болно.
Та үзэж амжаагүй байгаа бол дахиад нэг боломж байна. 3 өдрийн турш дүүрэн үзэгчидтэй байсан энэхүү тоглолт 1-р сарын 29, 30-нд дахин 2 удаа тоглох болсныг энд дурьдахад таатай байна. Танд боломж байна, үзээгүй бол заавал үз гэж зөвлөмөөр байна, болдогсон бол шаардмаар байна!! Та хэзээ ч харамсахгүйг харин би баттай хэлж чадна.
2010.01.23

SoccerReview: 2010 оны ДАШТ-ыг шинжихүй /1-р хэсэг/

2010-01-12T22:53:00.001+08:00

Энэ жил хөлбөмбөгийн Дэлхийн Аварга Шалгаруулах тэмцээн болно. Хөлбөмбөг сонирхогчдын 4 жилийн турш хүлээсэн, мөрөөдсөн, ярилцсан тэр тэмцээн ӨАБНУ-д зохиогдох болно. Тэгвэл энэхүү тэмцээнтэй холбоотой өөрийн санаа оноо болон таамаглал, дүгнэлтээ блогтоо цувралаар оруулахаар зориглон, эхнийхээ нийтлэлээ хүргэж байна. Эхлээд хэсгийн тоглолтуудын буюу сугалааны тухай. Эхний 4 хэсгээс ямар багууд нь гарах, багуудын ерөнхий байдал болон боломж, сул тал, давуу талуудыг цухас дурьдан оруулсан болно.

А хэсэг
ӨАБНУ: Туршлагатай дасгалжуулагч К.Паррейрагийн удирдлаган дор нутаг дээрээ тоглх талбайн эздийн хувьд энэ тун боломжийн сугалаа байлаа. “Холбоодын Цом”-ын тэмцээний үеэр гайхалтай тоглолтыг үзүүлсэн тэд өөрсдийн дайчин бөгөөд эмх цэгцтэй довтолгооны хувилбаруудаа улам боловсронгуй болгож, хамгийн гол нь төгсгөлийг сайн хийвэл “гэрийн нохойн сүүл өөдөө” гэгчээр ямар ч амжилт үзүүлж болох юм.
- Таавар: Тэднийг хэсгээс гарсан байхад хэн ч гайхахгүй. Тэгээд ч ДАШТ-д талбайн эзэд доод тал нь хэсгээсээ шалгардаг гэдэг анхны тэмцээнээс эхлэн үйлчилсэн бичигдээгүй хууль биелэж болох юм.

Мексик: Тэд ямар ч тэмцээнд ямар ч амжилт үзүүлчих бүрэлдэхүүн, чадвартай баг байсаар ирсэн. Хэдийгээр тэд С.Эрикссоны удирдлаган дор тун хангалтгүй тоглосон ч шинэ дасгалжуулагч Х.Агуйррегийн хамтаар Gold Cup-д өөрийн гол өрсөлдөгч АНУ-г 5:0-ээр бут ниргэн түрүүлсэн билээ. Тэднийг хожих тийм ч амар байгаагүй, одоо ч “зөөлөн боорцог” лав биш.
- Таавар: Тэд эхний тоглолтоо талбайн эзэдтэй хэрхэн тоглохоос бүх зүйл шалтгаалах болов уу. Францад хожигдохгүй байж, Уругвайг хожих даалгавартай Африкийг зорих нь ч тодорхой.

Уругвай: Коста Рикаг нэмэлт тоглолтонд хожин байж шалгарсан Уругвайн шигшээг хэсгийн аль ч баг нь гол өрсөлдөгчийнхөө тоонд оруулаагүй байгаа болов уу. Гэсэн ч Д.Форлан зэрэг тоглогчид нь гялалзаж байгаа үед тэд эцсийн мөч хүртэл тэмцэж, хасагдах шатны төлөө тэмцэх ч үр дүн тэдний эсрэг гарах магадлал өндөр байна.
- Таавар: 2010 оны ДАШТ-аас тэд эрт хасагдаж болох юм. Анхны дэлхийн аваргад түрүүлсэн Уругвайчуудад дэлхийн хэмжээний супер од хэрэгтэй байна.

Франц: Шигшээ тэмцээнд тун маргаантай байдлаар шалгарсан тэдний хувьд шилдэг 32 багт багтсандаа л баяртай байгаа нь тодорхой. Дасгалжуулагч Р.Доменекийн хувьд хэсгээс шалгарахгүй байна гэдэг нь ажлаа өгнө гэсэн үг болохоор өндөр дарамтан дор байна гэж ойлгож болохоор. Тэд бусад өрсөлдөгчдөө бүгдийг нь хожиж чадахаар баг ч гэсэн өнөөдрийн формыг нь харвал хэнд ч хожигдчихож болох мэт. Тэд 2002 оны ДАШТ-д Уругвайтай мөн л А хэсэгт тааран 0:0-ээр тэнцэн, Т.Анри улаан хуудас авч байсан гашуун дурсамжаа мартаагүй байгаа нь тодорхой.
- Таавар: Хэдхэн сарын өмнө хэн нэгэн “Франц хэсгээс шалгарч чадахгүй” гэж хэлсэн бол бүгд түүнийг элэглэн шоолох байсан биз. З.Зиданаас хойш лидергүй мэт болсон тэдний хувьд энэ тэмцээн өөрсдийн алдагдсан нэр хүндээ эргүүлэн авах маш хүнд тэмцээн байх биз ээ.

B хэсэг
Аргентин: Д.Марадона хамгийн шилдэг эсвэл алдартай дасгалжуулагч биш байж болох ч түүний баг нь хэсгийнхээ лидер нь байтугай дэлхийн аваргын цомыг горилох хүчтэй өрсөлдөгч гарцаагүй мөн. Одоогоор дэлхийн хамгийн шилдэг хөлбөмбөгчин Л.Месси, хамгийн формтой байгаа хөлбөмбөгчдийн нэг Г.Игуайн гээд тэдний шилдгүүдийг бичвэл уртаас урт цуваа болно. Марадона өөрийн багийн гол асуудал болох хамгаалалтаа найдвартай болгох аваас хүчтэй өрсөлдөгч байж чадна.
- Таавар: Тактикийн сул тал болон сүүлийн үед үзүүлсэн хангалтгүй тоглолтууд нь тэднийг энэ хэсгийг тэргүүлэхэд саад болохгүй болов уу. Марадонад үндэсний баатраар ахин нэг өргөмжлөгдөх боломж байсаар.

Нигери: 1994 онд Нигери, Аргентин, Грек нэг хэсэгт ороход Нигеричүүд бөмбөг тоолон хэсгээсээ 1-р байраар шалгарч байжээ. Тэд өнөөдөр ч хэсгээ тэргүүлэхгүй юм аа гэхэд хасагдах шатанд шалгарах боломж байна. Залуусаар ихэвчлэн бүрдсэн Нигеричүүд өөрийн тивдээ байгаа давуу талаа ашиглан 2-р байрыг хүсэж байна. Магадгүй тэдэнд туршлага л дутах байх, гэхдээ энэ бол боломжгүй даалгавар биш.
- Таавар: БНСУ болон Грек хэрхэн тоглохыг нь тэдний хувь заяаг шийднэ. О.Мартинс формоо хадгалан, гоол оруулан, Микел хагас хамгаалалатанд лидерийн үүргээ гүйцэтгэх хэрэгтэй.

БНСУ: 2002 онд нутаг дээрээ үзүүлсэн гайхамшигт амжилтаа үзүүлэхийг хүсч байгаа нь тодорхой ч бодит байдал дээр энэ боломж тун бага билээ. Тэдний хувьд Европын аваргууд, Супер Бүргэдүүд болон дэлхийн хамгийн хүчирхэг багуудын нэгтэй таарна гэдэг тун хүнд сугалаа. Г.Хиддинк одоо байхгүй болохоор тэдэнд найдвар тун бага байна.
- Таавар: Хэдий тийм ч залуу тоглогчдод өөрсдийгөө харуулах боломж гарч ирж байгаа нь эргээд багийн амжилтанд нөлөөлж болох юм. Ялангуяа саяхан Азийн шилдэг залуу тоглогчийн шагнал хүртсэн, Селтиктэй гэрээ байгуулаад байгаа Ки Сун Ёонг.

Грек: Хамгийн уйтгартай хөлбөмбөг тоглодог шигшээ хэмээгддэг Грекчүүд түүхэндээ 2 дахь удаагаа л ДАШТ-д оролцох гэж байгаа нь сонирхолтой. Зохион байгуулалт, чанд хамгаалалтаар хэрхэн амжилтанд хүрч болдгийг Европын аварга болсноороо харуулсан О.Реххагелийн шавь нар тэр хэвээрээ байвал хэсгээсээ гарахгүй гэх газаргүй юм. Гэсэн ч тэдний эсрэг хэрхэн тоглох хэрэгтэйг бараг бүх мэргэжилтнүүд мэддэг болчихсон мэт.
- Таавар: Ихэнх мэргэжилтнүүд эрч хүчтэй довтолгоог эрхэмлэж тоглодог БНСУ, Аргентин, Нигерийн багуудын эсрэг тэдний хамгаалалт хүчин мөхөсдөнө гэж үзэж байна. Энэ бол тэдний хувьд хатуу сугалаа. Гэхдээ л 2004 онд ч гэсэн бүгд ингэж бичиж, ярьж байсныг санаарай.

C хэсэг

Англи: Хүн болгоны анхаарлын төвд үргэлж байсаар ирсэн Английн шигшээ хэсгийг тэргүүлэх гол фаворитоор нэрлэгдэж байна. Капеллогийн баг нөхөрсөг тоглолтуудад АНУ-тай хамгийн сүүлд тоглохдоо 2:0-ээр хожин, Словенийг ч торох юмгүй буулгаж авсан. Сүүлийн жилүүдэд хамгийн азгүй багаар албан бусаар өргөмжлөгдөөд байгаа тэдний хувьд хэсгийн тоглолтонд санаа зовох зүйл бараг байхгүй биз. Гэхдээ Капелло “Хэдийгээр амархан мэт цаасан дээрээс харагдаж байгаа ч тэндээс л асуудал учрах болно” гэж хэсгээ тодорхойлжээ.
- Таавар: Мөрөөдлийн гэмээр багтай ирэх Английн шигшээд олон хүн итгэл хүлээлгэж байгаа нь гарцаагүй. Хэрвээ хасагдах шатанд торгуулийн цохилт зэрэгтэй таарч азгүйтчихгүй бол Ф.Лампард, Д.Бекхэм, С.Жеррард зэрэг энэ цаг үеийн “домгууд” алтан цомыг өргөчихсөн зогсохгүй гэхийн аргагүй юм.

АНУ: Д.Бекхэм болон МLS /АНУ-ын Хөлбөмбөгийн лиг/ Америкийн хөлбөмбөгийг сүүлийн үед нэрд гаргасаар байна. Холбоодын цомын тэмцээний үеэр шуугиан тарьж, Испанийг мулталсан тэд энэ удаа Англитай таарчээ. 2002 оны ДАШТ-ын үеэр гялалзсан АНУ-ын багт 2010 онд түүнийгээ давтах, бүр давуулах боломж байна.
- Таавар: К.Демпси, Л.Донован нар формоо хадгалж чадах аваас тэдэнд хэсгийн 2-р байр хангалттай харагдаж байна. Зохион байгуулалттай хамгаалалт болон хүчтэй сөрөг довтолгоогоо тэд дэлхийд аль хэдийн мэдрүүлээд амжсан билээ.

Алжир: Египттэй хийсэн хүнд хэцүү 2 тулааны дараа Алжирыг хэн ч муу баг гэж хэлж зүрхлэхгүй болсон биз. Хамгийн сүүлд 1986 онд ДАШТ-д орсон нь тэдэнд давуу тал болж талбай дээрээ тоглож байгаа гэсэн сэтгэлзүйтэй оролцох Алжирын битүү морьдын тоглолтыг тааварлахад тун хүнд байна.
- Таавар: Тэд хэсгийн хамгийн сүүлд орохгүй л болов уу, гэхдээ тэр чинээгээрээ хэсгээсээ шалгарах боломж нь бага байх болно.

Словен: Дэлхийн чансааны 33-р байрт бичигдэж байгаа тэд энэ ДАШТ-д хамгийн том сюрпризийг үүсгэн оролцож байгаа баг билээ. ОХУ-ын залуусыг Г.Хиддинкийн хамт мулталсан тэднийг дутуу үнэлж огтхон ч болохгүй. Гэвч Англи тэднийг нөхөрсөг тоглолтонд зоволтгүй хожсон нь болон АНУ-ын форм зэргийг харвал хэсгээс шалгарах боломж тийм ч өндөр байхгүй.
- Таавар: Энэ удаа тэдэнд ямар нэг аз таарахгүй л болов уу. Тэднийг шуугиан дахин тарьж дараагийн шатанд шалгарна гэх ямар нэг үндэслэл үнэндээ алга. Магадгүй дарамтнаас хол, алдах юм байхгүй зэрэг нь сэтгэлзүйн давуу байдал бий болгож болох юм.

D хэсэг
Герман: Уламжлал ёсоор Германчууд энэхүү тэмцээний фаворит байх болно. Сугалаанд үргэлж азтай байдаг тэд энэ удаа тийм ч хялбар сугалаа татсангүй. Урьдчилсан шатны тоглолтуудыг харвал хамгаалалтаа сайжруулчихвал Герман машин төгс ажиллах боломжтой. И.Лёвоор удирдуулсан М.Баллак ахлагчтай немцүүдийг ямар ч зоригтон нь хэсгээс шалгарахгүй гэж хэлж зүрхлэхгүй биз ээ.
- Таавар: Том тэмцээний туршлага болон тогтвортой тоглолт, чанд зохион байгуулалт зэргийг нь харгалзан үзвэл эргэлзээгүй хэсгийг тэргүүлэх баг.

Австрали: Австраличууд энэ удаа харьцангуй хүнд шалгуурыг давж буюу Азийн бүсээс шалгаран ДАШТ-д оролцож байна. Лидерүүд нь Европт тоглодог ч А-Лигт багийн ихэнх масс нь харьяалагддаг учраас тэдэнд туршлагын асуудал яригдаж болох юм. Тэдэнд хэсгийнхээ аль ч багийн эсрэг тоглох эрч хүч, чадвар боломж байгаа ч хэтэрхий хүнд хэсэгт хуваарилагдсан мэт.
- Таавар: Герман хэсгээ тэргүүлнэ гэж үзвэл 2-р байрын төлөөх өрсөлдөөн маш ширүүн өрнөх нь гарцаагүй. Гэвч энэхүү тулаанд Австралийн шигшээ тэсч үлдэнэ гэж хэлэхэд тун хэцүү байна.

Серби: Тусгаар улсын хувиар анхныхаа ДАШТ-д оролцож байгаа Сербийн шигшээд маш олон чадварлаг тоглогчид бий. Хөлбөмбөгийн ертөнцөд хамгийн шилдэг залуусыг бэлтгэн гаргаж байгаа тэдэнд том тэмцээний туршлага дутагдах /ялангуяа Германы эсрэг тоглолтонд/ магадлал өндөртэй. Н.Видич хэдийгээр арын шугаманд байгаа ч хэсгээс шалгарахын тулд тэднээс маш өндөр ачаалал болон формыг шаардана.
- Таавар: Цаасан дээрх бүрэлдэхүүнийг нь харвал муугүй баг хэдий ч илүү биений хүчний тоглолттой болон туршлагатай багуудын эсрэг тоглоход хүч дутах бололтой. Хэсгээс шалгарах нь тэдний хувьд том амжилт, мэргэжилтнүүдийн хувьд том цохилт болох болно.

Гана: Өнгөрсөн ДАШТ-д үзүүлсэн эрч хүчтэй бөгөөд үзүүштэй тоглолтоороо өөрсдийгөө дэлхийд мэдрүүлсэн Ганын шигшээ урьд өмнө байгаагүйгээрээ хүчтэй бүрэлдэхүүнтэй энэ удаа ирж байна. Дээрээс нь Африкт болж байгаа тэмцээн гээд бодоод үзэхээр тэднийг энэ хэсгийн хамгийн хүчтэй өрсөлдөгчдийн нэг гээд хэлэхэд буруудахгүй болов уу.
- Таавар: М.Эссьен талбайн төвд өөрийн “үргэлж” үзүүлдэг тоглолтоо үзүүлж чадах аваас тэд хэсгээсээ шалгарна. Гэхдээ хэсгийн бусад багуудыг харвал нутаг буцах боломж бас чамгүй бий.

ҮРГЭЛЖЛЭЛ БИЙ

Баяртай, 2009 он минь!!!

2009-12-31T22:14:00.005+08:00

Шинэ он гарахад, хуучин онтойгоо салах ёс гүйцэтгэн, бүрмөсөн баяртай гэж хэлэхэд хэдхэн мөчийн хугацаа бидэнд үлдээд байна. Хүн бүхэн, хамт олон бүр, улс орон болгон үдэн буй ондоо хийж бүтээснээ цэгнэж, алдаж оносноо дүгнэн буй энэ мөчид Уундаа миний бие ч гэсэн хуучин ондоо Баярлалаа бас Баяртай гэж хэлэхээр энэхүү нийтлэлээ бичин сууж байна. 2009 он минь чи надад юуг үлдээгээд, юуг аваад явах гэж байна даа?
ХИЧЭЭЛ

2009 онд би 1-р курсээ төгсөж, МУИС-ийн ЭЗС-ийн ЭЗО2а ангид данстай оюутан боллоо. Өдөр шөнөгүй хичээлээ хийж, ядаргаанд ортлоо давтсан гэж худлаа хэлэхгүй ч тэгж хийсэн ямар ч оюутнаас дор орохгүйгээр мэдлэгтэй, туршлагатай, дүнтэй болсон гэж бардам хэлж чаднаа.
2-р курст ороод тавьсан зорилгодоо "бараг" хүрсэн гэж бодож байна. Эрдэм шинжилгээний хуралд оролцож үзэх байсан тэр зорилгоо бүр давуулан биелүүлж, шагналт байр эзэллээ. Менежментийн тэнхимийн ЭШХ-д Зоогийтойгоо хамт оролцож, бараг байр эзэлсэн нөхцөлд шүүгчдийн "ачаар" 5-р байр эзэллээ. Харин өөрийн ЭЗО-ын тэнхимийн ЭШХ-д Батзориг болон Өлзий нартай оролцон чамгүй шүүсээ шахуулсныхаа дараа 3-р байр эзэлсэн. Харин яг зэрэг болсон Маркетинг-ОУХ-ны тэнхимийн ЭШХ-д Бямбаа, Пүүжээ нартайгаа оролцон 2-р байр эзэллээ. Үнэндээ энэ бол маш том амжилт байлаа, дараа нь сургуулийн ЭШХ-д 2 илтгэлээрээ шалгарч оролцон 3-р байр эзэлсэн нь бүр мөрөөдлийн гэж хэлж болох амжилт байсан юм. Одоо хаврын ЭШХ-уудад бүр сайн орохыг хичээнээ...
СПОРТ
Хөлбөмбөгөөр @131dg багийнхаа хамтаар МУИС-ын аварга боллоо. Үнэхээр илүү нь байсан. МУИС-ын шигшээ багийн бүрэлдэхүүнд багтан Бүх Оюутны наадам, ДУУЛИАН тэмцээнүүдэд оролцлоо. Сагсан бөмбөгөөр анхныхаа медалийг ЭЗО-ийн багийн хамтаар тэнхимийнхээ тэмцээнээс авлаа. Хөлбөмбөгийн хувьд, мэргэжлийн гэсэн тодотголтой Батзаяагийн номны орчуулгын багт орж ажиллаа. "ХӨЛБӨМБӨГ" гэсэн сонинд нийтлэл бичин, хэд хэдэн дугаарыг хэвлүүлэн хүргэсэн, оны дараагаас дахин гарна гэж найдаж байна.
ТВИТТЕР
Твиттер гэж 08 онд нээсэн "гайтай" эдээ бүрэн хэмжээгээр нь ашиглаж, бүр тэрэндээ донтож, шүлэг хүртэл бичиж /@tulgaa-ийн хийсэн уралдаанд зориулан/, клуб хүртэл байгуулалцан /@bpurev, @MendOrshikh, @Tsegmee нарын хамтаар/, эрдэм шинжилгээний ажил хүртэл бичлээ. Зөндөө олон сайхан найзуудтай болсон гэж бодож байгаа, анх гарын таван хуруунд багтам хэдхэн Монголчууд бие биетэйгээ бичилцдэг байсан энэ оюунлаг талбар хэдэн мянгад хүрсэн гайхалтай амжилтанд хүрчээ. @urgoo-оос VIP тасалбараар шагнуулж, @caffetiamo-оос зөндөө зөндөө зайрмагны эрх аван, @Zoloogg-ээс ном, @tulgaa-аас rapidshare-ийн premium эрх, @N730-аас онц сонирхолт киногоор шагнуулж, @Rreya-тай ном солилцсон, @Ononjargal, @chimedee нартай хүүхдүүд дээр очсон гээд зөндөө дурсамжтай мөчүүд байлаа. Энд, твиттерт миний дурсамжтай, дурсгалтай, гунигтай, уйтгартай мөчүүдийн жиргээ бүгд түүх болон үлдэж байна...
ЗУНЫ АМРАЛТ
Зуны амралт маань тун дурсамжтай болж өнгөрлөө. Герман, Австри, Швед, Дани, Франц, Унгар гээд Европын орнуудаар "ганцаараа" үүргэвчээ үүрээд 1 сарын хугацаатай аялчихаад ирлээ. Урьд өмнө үзэж байгаагүй олон зүйлээ үзэж, харахыг хүсч байсан олон зүйлсээ харж, очихыг хүсдэг байсан олон газраа очиж үзлээ. Allianz аренад хөлбөмбөг үзэж, Луврын музейд Мона Лизаг шүтэж, Хунгарорингт Шумахертай уулзлаа. Гайхалтай, зугаатай, хөгжилтэй, дурсамжтай, сэтгэл хөдөлгөсөн сайхан аялал байлаа, БАЯРЛАЛАА!!!
КЛУБ
ЭЗС дээрээ хэдэн нөхдийн хамтаар NEST клубыг байгууллаа. Үйл ажиллагаа явуулаад удаагүй байгаа ч гэсэн одоо ямар ч ЭЗС-ийн оюутан сонссон, харсан, таньдаг дүр төрхийг бүрдүүлсэн гэж бодож байна. Чамгүй олон /жижиг гэлтгүй/ зүйлс хийж, сайн хамт олон бүрдсэн гэж бодож байна, гэхдээ бүх зүйл дөнгөж ЭХЭЛЖ байна, биднийг өшөө олон зүйл, ажил хүлээж байна. АМЖИЛТ!!!
131DG
131dg-ийнхэн, 1-р сургуулийн 2008 оны 11Г ангийнхан энэ жил одтой байлаа. Хэд хэдэн гишүүд маань гадаадад сурахаар явж, одоо нэлээн олон нь дахиад явах гэж байна. Бид өөр өөрсдийн сурч буй газраа үргэлж тэргүүлэгчид нь байж, шилдэг гэдгээ баталсаар явна. БИД ҮРГЭЛЖ ХАМТДАА, НЯМХҮҮ УЛААН...

Надад ганц л анги байдаг...Математик, хөлбөмбөгийн гүнзгийрүүлсэн сургалттай 11Г анги...Г.Зол-Эрдэнэ

ШИНЭ он гарахад 40 минут л үлджээ. Олон зүйлийг авч, олон зүйлийг олсон ч алдсан, буруудсан зүйл чамгүй байлаа. Зорьсон зорилгодоо /магадгүй хамгийн үнэтэй/ хүрч чадсангүй, хажуугаараа зүгээр л өнгөрөөчихлөө. Ямар ч итгэлгүй, ямар ч эрч хүчгүй, ямар ч идэвхгүй үеүд дэндүү их байлаа. Хэт бардаж, хэт сагсуурч явсан мөчүүд ч цөөнгүй. Гэхдээ энэ бүхэн надад туршлага болж, энэ бүхэн надад зарим зүйлсийг мэдрүүлж, мэдүүлээд л явж байна. Би улам бүр "хүн" болоход дөхөж байгаа гэдэгтээ итгэлтэй байна. Олон сайхан найзуудыг надад өгч, олон сайхан амжилтыг бэлэглэж, олон дурсамжит мөчүүдийг үлдээсэн 2009 он минь баяртай. 2010 минь, ТАВТАЙ МОРИЛ, Би чамайг хүлээж авахад, түүхээ бичихэд, амьдралынхаа нэгэн шинэ хуудсыг нээхэд бэлэн!!!

Би[д] хэн болчихоо вэ????

2009-12-16T01:56:00.004+08:00

Өөртэйгөө, бас өрөөлтэй хэсэг ярилцлаа. Хэсэг ч гэж дээ, нэлээн удаан, үгүй ээ, бүр дэндүү хурдан ярилцсан юм байна. Юуны талаар вэ гээч, зүгээр л өнөөдрийн талаар, бодит байдлын талаар хэсэг бодлоо, ярилцлаа. Ихэнх чинь яасан худлаа, ядчихсан юм бичдэг юм бээ, сүржин нөхөр вэ гэж бодох л байх, бодож ч байгаа биз. Уншихгүй байж болноо, угаасаа ойлгож байна.
Аав минь нэг үгийг байнга хэлдэг юм. "Хэн байснаа хэзээ ч битгий мартаарай" гэж. Хожим Энхтүвшин багшаас авахуулаад олон хүн хэлсэнсэн. Гэтэл сануулаад, сануулаад байхад нь би өөрийгөө хэн байснаа мартах шахжээ. Өөрчлөгдөөд байна шүү гээд хэлээд байхад нь, анхааруулаад байхад нь тоохгүй дэндүү удаан явжээ. Би гэмшиж байна!!!
---
Чиний нөгөө үхэх гээд байдаг KEANE чинь EVERYBODY'S CHANGING гээд дуулаад байдаггүй бил үү. Үзэл бодол, үйл хөдлөл чинь амьдралын нугачаанд, цаг хугацааны эрхээр өөрчлөгдөх нь гарцаагүй үзэгдэл биш гэж үү. Юундаа гэмшээд, матрын нулимс унагах гээд байгааг чинь ойлгохгүй байна!!!
---
Хүмүүс намайг янз бүрийн замаар зөндөө магтдаг. Жаахан бардаад хэлэхэд магтаал лав надад дутагдаагүй. Магтаалын араас гэхдээ улайран дайрдаг зангүйг минь бурхан гэрчлэх болохоор түүнийгээ тэгтлээ гайхуулаад явдаггүй. Гэтэл түүнийгээ огоороод, дэндүү ихэрхээд, тэр худлаа, эцсийн эцэст хоосон зүйлд живэх дөхжээ. Би харамсаж байна!!!
---
Сүртэй хийсэн юмгүй юм байж, гайхуулаад байх чадваргүйн байж юунд ингэж дүвчигнэнэ вэ? Магтдаг гэчихжээ, зүгээр л чамайг хошгоруулаад, сайн явахад чинь инээж, дагаж хөөргөөд байгаа юм биш үү? Толгой чинь эргээд байгаа бол эм уу, өвдөөд байгаа бол эмчид оч. Харамсаад байгаа бол зүүчихсэн байгаа багаа тайлаад бүхнийг хэлээч, өөрөөрөө байгаач...Даанч чи чадахгүй л дээ!!!
---
Найзууд минь намайг хааяа шүүмжилдэг, загнадаг, зэмлэдэг. Гэхдээ тэр нь арай л багадсан бололтой. Үнэн үг үргэлж хатуу байдаг, тийм болохоор сонсохыг хүсдэггүй байсан юм болов уу. Тийм ээ, тэгээд л айгаад, зугтаагаад байсан биз. Дэндүү дураараа, дэндүү эрх чөлөөтэй, дэндүү амиа бодож явжээ. Би ухаарч байна!!!
---
Хэн нэгний хэлснээр зугтаана гэдэг тийм зөв шийдвэр мөн үү? Зугтаагаад ч хэр хол явж чадах юм бэ? Худлаа дүр эсгээд, чадаж байгаа юм шиг царайлах тийм сайхан байна уу? Чадал чинь хүрэхгүй, бүх юм чинь, бүр бүх юм чинь жулдаж, багадаж байгаа чинь үнэн биз дээ? Хэдий болтол үнэнийг нуух гээ вэ?
---
Намайг Ундрал гэдэг. Найзууд маань, дотны хүмүүс маань Уундаа гэж дууддаг. 18 настай, МУИС-ийн ЭЗС-д ЭЗО-ын ангид сурдаг. 131dg-ийн гишүүн. Keane, Coldplay, Radiohead, Muse гээд бритпопоор өвчилсөн, Байерн, Германы шигшээ, Mavs, Avs гээд спортод татагдчихсан, Tвиттер, Msgr, Blog гээд зарим зүйлд донтчихсон нөхөр байсан!!!
- Уундаа байсан уу?
- Байсан...
- Уундаа байгаа юу?
- Мэдэхгүй...
- Уундаа байх уу?
- Байхгүй...
---
Хаягдчихлаа, жийгдчихлээ, эсвэл тоохгүй байна гэж гомдоллоод явахынхаа оронд яагаад тэгэх болов гэдгийг бодсон нь дээр биш гэж үү. Овоо босгоогүй бол шаазгай юунд суухав гэдэг шиг өөрөөсөө эхлээд алдаагаа хайсан нь дээр, үгүй гэж үү. Хүн харахыг хүссэн өнцгөөсөө бүгдийг харж чаддаг. Гэхдээ жинхэнэ харагдац нь арай өөр л байдаг мэт.
---
Уундаа нэг өдөр ингэж боджээ. Уундаа бодсноо зүгээр л биччихэж, өөрийнхөө тухай тэгээд л биччихэж. Уундаагийн бодсныг бусад нь уншаад шоолжээ, шоолон инээжээ, инээн доогложээ. Яагаад тэд инээсэн юм бол? Учир нь тэд өөрт нь ч нуугдаж буй тэр үнэнтэй нэгдэхийг, бодит үнэнийг хүлээн зөвшөөрөхийг хүсээгүй юм.
---
Худлаа дүр эсгэхээс залхахгүй байна уу? Өөрийгөө өрөвдүүлж ханахгүй байна уу? Залхуурч зүгээр сууж дуусаагүй л байна уу? Буруугаа өөрөөсөө зайлуулж өрөөлд чихэх тийм сайхан байна уу?.....
/...үргэлжлэлийг өөрөөсөө...эсвэл үргэлжлэл нь та өөрөө.../

Review: "2012 оноос ирсэн захидал" /уралдаанд/

2009-12-05T22:45:00.008+08:00

Блогтоо "Өргөө" кино театрын өөрийн твиттерээрээ дамжуулан зарласан зохиомжийн уралдаанд оролцсон захидлаа тавьж байна. Ойрд зөндөө шалтаг, шалтгааны улмаас юу ч хийж чадсангүй, ахиад ингэж удаан завсарлахгүйг хичээнэ ээ гэж....Магадгүй хэтэрхий сонин болчихсон байх л даа, гэхдээ л эзэндээ нэлээн "том" шагнал авчирсан нийтлэл байгаамдаа.../гэхдээ би одоог хүртэл тэмцээнд 1 л захидал очсон гэдэгт итгэсээр л байгаа хохо/. Уншаад сэтгэгдлээ үлдээгээрэй, анхааруулахад кинотой ямар ч холбоогүй шүү хэхэ...

....2012 оноос ирсэн захидал....
/эргэцүүлэмж/

ҮХЭЛ
...Тэндээс зөвхөн үхэл л үнэртэж байсан....
...Үхэл нь ханхалж буй хүмүүсийн аврал эрэн хашгирах чарлаан л сонсдож байсан....
...Чарлаж байсан хүмүүсийн тарчилж буй нь, амьдралын төлөө хэрхэн тэмцэж, амь гарах гэж чангааж, үхлээс зугтаах гэж оролдож буй нь мэдрэгдэж байсан. ...
Үлгэр бүхэн сайхнаар төгсөх ёстой гэж үү?

***

АМЬДРАЛ
...Инээмсэглэл тодруулсан харц тэнд дүүрэн байсан...
...Харцнаас нь ирээдүй гэрэлтсэн залуусын баясгалант амьдралыг харж байсан...
... Амьдрал үргэлжлэдгээрээ үргэлжилнэ гэдэгтэй санал нийлсэн нь, санаа нь амарсан нь, санаашрал нь арилсан нь, сэтгэл нь тайтгарсан нь анзаарагдаж байсан...
Амьдарч үзнэ гэдэг өөрөө агуу их аз завшаан биш гэж үү

***

ТАМ
...Үлгэрт гардаг там гэгч нь энэ үү гэмээр байсан...
...Энэ гэж үү гээд дуу алдмаар, дуу алдаад сэтгэлээр унамаар, сэтгэлээр унаад амиа хорломоор байсан...
... Амиа хорлож ч амжихгүй үхэлтэй нүүр тулгарч, зайлж зугтаж чадалгүй үхэлд баригдаж, залбирч мөргөсөн ч нэмэргүй үхэлд автаж байсан....
Хэн боловч хөгшрөлөөс болж үхдэггүй, хүн бүхэн амьдралаас болж үхдэг.

***

ДИВААЖИН
....Эцсийн эцэст хүн төрөлхтөн ялах нь тодорхой байсан....
....Дахиж айхгүйн тулд, дагжин чичирхгүйн тулд, хар дарсан зүүднээс сэрэхийн тулд диваажинг бүтээн байгуулж байсан...
...Бүтээн байгуулсан тэр диваажинд хүн бүхэн жаргалтай байж, мишээл тодруулан, баярлан хөөрч байхаар бүхнийг төлөвлөж байсан....
Хүн өөрөө өөрийнхөө бүтээсэн ертөнцдөө хамгийн аз жаргалтай байдаг.

***
***

2012 – Өөртэйгөө хүүрнэсэн бичил яриа
...Тэнд би үхэлтэй таарах ёстой гэж үү. Тэнд л би хүлээгээд байсан, хүсээгүй ч учрах, хэзээ нэгэн цагт гарцаагүй тааралдах “Үхэл” гэдэг андтайгаа уулзах ёстой байсан гэж үү....
--- Яагаад үгүй гэж? Боломжгүй зүйл гэж үгүй байнга хэлдэг биш гэж үү? Тэгтээ тэргүй үхэхээс хойш яагаад санаа зовох гэж, тэгээд ч “зовлонгийн түргэн нь дээр” гэдэггүй бил үү, та нар???
...Яагаад тэнд гэж? Яагаад бүр яг тэнд гэж? Өөр хэзээ нэгэн цагт, маргааш эсвэл нөгөөдөр, эсвэл минутын дараа биш 2012 онд гэж? Хэн нэгэн миний хувь тавиланг биччихсэн гэсэн үг үү?...
--- Яагаад гэдэг асуулт өөрөө эргэлзээтэй асуулт биш гэж үү? Яагаад чи үхэхийг тийм их хүснэ вэ, юунд чи гутран, шаналж энэ асуултыг асууна вэ? Цаг нь болохоор чи хариултыг нь мэдчих биш гэж үү? Цаг хугацаа бүхнийг харуулахгүй гэж үү?
...Тэр хэн нэгэн нь тэгэээд хэн юм бол? Бурхан уу, эсвэл бүр хүчирхэг зүйл юм уу? Цаг хугацаа өөрөө биднийг үхэл рүү минь аваачиж байгаа гэсэн үг үү? 2012 он үнэхээр сүүлчийн он юм бол түүнээс цааш цаг хугацаа гэж байх болов уу?
--- Бурхан байхгүй, явчихсан, өөрийнх нь хэрэг болох хаа нэг газар руу явчихсан гэдэг биш бил үү? Бурханг хэрэггүй ээ гээд, бурхны хэлснийг үл тоомсорлосон нь та нар биш гэж үү? Магадгүй бурхны одоо байгаа газарт л цаг хугацаа хэрэг болж мэдэх юм, үгүй гэж үү?
...Ганцхан асуулт. 2012 оноос хэрвээ жинхэнэ захидал ирвэл хэн нэгэн хариу бичих болов уу?
--- Бурхан чинь л мэдэг, магадгүй цаг хугацааг эзэмшиж байгаа хэн нэгэнд тийм аз тохиох байлгүй дээ гэж найдъя...

***

- ЭЦСИЙН ЗАХИДАЛ
...Та нар, бид, чи яагаад ярьсаар байгаад болгочихсон юм бол? Бүгд мэдэж байсан хэрнээ, бүгд анхаарч байсан хэрнээ, бүгд сонирхож байсан атлаа, бүгд сонжиж байсан мөртлөө яагаад юу ч хийгээгүй юм бэ? Сонин л юм, үнэхээр тэнд ямар нэг юм болохыг хэн нэгэн барин тавин мэдээд байсан юм бол бодитой анхааруулгыг яагаад үл хийсэн юм бол?
***
...Хүн, хүмүүс, хүн төрөлхтөн үргэлж цаг нь тулахаар эсвэл өнгөрсөн хойно нь амаа барих дуртай юм. Хэзээ ч засагдахааргүй, хэзээ ч буцаагдахааргүй, хэн ч янзалчихааргүй болчихсон байх үед нь эсвэл зассан ч, буцаасан ч, янзалсан ч нэмэргүй болчихсон хойно нь уулга алдахыг нь яана???
***

- ЭЭЛЖИТ ЗАХИДАЛ
...Аз болж юу ч болсонгүй гэж бүгд ярьж, хэлэлцэж, маргалдаж, мэтгэлцэж байна. Бурханы аврал гэж зарим нэг нь тэнгэртээ талархаж, миний л ач гэж зарим нь бардамнаж, худлаа цуу гэж зарим нь хэнхэглэж, би мэдэж байсан гэж зарим нь томорно. Хүн гэдэг ийм өчүүхэн амьтан бил үү?
***
...Аюул учраагүй ч, зөгнөл биелээгүй ч, хуанли дуусаагүй ч дахиад л нэг шалтаг, шалтгааныг хаа нэгтээгээс хэн нэгэн үнэмшилтэй нь аргагүй олоод, гаргаад, баримтжуулаад л ирнэ. Бүгд гайхна, гайхширна, сонирхоно, сониучирхана, шоглоно, дооглоно, итгэнэ, үнэмшинэ, хүснэ, мөрөөднө. Хүн гэдэг ийм л амьтан....

Төгсгөлийн оронд
Хэрхэх нь таны сонголт гэж би дуусгахыг хүссэнгүй. Харин хэрхэн төсөөлөх нь таны дур. Магадгүй биднээс үл хамаарах гай гамшиг гараад ирчих ч юм шиг, эсвэл биднээс болоод л энэ бүхэн болох гээд байгаа юм шиг надад санагдана. Бид мэдэхгүйгээ л мэдэж байгаа ч эргэлзээ, тээнгэлзээ зүгээр ч нэг ургаад гараад ирчихгүй мэт. Эсвэл олуулаа хийж байгаа буруу үйлдэл яг л зөв юм шиг харагддаг гэдэг шиг, эсвэл худал зүйлийг 1000 ярихаар үнэн болдог гэдэг шиг ч юм уу, SECRET дээр бичсэн шиг муу сэтгэлээс муу зүйл үүсдэг гэдэг шиг ярьсаар байгаад, бий болгож байгаагаа гадарлахгүй байсаар сүйрэлд хүрчихэж болох л юм. Үнэндээ үхлийг, төгсгөлийг хэн хүсэх билээ, тийм хувьгүй, тийм азгүй хүмүүс юм гэж үү. Би лав үгүй гэж хэлэхийг хүсч байна. Би лав төгсгөлийг биш, мөхлийг биш, хөгжлийг, сэргэлтийг, мандалтыг хүсч байна. Зөвхөн өөртөө ч биш, Монголдоо ч биш, хүн төрөлхтөнд, Дэлхийд өөрчлөлтийг хүсч байна. 2012 он дэлхийн сүйрэл биш сэтгэлийн сүйрлийн дохио байгаасай, тэр нь биелэх биш, ядаж биелэхэд тун дөхөөд буцаад сэргэчихээсэй гэж би хүснэ.
А.У : @uundaa

Гэр бүлийн зураг...

2009-11-02T21:18:00.005+08:00

Энэ бол манай гэр бүлийн зураг...Үүрд дурсах дурсамж, сэтгэлд үлдэх төрх....2009.11.01

BookReview: Жонатан Ливингстон хэмээх цахлай

2009-10-15T19:40:00.006+08:00

Ном унших би дуртай. Ном уншаад таашаал авдаг, баярладаг, сэтгэл хөдөлдөг, төсөөлдөг мөрөөддөг, бас уйлдаг, гутардаг, харамсдаг. Дэндүү зузаан ном харахаас залхуу хүрдэг нь үнэн ч аль болох унших ёстой номнуудыг уншихыг, бүр ядахнаа "тухай"-г нь уншихыг хичээдэг. Саяхан сэтгэл судлалын хичээлийн даалгавар дээр өгсөн ном уншсан тухай тэмдэглэл-эссегээ блог дээрээ тавьж байна. "Жонатан Ливингстон хэмэхэ цахлай" бол миний хамгийн дуртай, бас хамгийн их юм бодогдуулсан зохиолоороо тэр даалгавраа хийсэн юм. За тэгээд уншаад сэтгэгдлээ, өөрийн бодлоо үлдээнэ гэж найдаж байна, аа бас энэ бүхэн зөвхөн миний л бодол гэдгийг анхаараарай...

Төгс төгөлдөр хэмээх ойлголт бол уран зохиол хэмээх хүний сэтгэлийг “донтуулан” татагч гайхалтай урлагийн олон олон алдарт зохиолч, бүтээлчдийн гол сэдвүүдийн нэг байсаар ирсэн билээ. Оскар Уайлд “Дориан Грэйн хөрөг” зохиолоороо хүний үргэлж залуу, үргэлж эрчтэй байх төгс төгөлдрийн тухай гайхалтай уран хэлбэрээр, гэхдээ бас эмгэнэлтэй, сургамжтайгаар өгүүлсэн байдаг Зөвхөн тэр ч гэлтгүй Тройн дайн шалтгаан болсон үзэсгэлэнт Елена ч, нэр төрийн төлөө амиа золиослон буй агуу баатар Ахилл ч гэсэн, бүр цаашлаад Гамлет эсвэл Ромео, Цасхан эсвэл Наполеон гээд бүгд л төгс төгөлдөрт тэмүүлж, олж авахыг хичээж, оролдож байснаараа өөрсдийн орчиндоо, өөрсдийн зохиолдоо үүрд мөнх хадагдан үлдэж нэр алдрын цууд хүрсэн мэт.
Тэгвэл өнгөрсөн зууны 70-аад оны үед АНУ-ын зохиолч Р.Бахын бүтээсэн “Жонатан Ливингстон хэмээх цахлай” гэх жижигхэн зохиол бол чухам дээрх бүгдийг базан нэгтгэж, төгс төгөлдөрт тэмүүлсэн цахлайн эгэлгүй дүрээр хүн бүхний хүслэн болсон гэгээрэлд хүрэн, сэтгэлийн амар амгалангуйг хэрхэн эдэлж байгааг харуулснаараа уншигчдын дунд шуугиан тарьж байсан юм. Өөрийн тавьсан зорилгодоо тууштай байж, тэвчээр шантаршгүй зан чанараа хэзээд алдалгүй үнэнч байсныхаа ачаар мөнхийн хутагийг олон, агуу чадваруудыг эзэмшиж байгаа тэр цахлайн тухай уншснаар олон зүйлийн талаар та эргэцүүлэн бодох болно.
Амьдрал "хийх ёстой" зүйлсээр дүүрэн байдаг. Сурах дургүйг нь албадан сургаж, жүжиглэх дургүйг нь, тоглох дургүйг нь албан шахалтаар тоглуулна, жүжиглүүлнэ. Дургүй хувцас өмсгөж, дургүй хоол идүүлж, дургүй газар нь амьдруулна. ХИЙХ ЁСТОЙ гэж амыг нь таглана. Эдгээр зүйлс нь зарим хүний хувьд гашуун боловч ҮНЭН нь болж орхино. Түүний хувьд ҮНЭН бол идэх бас үхэх. Ерөөс зөвхөн түүнд ч гэлтгүй бүх л цахлайнуудын гол зорилго, амьдралын утга учир бол өдөр нь аятайхан хоолтой хонож, шөнө нь сүрэгтэйгээ амар тайван хонох. Бүхэл өдрийн турш, бүхэл сарын турш, бүхэл амьдралын турш нэгэн хэвийн уйтгарт амьдралаар амьдрахыг Жонатан цахлай хүссэнгүй. Үгүй дээ, тэр зүгээр л уйтгартай байна гэдгээ мэдэрч, ухаарч чадснаараа өөр зүйл рүү, гэгээн алс руу, мөнхийн амьдрал руу тэмүүлж эхэлсэн юм.
Ниснэ гэдэг түүний хувьд цахлайн амьдралаасаа олж авдаг цорын ганц таашаал байлаа. Улам өндөрт, дээшээ хөөрсөөр, хөөрсөөр шумбана. Тэр эхэндээ алддаг, гэмтдэг, унадаг, бусдын элэг доог болдог, ээж аавдаа, хамаатан садандаа загнуулж, зэмлүүлдэг. Гэсэн ч тэр шантраагүй, нисэх чадвараа сайжруулах гэж, бусад цахлайнуудын хийгээгүйг, хийж чадаагүйг, чадах гэж зүрхлээгүйг тэр хийхийн төлөө амьдралаа зориулсан. Хоол идэхгүй зөвхөн нисч л байсан, нисэх техникээ нэмсээр л байсан. Сүүлдээ бүр хөөгддөг, сүргээсээ шившигтэйгээр хөөгддөг. Зүгээр л бусдын хийгээгүйг, бусдын хувьд сонин санагддаг, эсвэл бусдын хувьд утгагүй, ямар ч учиргүй зүйлийг хийснийхээ төлөө ийн шийтгүүлдэг. Аль эсвэл хөөсөн сүргийн ахлагч нар нь түүнд атаархсан юм болов уу.
Тэр одоо ганцаараа, хэн ч байхгүй, анд нөхөр, гэр бүлийнхэн нь аль нь ч байхгүй. Орь ганцаараа, эцэс төгсөлгүй далайн дунд нисэн ниссээр. Ганцаараа байхдаа хүн амьдралын мөн чанарыг илүү ойлгодог гэдэг шиг тэр цахлай ч элдвийг эргэцүүлэн бодож, сэтгэж, зорилгоо ухамсарлан улам хөгжсөөр л. Сүүлдээ тэр өөрийнхөө юунд тэмүүлэн буй түүнд хүрсэн адилхан цахлайтай таарна. Тиймээ, тэр өөрийнхөө байх газрыг, өөрийнхөө анд нөхдийг олжээ. Эсвэл түүнийг тэд олсон юм болов уу.
Тэнд нэгэн зорилготой, нэгэн тэмүүлэлтэй, нэгэн санаатай олон цахлайтай тэр уулзана. Одоог хүртэл төгс төгөлдөрт хүрэхийг төлөө, төгс нисэхийн төлөө, төгс шумбалтын төлөө зорин яваа Жонатаны яг л байх ёстой газар нь тэр байсан ажээ. Түүнийг л хүлээж байсан мэт нэгэн цахлай зөвхөн түүнд өөрийн авьяас чадвараа зааж өгчихөөд амар амгалангуйн орон луу хаашаа ч юм алга болдог. Үхэл гэж чухам ийм л энгийн атлаа агуу зүйл ажээ. Чухам хэний ч амьдрал утгагүй байдаггүй, ямар ч явдал зорилгогүй байдаггүй, хэзээ нэгэн цагт, хэн нэгэнд хэрэгтэй байдаг нь, түүнийгээ тэр хэн нэгэн нь эрэлхийлж байдаг гэдгийн энгийн нэгэн гаргалгаа нь энэ байсан ажгуу.
Одоо Ливингстон ниснэ гэдгийг тултал нь хөгжүүлж чаджээ. Өөр ямар ч цахлайн хийж чадаагүй, хийж зүрхлээгүй, эсвэл бодож сэтгэж ч чадаагүйг тэр одоо зовохгүй, торохгүй хийж чадна. Бүр давраад тэр хүссэн газар луугаа шилжиж чадна, бүр хоромхоны төдийд шүү дээ. Хамгийн сайшаалтай нь, хамгийн магтууштай нь тэр огт өөрчлөгдсөнгүй. Төгс төгөлдрийн туйлд хүрсэн мэт зохиолчид ч санагдаж байсан биз, надад ч тэгж санагдсан, танд ч тэгж санагдах байсан нь гарцаагүй. Гэсэн ч тэр бууж өгсөнгүй, зогссонгүй, эцэс төгсгөлгүй тэмүүлсээр, хаашаа ч юм эсвэл юу руу ч юм тэмүүлсээр байлаа. Дараагийн зогсоол нь бусдад мэдлэгээ түгээх байсан аж.
Зохиол түүний хэрхэн шавьтай болж, түүндээ хэрхэн зааж сургаж, хэрхэн хөгжүүлж байгаа тухайгаар дуусдаг. Гэхдээ тун гэгээлгээр хэрнээ бас л маргаантай дуусдаг. Флечер хэмээх тэр цахлайн сүүлийн асуулт зохиолын бүхэл утгыг харуулсан агуу хэсэг гэж би боддог.

“ЖОНАТАН, Тэгээд хязгаар гэж байдаггүй юм биз дээ” гэж нэгэн цахлай түүнээс асуулаа.

Аймшигтай өгүүлбэр биш гэж үү. Нэгэн цагт Сократ мэдлэгийн тухай өөрийн шавь нартаа тойрог зуран зүйрлэж байсан тухай домгийг мэддэг шиг хүний сурах, хүний зорих зүйл хязгааргүй байх учиртай юм. Хүний амьдрал чухам ийм байж гэмээнэ утгатай байж, эцэст нь эргээд харамсахааргүй өнгөрөх боломжтой мэт.
Тиймээ, Хязгаар гэж байдаггүй, үүнийг надад Ливингстон ойлгуулсан. Шантрашгүй зан, тэвчээр 2 амжилтанд хүрэх гол түлхүүр юм гэдгийг ч надад мэдрүүлсэн. Түүний нисэх их хүслээ хэрхэн биелүүлж хэрхэн агуу нисгэгч болж байгааг, ямар их саад тотгор, хөндлөнгийн нөлөөг юу ч үгүй даван туулж байгааг харсан, уншсан хэн ч чухам үүнийг ойлгох учиртай. Аливаа зүйлийг тултал нь хөгжүүлж, төгс төгөлдөрт тэмүүлэх тэр хүслээ хэзээ ч орхихгүй байж чадвал хэн ч бидний бурхан гэж нэрлэдэг тэр зүйлийн зэрэгт хүрч чадна.
Амьдралыг утгагүй гэдэг Catcher in The Rye-ийн зөрүүд хүүхэд шиг, эсвэл амьдрал нь Замзагийн хүслээр болж шавж болон хувирсан өрөвдөлтэй Кафкагийн баатар шиг, бүр наашлаад Улиссест амьдраад байгаа мэт сэтгэж явсан таныг энэ зохиол бүрнээ өөрчилнө. Огиудас чинь хүрэхээ больж, утгагүй амьдрал учиртай болно.
Монгол хэл дээр энэ зохиолыг Н.Энхбаяр орчуулсан байдаг. Харин Р.Бах энэ зохиолыг бодит амьдрал дээрх Ж.Ливингстон хэмээх онгоцны нисгэгчээс сэдэвлэсэн гэдэг. Чухам экзистенциалист сургаалын “Ямар ч тэнгэрлиг шинжгүй, ямар ч гэгээлэг талгүй. Хүний оршихуй гэдэг бол угаас хоосон, оргүй зүйл юм.” Гэдэг энэ үзлийг тас цохиж чадахаар бодлыг надад төрүүлсэн.
Төгс төгөлдөрт тэмүүлсэн тэр хүслийнхээ ачаар бусдаас түрүүлж, хол тасарч сэтгэсэн тэр цахлайн амьдралыг хүнтэй зүйрлүүлэн нэг бодоод үзээрэй. Магадгүй буддизмын үзэл санаа, гэгээрэл, бясалгалд хүрэхүй зэрэг танд санагдах болно.
* * *
Жонатан Ливингстон хэмээх цахлай амьдарч байжээ. Тэр зүгээр л буруу газраа, буруу цагтаа байсан учраас бусдад ад үзэгджээ. Гэхдээ тэр амьдралыг өөр нүдээр, гэхдээ зөв нүдээр хардаг байсан юм. Учир утгагүй нэгэн хэвийн амьдралаас уйдаж, төгс төгөлдөр лүү тэмүүлэн, сэтгэлгээний эрх чөлөөт, хэнээс ч хараат бус тэр нийгмийг тэр хүссэн юм. Түүндээ хүрэхийн тулд хөдөлмөрлөсөн, зүтгэсэн, тэгээд ч чадсан, амжилтанд хүрсэн. Сэтгэлийн агуу их хүчээр, чадна гэсэн, хүрнэ гэсэн дуусашгүй их тэмүүллийнхээ ачаар тэр цахлай гэгээрлийг, мөнхийн амьдралыг олжээ. Түүнд одоо чадахгүй юм байхгүй, үлдээгүй ч гэсэн түүнийгээ ганцаараа хэрэглэхийг хүссэнгүй. Тэр шавиа олж, олсон мэдлэгээ түгээж эхэлжээ. Байгаадаа сэтгэл хангалуун амьдрах, хэн байснаа хэзээд үл мартах гэдэг энэ ажээ. Хамгийн энгийн зүйл л хамгийн агуу байдаг. Гетегийн “Фауст” дээрээ хэлсэн шиг “Эхлээд хөдөлмөр” л байж шүү дээ.
“Хэн бүхний дотор орших Жонатан Ливингстон цахлайд зориулав” гэж номын эхэнд байдаг. Тэр цахлай хэдийгээр номын хуудсан дээр ч гэсэн чадсан юм чинь, бид яагаад чадахгүй гэж. Эзэн хичээвэл заяа хичээдэг биш гэж үү. Хүний хүсэл хязгааргүй ч хязгааргүйд одох зам ганц.

SportReview: Рио Де Жанейрод 2016 оны олимп зохиогдоно!!!

2009-10-03T01:44:00.008+08:00

Дэлхий нийт хэдхэн цагийн өмнө Данийн нийслэл Копенгаген луу анхаарлаа хандуулан, тэндээс гарах түүхэн шийдвэрийг хүлээн, тэвчээртэй ажиглаж байлаа. Чухам тэнд хуралдсан ОУОХ-ны чуулганаар 2016 оны Зуны олимпийн наадмыг зохион байгуулах улсыг тодруулах учиртай байсан юм. Өмнөх шатнуудын сонгон шалгаруулалтаас үлдсэн 4 нэр дэвшигчид болох АНУ-ын Чикаго, Бразилын Рио Де Жанейро, Испаний Мадрид, Японы Токио хотууд энэ өдөр бүтэн баг, ард иргэд, дэмжигчидтэйгээ хамт эцсийн дайралтаа хийхэд бэлэн болсон байв.Данийн нийслэлд болсон ОУОХ-ны 121 дэх удаагийн чуулга уулзалтын хамгийн оргил мөч нь ОУОХ-ны ерөнхийлөгч Ж.Роггегийн олимпийн нийслэлийг тодруулах мөч байлаа. Өмнөх 2 шатны санал хураалтаас Бразилийн Рио Де Жанейро болон Испаний Мадрид хотууд тунан үлдээд байсан юм. Олонх хүний таамаглаж байсанчлан Рио Де Жанейро хүчтэй өрсөлдөгч, финалд үлдэн, цаашлаад эрх авах хамгийн боломжтой нэр дэвшигч байсан бол Мадрид хот хэдийгээр оутсайдер байгаагүй ч энэ хүртэл гарч ирсэнд нь гайхах хүн олон байлаа. Ингээд сэтгэл догдлуулсан мөч ирж, Ж.Рогге "Рио Де Жанейро" хотыг олимпийн нийслэлээр зарласнаар галт бамбар түүхэндээ анх удаа Өмнөд Америкт бадамлахаар боллоо. Санал хураалтын дүнгээр 66:32 буюу хол тасархай саналын зөрүүгээр Бразилчууд ялж Зуны Олимпийн 31-р наадмыг Паралимпийн наадамтай хамт зохион байгуулах эрхийг авсан юм.
2008 оны 6-р сарын 4-нд эхний шатны шалгаруулалт явагдсан гэж хэлж болно. 2007 оны 5-р сараас хойш нэр дэвшихээ албан ёсоор илэрхийлэн, шаардлагатай бичиг баримтыг бүрдүүлсэн 7 нэр дэвшигчээс Азербайжаны Баку, Катарын Доха, Чехийн Прага хотууд хасагдан дээрх 4 улс үлдээд байсан билээ. Өнөөдрийн үйл ажиллагааны гол хэсэг нь багуудын танилцуулга байсан. Хэр үнэмшилтэй, хэр сэтгэл хөдөлгөсөн, хамгийн гол нь яагаад Олимпийн наадмыг энд зохиох ёстой вэ гэдгийг товч бөгөөд тодорхойгоор гэхдээ уран чадварлагаар илтгэсэн баг ялалт байгуулах боломж нэмэгддэг билээ. Мөн олимпийн хорооноос гаргасан тусгай зөвлөлөөс хотуудаар зочлон, бэлтгэл ажилтай танилцан, барилга байгууламж, туршлага, нийтийн тээвэр, орчин, санхүүжилт зэрэг хэд хэдэн үзүүлэлтээр үнэлэлт өгдөг бөгөөд энэхүү үзүүлэлтээр Токио /8,3/ тэргүүлэн, Мадрид /8,1/ удаалж, Чикаго /7,0/, Рио Де Жанейро /6,4/ нар сүүл мушгиж байсныг тэмдэглэсэн нь зүйтэй болов уу.

1-р шат: ЧИКАГО - 2016
Хамгийн эхний танилцуулгыг АНУ-ын баг хийсэн. Ерөнхийлөгч Б.Обама болон тэргүүн хадагтай М.Обама нар өөрсдийн төрөлх хотоо дэмжин үгээ хэлж, О.Уинфри болон М.Фелфс нарын алдартнууд болон улс төр, бизнесийн маш хүчтэй фонтой тус багийг энэ удаа ялагчаар тодрох хамгийн өндөр боломжтой хэмээн шинжээчид үзэж байсан билээ. Чикаго хот өмнө нь 1904 оны Олимпийн наадмыг зохион байгуулах эрхийг авч байсан ч Сент Луйс хотод зохиогдож байсан Дэлхийн Үзэсгэлэнтэй зэрэгцүүлэн зохиохоор шийдэн Чикаго хоосон хоцорч байлаа. Харин АНУ-ын хувьд хамгийн сүүлд Атлантын олимпийг 1996 онд зохион байгуулсан юм.
Чикагогийн хамгийн давуу тал нь спортыг дэмждэг, аятай нөхцөл нь байсан. Мэргэжлийн спортын бүх төрлүүд буюу NBA, NHL, NFL, MLS, MLB гээд бүх багууд байдаг цөөхөн хотуудын нэг. Дээрээс нь хотын нийтийн тээврийн үйлчилгээ болон санал болгож байгаа хөрөнгө оруулалтын хэмжээгээрээ бусдаас илүү байлаа. Мөн ОУОХ-ны хувьд телевизийн эрхийг зарахтай холбогдуулан гарах ашиг АНУ-д зохион байгуулвал бусад хотуудаас илүү гарах судалгаа ч байсан.
Чикагогийн унаган иргэн АНУ-ын ерөнхийлөгч Б.Обамагийн хийсэн илтгэл уул нь гайхалтай байсан, яаж ярьдаг гэдгийг, яаж ятгадаг гэдгийг яруу тодоор харуулсан ч эрхэм ерөнхийлөгч маань тэргүүн хадагтайн хувьд Копенгагенд 5хан цаг саатах хуваарьтай байсныхаа гайгаар санал хураалтын дүн гарахаас өмнөхөн хурлын танхимыг орхин уур амьсгалыг тэр чигт нь эргүүлж орхилоо. Нэгэн гишүүний хэлснээр "энэ бүхэн биднийг үл хүндэтгэсэн сэтгэгдлийг төрүүлсэн" бололтой.
Эхний шалгаруулалт Чикагийн хувьд, Б.Обамагийн хувьд үнэхээр ичгүүртэй ялагдал байлаа. Ялагдсан ч эхний шатанд, хамгийн бага саналтай ялагдаж хамгийн төсөөлөөгүй үр дүнг ОУОХ-ны гишүүд гаргав. Эхний шатнаас хасагдсан нэр дэвшигч: Чикаго.
1-р шатны санал хураалтын дүн:
Мадрид: 28 санал
Рио Де Жанейро: 26 санал
Токио: 22 санал
Чикаго: 18 санал

2-р шат: Токио - 2016
2006 оны 8-р сард Японы Олимпийн Хорооны шийдвэрээр Фукуоко хотоос Токиог илүүд үзэн Олимпийн наадмын төлөө нэр дэвшүүлэхээр болсон. 1964 оны Зуны олимпийн наадмыг зохион байгуулж байсан учраас тэдэнд шинээр 2-хон цэнгэлдэхийг барин, бусдыг нь сэргээн засварлах байдлаар барих төсөл байсан учраас бараг хамгийн найдвартай газар нь болоод байлаа. Дээрээс нь иргэдийн зүгээс дэмжлэг тун өндөртэй төдийгүй 4 тэрбум долларын санхүүжилтийн асуудал шийдэгдсэн, хамгийн гол санаа зовоож байсан ногоон байгууламжийн асуудлыг ч шийдвэрлэх арга олсон тухайгаа мэдэгдээд байсан юм.
Японы шинэхэн ерөнхий сайд, ажлаа аваад 2хон долоо хонож байгаа Юкиёо Хатояамагаар удирдуулсан багийнхны танилцуулга Чикагийн дараа болсон. Харамсалтай нь тэдний багийнхан "Япончууд дуулах дуртай, та тэнд очоод хүссэнээрээ Караокэдэж болно", "Номхон далай Олимпийг хүсч байна" зэргээр хэтэрхий сэтгэлийн хөөрөлтэй, чанга дуугаар төгсгөсөн илтгэлүүд, дээрээс нь тийм ч сайн биш дуудлагатай англи болон франц хэлнийхээ гайгаар, хамгийн гол нь дөнгөж өнгөрсөн жил л Азид, Бээжинд олимп зохиогдоод байсан учраас олонхийн саналыг авч дөнгөсөнгүй, 2-р шатнаас хасагдлаа.
2-р шатны санал хураалтын дүн:
Токио: 20 санал
Рио Де Жанейро: 46 санал
Мадрид: 29 санал

Сүүлийн шат: Мадрид - 2016
2012 оны Олимпийн наадмын эрхийн төлөө Лондонд ялагдсан тэр өдрөө л хотын дарга нь дараагийн наадмын төлөө өрсөлдөнө гэдгээ зарласан, тэр ч ёсоороо албан ёсоор өрсөлдөх эрхээ авсан. Өмнөх шалгаруулалтын үеэр ажиллаж байсан учраас барилга байгууламжийн асуудал болон санхүүжилтийн тал дээр санаа зовох зүйл бага байлаа. Харин хамгийн давуу тал нь хотын иргэдийн дэмжлэг байсан бөгөөд нийт иргэдийн 85 хувь нь дэмжиж байгаагаа илэрхийлэн, 60 хувь нь ялна гэдэгт нь итгэлтэй байгаагаа мэдэгдсэн нь нэр дэвшигчдээс хамгийн өндөр дэмжлэгтэй хотод тооцоход хүргэж байсан юм.
ОУОХ-ны ерөнхийлөгчөөр 21 жил ажилласан, спортын ертөнцийн хамгийн нэр хүндтэй эрхэмүүдийн нэг Х.А.Самаранч, түүний хүү бага Самаранч болон Испаний эзэн хаан, ерөнхийлөгчдөөс авахуулаад эзэн хааны багийн ахлагч Рауль тэргүүтэй тус багийнхныг 2-р шатыг даваад гараад ирэхэд гайхах хүн олон байлаа.
Үүнд Х.А.Самаранчийн хэлсэн үг шууд нөлөөлсөн нь тодорхой. Тэрээр илтгэлдээ "Би өөрийнхөө цаг ойртож байгааг мэдэж байна. Түүнээсээ өмнө төрсөн нутагт минь Олимпийн наадам явагдах болохыг мэдвэл их л таатай байхсан, үзэхгүй юмаа гэхэд итгэлтэй байхын тулд" гэсэн утгатай үг хэлсэн нь танхимын уур амьсгалыг бүрэн эргүүлэх шиг болсон юм.
Гэсэн ч Мадридчууд финалын шалгаруулалтанд Рио Де Жанейрод бут ниргүүлэн хасагдлаа. Ер нь ч түүх тэдний талд байсан гэж хэлж болно, 48 онд Лондонд 52 онд Хельсинкд олимп зохиогдсноос хойш 2 олимп дараалан нэг тивд Олимп зохиогдоогүй, 2012 онд зуны олимп Лондонд, 2014 оны өвлийн олимп Сочид зохиогдох учраас магадлал тун бага байлаа. Магадгүй 2020 он тэдний хувьд зөв сонголт байж болох, Мадридчууд тун сайн ажиллалаа.
Эцсийн санал асуулгын дүн:
Мадрид: 32 санал
Рио Де Жанейро: 66 санал

2016 оны Олимпийн нийслэл: Рио Де Жанейро
Бразилчууд 2014 оны Хөлбөмбөгийн ДАШТ-ыг зохион байгуулах бол 2016 онд нь Зуны олимпийн наадмыг хийхээр болж байна. Өмнө нь 4 ч удаа /1936,1940,2004,2012/ нэр дэвшээд ялагдаж байсан тэд энэ удаа маш хүчтэй өрсөлдөгч байлаа. Бразилчуудын эдийн засгийн өсөлт, санхүүжилтын баталгаатай байдал болон төрийн дэмжлэг энд хамгийн чухал нөлөөтэй байлаа. Дээрээс нь өөрсдийн илтгэлийн үеэр Ази, Европ, Хойд Америк л ээлжлэн зохион байгуулдаг нь шударга бус байна гэсэн утгатай хэлсэн үг нь тэдний энэхүү амжилтын үндэс болсон гэдэгт эргэлзэх хэрэггүй. Мэдээж дэлхий нийт шинэ зүйлийг, шинэ орчныг, шинэ ард түмнийг, шинэ наадмыг хүлээж байсан, тэр сонголтонд хамгийн тохирсон хот нь яах аргагүй Рио Де Жанейро байлаа. Хөлбөмбөгийн домог Пеле нулимсаа барьж чадалгүй уйлж, Рио Де Жанейрогийн наран шаралгын газар цугларсан олон нийт баярлалдан хөгжилдөн, үндэсний бүжгээ хийн, яг одоо Бразилчууд баяр хөөрийн байдалтай байгаа нь гарцаагүй юм.
2016 онд 8-р сарын 5-аас 21-ны өдөр дэлхийн энх тайвны бэлэг тэмдэг болсон, спортынхны хамгийн оргил мөч олимпийн наадмаар Рио Де Жанейрод уулзацгаая, Бразилын дэвжээ Монголчуудад ээлтэй байх болтугай. Монголд маань олимп зохиогдох цаг удахгүй ирнээ гэж найдъя.

TwitReview: Монгол дахь Caffe Ti-amo-ийн жишээ.

2009-09-27T21:57:00.006+08:00

Энэхүү нийтлэлийг Монголын Твиттерчдын клубын блог дээр бичсэн, түүнийгээ өөрийнхөө блог дээр тавьж байна. Твиттерийг ашиглан хэрхэн бизнесийн болон маркетингийн үйл ажиллагаа явуулах талаар манай клуб өмнө нь бичиж байсныг хэрэглэгч та санаж байгаа биз ээ. Тэгвэл Твиттерийг ашиглан хэрэглэгчдээ татаж, бизнесээ өргөтгөх, үйл ажиллагаагаа явуулсан Монголын анхны үйлчилгээний байгууллага болох Caffe Ti-Amo-ийн талаар, тэдний туршлагын талаар та бүхэнд хүргэж байна. Хэрвээ та анзаарсан бол сүүлийн хэдэн өдрийн хамгийн эрэлттэй, хамгийн хүлээлттэй хайштаг нь #taavar байсан гэдэгтэй санал нийлэх биз ээ. Анх @Zoloogg болон @orgii нарын санаачлан эхлүүлсэн энэхүү хайштагийг ашиглан Монгол дахь үйлчилгээний байгууллагуудын төлөөллүүдээс хамгийн анх Caffe Ti-amo маркетингийн бодлогоо хэрэгжүүлж эхэлсэн юм.

Өдөрт нэг удаа таавар тавьж, ялагчдыг 10,000.₮-өөр өөрийн кафегаар үйлчлүүлэх эрхээр шагнасан тус @tiamocafe-ын #taavar-т оролцоогүй, оролцохыг хүсээгүй хэрэглэгчид байхгүй байсан болов уу. Тэр хэрээрээ Монголчуудын твиттер бичлэгийг нэгтгэх зорилготой бий болгосон олон хайштагуудын нэг #taavar-ийн хэрэгцээ, эрэлт ихэсч, хамгийн сонирхолтой, хамгийн өргөн хэрэглэгдсэн хайштаг болоход мөн л тус байгууллагын явуулсан энэхүү таавар хамгийн том түлхэлт өгсөн нь гарцаагүй.
Тус байгууллагын талаар зарим нэгэн мэдээллийг энд өгөх нь зөв байх гэж бодож байна. Caffe Ti-amo нь 2008 оны 4-р сарын 1-нд нээгдсэн, нээлтээ хийгээд удаагүй байгаа ч гэсэн өөрсдийн урин дулаан үйлчилгээ, тохилог, сэтгэл татам орчин бүрдүүлсний дээр санал болгож байгаа амтлаг, чанартай үйлчилгээнүүдийнхээ ачаар байнгын хэрэглэгчидтэй болж, уулзалт, болзооны хамгийн тохиромжтой газруудын нэг болж чаджээ. Энэ кафе нь 20 гаруй нэр төрлийн байгалийн цэвэр бүтээгдэхүүнээр хийсэн тарга багатай Итали зайрмаг буюу желатог та бүхэнд өдөр бүр санал болгож байна.
Тэдний явуулсан нийт 9 удаагийн тааварт твиттерийн 30 гаруй хэрэглэгчид идэвхтэй оролцон, ур ухаан, мэдлэг чадвар, овсгоо самбаагаа сорин өрсөлдсөн билээ. Энэхүү тааврыг явуулж байх хугацаанд өөр олон олон хэрэглэгчид, гадаадад байгаа твиттерчид @tiamocafe-д хандан талархснаа илэрхийлж, үйлчлүүлж байсан тухайгаа, очоод заавал очно гэдгээ илэрхийлж байсныг дурьдах хэрэгтэй.

Өдрөөс өдөрт хүрээгээ тэлсээр байгаа Монголын твиттерчдийн гэр бүлд бүртгэлтэй 1000 гаруй хэрэглэгчээс багаар бодож 500 хүн нь тус кафены талаар бага ч гэсэн мэдлэгтэй, мэдээлэлтэй болсон гэдэгт итгэлтэй байна. Тэд өөрсдийн хэчнээн танилдаа, тэр танилууд нь бас хэчнээн найзууддаа энэ тухай ярьсан бол гэхээс твиттер маркетингийн бодлогын үр ашигтай талыг тооцож болох биз. Бидний дээр дурьдсан, @tiamocafe-ийн авч хэрэгжүүлсэн энэхүү чадварлаг бодлого, туршлага өөр олон үйлчилгээний, бизнесийн байгууллагуудад үлгэр жишээ өгч, цаашид явуулах бодлогынх нь үндэс болноо гэж найдаж байна. Энэхүү нийтлэлээрээ бид нийт хэрэглэгчдийнхээ өмнөөс, нийт оролцогчдынхоо өмнөөс албан ёсоор БАЯРЛАЛАА гэж @tiamocafe-д хэлэхийг бас зорьсон билээ.
Твиттер хаяг: @tiamocafe
Веб хаяг: http://tiamo.delhii.net/
Зургийн цомог: Твитпик

Эцэст нь өөрийн тус кафегаар үйлчлүүлсэн тухай бичвэл илүүдэхгүй байх гэж бодож байна. Миний хувьд энэхүү тааварт амжилттай оролцон, 2 удаа ялагчаар тодорч, түүнийхээ шагналаар зайрмаглах боломжтой болсон юм. Хэдийгээр би зайрмагны шинжээч, шүүмжлэгч биш ч гэсэн, зайрмагны хорхойтон, хоббитой хүний хувьд тус кафед боломжит 5 онооноос 5 оноо өгмөөр байна.

- Бүтээгдэхүүний хувьд
Мэдээж тус кафе бол ice cafe буюу зайрмагны кафе учраас хамгийн эхэнд бүтээгдэхүүнийг нь дүгнэсэн нь дээр болов уу. Танд маш олон сонголтыг буюу 20 орчим нэр төрлийн зайрмагнаас сонголт хийх боломжийг олгох болно. За тэгээд хараад л ходоодны шүүс ялгарч, арааны шүлс асгарам гайхалтай өнгө үзэмжээрээ таныг өөрийн эрхгүй өөр лүүгээ татах болно. /яг л намайг аваач, намайг амтлаач гэсэн шиг л/ Уруул татам гээд л реклам байдаг шиг сэтгэл татаж, уруул дурлуулам гээд тодорхойлчиход буруудахгүй байх. Хамгийн гол нь Монголд зарагддаг, гадуур хаа сайгүй тааралдаж байгаа Итали зайрмагнуудтай, дэлгүүрт зарагддаг, худлаа үнэн брэндүүдийн хэт үнэтэй хөлдөөсөн зайрмагнуудтай харьцуулахад хамаагүй идүүртэй, хамаагүй арвин, хамаагүй амттай, чанартай санагдсан. Лав л нэг орсон бол дахиж орноо гэдэгтэй мөрийцөхөд ч бэлэн байна. Мөн сэндвич, коффее зэрэг олон төрлийн бүтээгдэхүүнийг танд санал болгох болно.
- Үнийн хувьд
Үнийн хувьд анх хараад үнэтэй санагдснаа нуугаад яахав. /Р.S: би бол оюутан, сургуулиа төгсөөгүй, ажил хийдэггүй/. Гэхдээ амтыг нь үзээд, орчинд нь тухлаад авсан бол энэ үнэ аргагүй шударга мэт танд санагдах болно. Желатоны хувьд single (3 ширхэг) - 3000, double (5 ш) - 4500, pint (9 ш) - 8500 г.м. үнэтэй байдаг, ерөнхийдөө бусад төрлийн бүтээгдэхүүнүүд нь ч гэсэн үүнтэй төстэй, ойролцоо үнэтэй байдаг юм байналээ.
- Үйлчилгээ болон Орчны хувьд
Надад хамгийн таалагдсан зүйл нь үйлчилгээ байлаа. Монголоос анх удаа л "ХЭРЭГЛЭГЧ БОЛ ХААН" гэсэн мэдрэмжийг би эндээс л мэдэрлээ. Бусад үйлчилгээний байгууллагуудад ёс юм шиг харагддаг "НАДАД БАРАА БАЙНА, ЧИ АВБАЛ АВ, ҮГҮЙ БОЛ ХУРДАН ХОЛД" гэсэн зарчмыг энд бүрэн халж, гадаадад байгаа мэт л, чухам тэнд л үзүүлж болох үйлчилгээг үзүүлэх болно. Уул шугамандаа үйлчилгээ гэдэг чинь ийм л байдаг юмдаа гэмээр сэтгэгдэл надад төрсөн. Бусад байгууллагууд ч гэсэн тийм байсан бол...
Тансаг бөгөөд тохилог орчин, найрсан бөгөөд чанарлаг үйлчилгээг эндээс авах болно гэдэгт эргэлзэхгүй байна. Үнэгүй wi-fi-тай учраас энд ажил төрлийн уулзалт болон түүнтэй холбоотой ажлаа гүйцэтгэх бүрэн боломжтой санагдсан, тэгдэг гэдэг нь ч харагдаж байсан. Нам гүм бөгөөд тухтай, за тэгээд "романтик" орчныг бүрэн бүрдүүлсэн учраас хосуудын хувьд болзооны хамгийн тохиромжтой цэг нь болох боломжтой, тэгдэг гэдэг нь ч бас харагдаж л байсан.
За тэгээд сүүлд нь сануулахад энэ бол зөвхөн миний бодол. Миний зүгээс өгсөн үнэлгээ. Таны зүгээс нэмэх санал сэтгэгдэл, шүүмж байвал сэтгэгдэл дээр үлдээхийг хүсье.

Хэрвээ та ямар нэгэн амттай зүйл хүсээд, бие организм чинь танаас үүнийг л нэхээд байгаа бол...
Хэрвээ та жинхэнэ үйлчилгээг бие сэтгэлээрээ мэдэрч, хэсэгхэн хугацаанд ч стрессээ тайлан хүсч байгаа бол...
Хэрвээ та хайртай хүнтэйгээ эсвэл дотны найзтайгаа халуун дулаан яриа өрнүүлж, зөвхөн та 2 л байгаа мэт сэтгэгдэл төрүүлэм газар хайж байгаа бол таны тэр бүх хүслийг Cafe Ti Amo хангалттай, бүр давуулан биелүүлэх болно.

Нийтлэл бичсэн: ( @uundaa )

SoccerReview: Шинэ улирлын өнгийг шинжихүй...

2009-09-14T23:42:00.001+08:00

Цэнхэр гарагийн ногоон талбайд цусгүй тулаан үргэлжилсээр байна. Европын хөлбөмбөгийн 2009-2010 оны улирлын тоглолтууд эхлэн, өдгөө 1-4 тойргийн тоглолт хийн, 2010 оны ДАШТ-ын сонгон шалгаруулах тэмцээн болон шигшээ багуудын нөхөрсөг тоглолтонд зориулан түр завсарлаад байна. Энэ талаар "Хөлбөмбөг" сонинд явуулахаар бичсэн нийтлэлээ блогтоо тавьж байна, гэхдээ энэхүү нийтлэлийг Премьер лигийн 5-р тойрог эхлэхээс өмнө бичсэн гэдгийг санаарай, зарим нэгэн статистик үзүүлэлтүүд өөрчлөгдснийг анхаараарай..За тээд сэтгэгдлээ үлдээнэ гэж найдаж байна...
АНГЛИЙН ПРЕМЬЕР ЛИГ

Өдгөө хамгийн сонирхолтой, хамгийн үзүүштэй, хамгийн хүчирхэг лигт тооцогдож байгаа Премьер лиг 8-р сарын 15-нд Челси болон Халл Сити багуудын тоглолтоор эхэлсэн билээ. Одоогийн байдлаар 4 тойргийн тоглолт явагдан Лондоны 2 баг болох Челси, Тоттенхэм багууд 4 хожил, 12 оноотойгоор 1-р байрт, харин Манчестерын 2 баг Юнайтед 4 тоглолтонд 9 оноотой, Сити 3 тоглолтонд 9 оноотой удаалж байна. Шинээр энэ улиралд дэвшин орж ирсэн Барнли клуб цэгцтэй хамгаалалт, зоригтой тоглолтынхоо ачаар сүүлий 3 жилд босоо байгаа аваргуудын буулгаж авсан нь одоогийн байдлаарх хамгийн том сенсааци байлаа. Харин Т.Соренсены найдвартай тоглолтын ачаар өнгөрсөн жил арай гэж дээд лигт тогтож үлдсэн Стоук Сити хүснэгтийн 5-рт бичигдэн, тоон дотор үсэг цохиж явна уу гэмээр харагдаж байна. Харин хүснэгтийн манлайд бичигдэх учиртай Бенитезийн удирдсан Ливерпүүл клуб 2 хожигдолтойгоор 4 тоглолтонд 6 оноо аван хүснэгтийн 6-10-рт Арсеналын хамт бичигдэж байна. Гэхдээ Арсене Венгерийн “хүүхдүүд” 3 тоглосон, дээрээс нь МанЮ-д тун харамсалтай хожигдон ийн явааг онцолъё. Хүснэгтийн хамгийн доор Блекберн, Болтон, Портсмут зэрэг нэгэн үе лигийн дундажаас дээгүүр багуудад тооцогдон, томчуудад халгаатай явсан архаг багууд бичигдэж байгаа нь хачирхалтай.

1. Челси
Яг одоогоор хүснэгтийг тэргүүлж яваа Челси баг энэ жил үнэхээр өнгөтэй харагдаж байна. Тэртээ 2004 онд Ж.Моуриньог анх ирэхэд тэд 4 дараалан ялж байсан түүхтэй. Яаж Аваргуудын Лигт түрүүлэхээ мэддэг Итали дасгалжуулагч К.Анчелотти ирснээр тэдэнд бооцоогоо тавигчид улам олширсоор. /Гэхдээ хуваарийн дагуу дундаж 4 багтай тоглоод байгааг санах хэрэгтэй. / Дээрээс нь гол довтлогч Д.Дрогбагийн ирээдүйн талаарх асуудал цэг тавигдаж, өөрөө ч өнгөрсөн жилийн мэргэн бууч Н.Анелькатай тун сайн ойлголцож тоглон, энэ хослол бараг тоглолт бүрд гоол оруулж байна. Төвийн шугамд байгаа хүчирхэг залуусынх нь оргил формтойгоо байх бараг сүүлийн жил гэж хэлж болох энэ жил тэд үнэхээр сайн байна. Германы шигшээгийн ахлагч М.Баллак 2 гоол 4 тоглолтонд оруулаад байгаа бол Ф.Лэмпард 20 гоол оруулах төлөвлөгөөтэй байгаагаа зарлаад байгааг санахад илүүдэхгүй. Ф.Малуда, Ж.Микель, М.Эссьен нар ч өөрсдийн үүргээ хангалттай биелүүлэн “эргэлтийн” системд тун сайн тоглож байгаа билээ. Мөн Декуг мартаж болохгүй. Саяхан л Р.Карвальогийн хамт хуучин босс Ж.Моуриньо дээр очих юм шиг хүн бүхэнд санагдаж, энэ яриа бараг биеллээ олж байсан ч өнөөдөр тэд 2-уулаа Челсид тун хэрэгтэй тоглогч болохоо харуулж чадснаар барахгүй үнэхээр сайн тоглолтыг харуулж байна. Хамгаалагчдын хувьд Ж.Терри, Э.Коул нар гэрээгээ сунгаснаар ойрын 4 жилдээ лав багаа солихгүй бололтой. Хэдхэн хоногийн өмнө ФИФА-аас гаргасан 2011 оны өвлийн наймааны цонх хүртэл багтаа хүн авч болохгүй гэсэн шийдвэр л тэдэнд нөлөөлчихгүй бол уул нь ирээдүй нь гэрэлтэй л байна. Г.Какутаг 2007 онд Ленс багаас гэрээг нь цуцлуулан, түүнд нөлөөлсөн хэргээр ийм ял сонссон Челсигийн талаар бараг амтай болгон хэлэлцэж байна. Экс Челси А.Роббен “Улирлын төгсгөлөөр олон одод багаа орхиж болох юм” гэсэн бол Челсид богинохон ч гэсэн хугацаанд нэр хүнд олж чадсан Г.Хиддинк “Энэ шийдвэр тэднийг хурцалж, бүр илүү бадраах болно” гэж ярьсан байна. Юутай ч тэдний хэрхэн тоглохыг, ФИФА-ийн эсрэг давж заалдалт хэр амжилттай болохыг цаг хугацаа харуулах биз.
2. Тоттенхэм
Нэлээн олон жилийн өмнөөс л топ 4-ийн дундуур шургачихаж магадгүй, аюултай багаар Тоттенхамыг хөгжөөн дэмжигчид төдийгүй, мэргэжилтнүүд нэрлэсээр ирсэн ч орон гаран тоглолтынхоо гайгаар амжилтанд хүрч чадахгүй байсаар өдийг хүрсэн Лондоны баг энэ жил тун өнгөтэй байна. Ялангуяа довтлогооны шугам нь үнэхээр хүчирхэг байгаа гэдэгтэй санал нэгдэх биз ээ. Ж.Дефое мэргэн буучдын жагсаалтанд бичигдэж, Английн шигшээд хэрэгтэй тоглогч гэдгээ харуулаад байгаа бол багийн ахлагч, ямар ч үед ухаалаг, мэдрэмжтэй тоглолтоороо шагшигддаг Р.Кин формтой хэвээр л байна. Дээрэс нь ОХУ-ын шигшээгийн довтлогч Р.Павлюченко, 2 давхарт бол хэнийг ч “бааварлачих” П.Крауч гээд л нөөцийн хувьд ч хэн хэнийгээ орлочих чадвартай 4 довтлогч тэднийд иржээ. Хагас хамгаалалт ч мөн сайн байгаа, 2010 он ДАШТ-ын жил учраас шигшээдээ байр сууриа баттай эзлээгүй л байгаа авьяаслаг залуус Ж.Женас, А.Леннон, Д.Бентли, Т.Хаддлстоун нар үнэхээр эрчтэй, формтой тоглолтыг харуулан, шигшээд багтахын төлөө зүтгэж байгаа нь багийн амжилтанд нөлөөлж байна. Эдэн дундаас баруун жигүүрт хурдтай, үзүүштэй тоглолтоороо гайхагдаж байгаа А.Ленноныг онцольё. Хамгаалалтын хувьд тэдэнд жаахан асуудал бий. Зөндөө бөмбөг оруулдаг ч тэр чинээгээрээ бараг алддаг “хачин” уламжлалаа овоо засаад байх шиг. К.Кудичини, Гомеш нарыг хэн ч муу хаалгач гэхгүй. Дээрээс нь бүх тоглолтонд гоол алдаж байгаа хэдий ч хожил авсаар л байна. Гэхдээ гол хамгаалагчид Ж.Вүүдгэйт, Г.Бэйл нарын эзгүйд ийм амжилттай байгаа болохоор Х.Реднаппын багт ирээдүй байгаа мэт санагдаж байна. Л.Модрич нь ид үедээ гэмтэл авсан ч наймааны цонх хаагдахтай зэрэгцэн өөр нэг авьяаслаг залуу Н.Краньчарыг авсан нь тун ухаалаг наймаа болсныг энд онцолъё. Тэд Ливерпүүлийг буулгаж авсан, тэгвэл 9 сарын 12-нд Манчестер Юнайтедтай хэрхэхийг нь харцгаая.
3. Манчестер Юнайтед
К.Роналду явсан ч Сир Фергюсоны “улаан чөтгөрүүд” жигдхэн тоглолтоо үзүүлсээр. Багийн лидерийн үүргийг хүлээн авсан У.Руни ч гайхалтай тоглолтыг харуулсаар байна. Мэдээж 4 дэх жилдээ цомыг Олд Траффордод хадгалан шинэ рекорд тогтоох нь хэцүү ч энэ тэдний хувьд боломжгүй асуудал биш нь тодорхой. Шинэ цэргүүд болох Барнлид хожигдож гайхуулсныг эс тооцвол тактикийн нягт хамгаалалт, ширүүн жигүүрийн довтолгоотой МанЮ-ын залуус муугүй тулалдаж байна. Гарааны бүрэлдэхүүний дундаж нас нь 25,4 байгаа нь Челсигийнхээс даруй 4 жилээр бага байгаа гэвэл та итгэх үү? М.Кэррик, Д.Флечер нарын найдвартай, тогтмол тоглолт, Нани болон Валенсигийн хурд зэрэг нь тэдэнд хожил авчирсаар байна. Гэсэн ч хамгийн чухал зүйл нь хамгаалалт байна. Э.Ван дер Сарыг орлон олон жил багтаа үнэнч байж, өөр багуудаар зээлэгдсээр эргэн ирсэн залуу хаалгач Б.Фостер муугүй тоглолт үзүүлж байна. Р.Фердинанд, Н.Видич, П.Эвра нараас гадна академийн бүтээгдэхүүн У. Браун, Ж.Эванс, Ж.Оши нарын жигд найдвартай тоглолтын ачаар ердөө 2 гоол л хаалгандаа алджээ. Арсеналыг бараг азаар шахуу хожсон гэгдэж байгаа ч тэдний хэрхэн Уиганыг “залгиж” байгааг харсан бол ямар их нөөц байгааг тэндээс харсан гэж найдъя. Бид одоохондоо М.Оуэний хэрхэн галзуурахыг, О.Харгривзын гэмтлээс эргэн ирэхийг хараагүй л байгаа гэдгийг битгий мартаарай!!!.
4. Манчестер Сити
Манчестер Сити энэ зуны наймааны цонхоор 124 сая фунтыг зөвхөн тоглогч худалдан авахад зарцуулсан нь үрсэн мөнгөөрөө тэдний ард орсон Ливерпүүлээс 3 дахин их, хамгийн сүүлд орсон Болтоноос 20 дахин их хэмжээний мөнгө юм. Үнэхээр ч тэр хэмжээгээрээ Сити урд өмнө хэзээ ч байгаагүйгээрээ хүчирхэг болоод байна. Абу Даби Групп тэднийг худалдаж авснаас хойш мөнгө тэдэнд юу ч биш болсон мэт санагдуулам наймааг тэд хийсээр. Английн шигшээ болон Челсигийн ахлагч Ж.Террид долоо хоногийн сая фунтын цалин амласнаар энэ бүхнийг төсөөл. Хэдийгээр найдвартай тоглолттой хэдий ч супер од худалдаж авч болох 24 сая фунтээр Ж.Лескотт үнэлэгдэнэ гэдэг хачирхалтай биш гэж үү. Тэд энэ жилийн наймааны цонхоор “ганцаардсан” од Робиньод зориулан хагас хамгаалалтандаа Виллагийн хөдөлгүүр асан Г.Бэрриг нэмэн, Арсеналын гоолын машин Э.Адебайорыг болон К.Тевез, Р.Санта Круз гэсэн шилдэг довтлогчдыг өөрийн болгосон билээ. Хамгаалалтаа хэтэрхий задгай орхиж байна гэж удаа дараа шүүмжлэлийн бай болсон М.Хьюз тэдний амыг К.Туре, Ж.Лескотт болон Сильвиньо нарыг авчран тагласан. Дээрээс нь багийн залуус болох С.Айрланд, М.Жонсон, Н.Онуохо, М.Ричардс зэрэг шижигнэсэн тоглогчид энэ багийн хүснэгтийн 4-р байрт бичигдэхэд үнэтэй хувь нэмрээ оруулж байгаа нь тодорхой. Гэхдээ Челситэй мөн адил тэд хүчтэй өрсөлдөгчидтэй хараахан тоглож амжаагүй л байна, харин ойрын хуваарьт тэднийг Арсенал, Манчестер Юнайтед болон Астон Вилла зэрэг багууд хүлээж байгаа. Үнэндээ байрлал бүрдээ маш сайн сэлгээтэй хүчирхэг баг бүрдсэн тэднийг тийм ч туршлагтай мөн нэр алдартай биш М.Хьюз хэрхэн удирдан, зохицуулахыг харах л бидэнд дутуу байх шиг. Аваргуудын Лигт оролцох том зорилготой тус багийн амжилтанд дээр нэр дурьдсан тоглогчдын хэр формтой, гэмтлээс холуур байх зэрэг нь нөлөөлөх нь тодорхой юм. Саяхан Ренн баг тэднийг ФИФА-ын наймааны дүрэм зөрчсөн хэмээн гомдоллосон хэрэг “шавар хаачихгүй” бол тэд 1 сарын наймаагаар ч улам хүчирхэг болох биз. Хэрхэхийг нь тааварлахад дэндүү эрт байгаа ч одоогийн эхлэл тэдэнд мөрөөдлийн мэт байгаа нь гарцаагүй. Хамгийн сүүлд 1976 онд Лигийн цом хүртснээс хойш одоог хүртэл ямар ч цом аваагүй байгаа нь энэ жилээр эцэс болж чадах болов уу?

ОНЦЛОХ ТОГЛОГЧИД
Хаалгач
Т.Соренсен
Соренсеныг хэн ч муу хаалгач гэхгүй. Бүр топ багуудын хаалгач хийгээд явж байхад ч гайхаад байх юмгүй. Тэр яг одоо яаж хасагдчихгүйхэн шиг улирлаа дуусгах вэ гэхэд буруудахгүй Стоук Сити багийг жагсаалтын эхний 5д ороход хамгийн чухал үүргийг гүйцэтгэж байна. Түүний найдвартай хаалтууд, ухаалаг тоглолт, хамгийн гол нь нөр их туршлага энэ жагсаалтанд түүнийг зүй ёсоор бичигдэхэд хүргэж байна. Стоук Ливерпүүлд 4:0-ээр хожигдсныг эс тооцвол үлдсэн 3 тоглолтонд нэг ч гоол алдаагүй юм.

Хамгаалагч
Глен Жонсон
Зөвхөн Ливерпүүлийн төдийгүй нийт Премьер лигт явагдсан хамгийн сайн наймааны эзэн Глен Жонсон энэ улирлыг гайхалтай эхлүүлж байна. Хамгаалагч гэхэд 2 ч гоол хийж хэд хэдэн чухал бөмбөгөнд хувь нэмрээ оруулсан тэрээр яг одоогоор Английн шигшээгийн баруун жигүүрийн хамгаалалтын эхний сонголт байх болов уу. Хурдтай, идэвхтэй, хараатай тоглодог энэ залууг Челси явуулсандаа харамсаж байгаа гэдэгтэй мөрийцсөн ч бэлхэн байна.

Хагас хамгаалагч
Аарон Леннон

Тоттенхэмын 4 хожил дараалан аваад буй нь тэдний баруун жигүүрийн хагас хамгаалагч А.Леннонтой салшгүй холбоотой. 4 тоглолтонд 2 оновчтой дамжуулалт, 2 гоол. Түүний хурд болон ур чадвартай довтлогооноос ямар ч сайн хамгаалагч айх нь гарцаагүй болтлоо тэр сайжирчээ. Д.Бекхэм хүртэл түүнийг ихэд үнэлснээс хойш Бексийн залгамжлагч хэмээн сонин хэвлэлээр шуугиж байна. Хэрвээ Леннон энэ формоо хадгалж, хамгийн гол нь гэмтэл бэртлээс хол байж чадвал Өмнөд Африкт гялалзах оддын нэг нь болох биз ээ...

Довтлогч
У.Руни
Улаан чөтгөрүүдийг энэ жилдээ лав ганцаараа шахуу нуруундаа авч явах учиртай хүн бол яах аргагүй У.Руни юм. К.Роналдугүй МанЮ-г хэрхэх бол гэсэн хүн бүрийн асуултанд “өө гайгүй юм байнадаа” гэдэг хариулт авахад хүргэмээр тоглолтыг тэр үзүүлж байна. 4 тоглолтонд 4 гоол оруулсан, ялангуяа гол өрсөлдөгчдийн нэг Арсеналын эсрэг гоол хийсэн. Өөр дээр нь хийсэн алдаагаар торгуулийн цохилт цохин, улмаар баг нь тун чухал ялалт авсан билээ. Яах аргагүй энэ жил гялалзах “ёстой” тоглогч. Ф.Капеллогийн хэлсэн үгийг санацгаа. “У.Руни ийм формтой байгаа цагт бид хэнд ч дийлдэхгүй”.

SportReview: МОНГОЛ ТҮМЭН БАЯРЛАЖ БАЙНА!!!

2009-09-12T21:12:00.008+08:00

Өнөөдөр 9-р сарын 12-ны өдөр. Энэ өдөр Монгол улс Дэлхийн аваргаа өлгийдөн авлаа. Энэ өдөр Монгол түмэн дахин баярлаж, хөөрч, догдлон, цэнгэлдэж байна. Уйтгар гуниг, зовлон шаналлаа мартан Монгол орон төрийн дууллаа Миланы тэнгэрт хэрхэн эгшиглэхийг харан зогсож, даган дууллаа. Монголын Боксийн шигшээ баг тамирчид Италийн Милан хотноо болж өндөрлөж байгаа Дэлхийн Аварга Шалгаруулах Тэмцээнээс түүхэндээ гаргаж байгаагүй өндөр амжилтаа гарган, 1 алт, 1 мөнгө, 1 хүрэл медальтай эх орондоо ирэх нь.
Өнгөрсөн жил Олимпийн наадмаас мөнгөн медаль хүртэж, биднийгээ баярлуулж байсан Пүрэвдоржийн Сэрдамба боксийн спортоос төрсөн Монголын анхны дэлхийн аварга боллоо. Тэрээр аварга болох замдаа Бразил, Армен, БНХАУ, ОХУ-ын боксчдыг хожсон юм. Чансаагаа бодсон ч тэр, ур чадвар, ухаан, авьясаа бодсон ч тэр манай боксчин үнэхээр илүү нь байлаа. Баярлалаа, Сэрдамбаа, чи үнэхээр илүү нь байлаа, олимпийн төрлийн спортоор төрсөн 6 дахь дэлхийн аваргаараа Монгол орон бахархаж байна!!!
ДАШТ-ын өмнөхөн өгсөн ярилцлагандаа "Би нас залуу, туршлага багатай хэдий ч энэ ДАШТ-ээс медаль авах зорилготой" хэмээн өгүүлж байсан, энэ жил 17хон настай Н.Төгсцогт хэлсэн амандаа хүрч, мөнгөн медалийг Миланаас хүртлээ. Тэрээр энэ тэмцээнд жинхэнэ шуугиан тарьж финалд шалгарахдаа Энэтхэг, Словак, Ирланд, Итали болон ОХУ-ын боксчдыг ялан шигшээд шалгаран Пуэрто Рикогийн боксчинд хожигдсон юм. Дайчин, эрэмгий, шургуу энэ залууд 2012 оны Лондоны олимпод манай гол тамирчдын нэг болон оролцох их ирээдүй байна, баяр хүргэе, баярлалаа...
Монголын Боксийн спорт уналтанд орж, хүнд хэцүү явах цагт ганцаараа эх орныхоо нэрийг өндөрт өргөн, дэлхийн дэвжээнээ үзэлцэж явсан Монгол Улсын Гавьяат тамирчин Уранчимэгийн Мөнх-Эрдэнэ олон жилийнхээ хөдөлмөрийн үр шимийг хүртэн Миланы рингэнд урамтай тоглосоор хүрэл медалийг өөрийн болголоо. Азийн аварга, Дэлхийн цомын мөнгөн медальт манай тамирчин Словак, Румын, Итали, Украйны боксчдыг ялаад Кубын боксчинд харамсалтайгаар 2-хон онооны зөрүүтэй ялагдан ийн хүрэл медаль хүртсэн юм. Тамирчин хүний асар их тэвчээр, үлгэр жишээг бид чамаас харж баярлаж, бахдаж, бахархаж сууна....

Манай боксчид бүгд үнэхээр гайхалтай тоглолтыг үзүүллээ. 11 жингийн 9 жинд нь оролцож, төдийлэн сонсогдоод байдаггүй хүнд жинд хүртэл шилдэг 16-д шалгарлаа. Хөнгөн жинд манай улс аль хэдийн дэлхийд хүчтэй өрсөлдөгч болсон гэдгээ ийн батлан харууллаа. Олимпийн дараа ОХУ-ын шигшээгийн дасгалжуулагч "Монголчууд 2012 оноос медаль ч авахгүй" хэмээсэн ярилцлага өгч байсан нь энэ үед санаанд орж байна, азны бишээ авьяастай, чадвартай байсных гэдгийг тэд одоо ухаарч байгаа болов уу. Манай боксын шигшээ баг үнэхээр гайхалтай амжилт үзүүллээ. Бадар-Ууган гэмтэлгүй байсан бол, Энхзориг жаахан азтай байсан бол, Жавхлан багахан туршлагтай байсан бол медалийн тоо маань улам нэмэгдэх байсан биз. Та нар үнэхээр шилдэг нь байлаа, та нар баатрууд, та нар бахархлууд...МОНГОЛ ТҮМЭН БАЯРЛАЖ БАЙНА, та нараар бахархаж байна.

...Копенгагенд өнгөрүүлсэн нэг өдөр...

2009-09-12T20:37:00.001+08:00

Заа, таны энэ нийтлэлийг маань унших өдрийн мэндийг хүргэе. Ойрын хэдэн өдөр блогтоо нийтлэл оруулсангүй, оруулья гэсэн ч нэг л болж өгөхгүй байсаар өдий хүрлээ. Илүү дутуу юм нуршилгүйгээр шинэ нийтлэлээ танилцуулья. Энэ бол Данийн нийслэл Копенгаген хот. Аяллын маань 4 дэх үндсэн улс байлаа. Эхлээд Дани улсыг товч танилцуулсан нь зөв болов уу. Данийн вант улс нь Европын баруун хойд хэсэгт Ютландын хойгийн ихэнх, түүний ойролцоох олон жижиг арлуудыг эзлэн оршдог.

Фарер, Гренландын арал Данийн бүрэлдэхүүнд хамаарагддаг ч бие даасан өөртөө засах эрхтэй болжээ. Албан ёсны хэл нь Дани, 43 мянган км2 газар нутагт 5,5 сая хүн оршин суудаг бөгөөд Европын холбоо, НАТО, Европын эдийн засгийн хамтын нийгэмлэгийн гишүүн орон. Үндсэн хуульт хаант засагтай. Улсын тэргүүн нь хаан бөгөөд парламентийн гишүүд нь Ерөнхий сайдаа сонгодог. Чөлөөт зах зээлийн тод жишээ болсон, дэлхийн хамгийн баян улсуудын нэг. Дэлхийд нэг хүнд ноогдох орлогын хэмжээгээр эхний байруудад багтан, "хамгийн бага авилгалд өртсөн улсуудын жагсаалт"-нд Шинэ Зеланд, Шведийн хамт эхний байрт орсон. Форбс сэтгүүлийн тодорхойлсноор бизнес хийхэд хамгийн тохиромжтой нөхцөл бүхий орон бөгөөд мөн "Дэлхийн хамгийн жаргалтай" орнуудын жагсаалтанд багтсан аж. За ингээд нийтлэлдээ орцгооё.
За энэ бол миний өмнөх нийтлэлүүддээ дурьдаж байсан Оресундын гүүр... Дани Шведийг хооронд нь холбодог энэ гүүрЕвропын хамгийн урт гүүрт тооцогдоно, 2 давхар замтай, дээгүүрээ машины зам, доогуур нь галт тэрэгний зам явдаг...дараа нь яг дээрээс нь зураг авах төлөвлөгөөтэй байгаа..Үүний ачаар өртөг хямдтай Шведэд амьдардаг хүмүүс цалин өндөртэй ч өртөг өндөр Данид ажиллах боломжтой болсон гэж байгаа...Мөн яг одоо Дани болон Германыг холбох гүүр баригдаж байгаа юм байналээ...
--------------------------------------------------------------------------------------------------------------------------------------------------------

...Энэ бол алдарт Тиволи паркийн зураг..Хамгийн анх 1843 онд нээгдсэн, дэлхийн хамгийн хөгшин бөгөөд үзэсгэлэнтэй парк гэж хэлж болно...У.Дисней энэ паркаар үйчлүүлэн, үзснийхээ дараа өнөөдөр дэлхийн хамгийн алдартай Дисней паркаа барих санаа авсан гэдэг.......Хаана ч явсан хужаа хороолол, булан тойроод л хужаа нөхдүүд...дэндүү олон юмдаа......Данийн галт тэрэгний буудал..Дани улс хэдийгээр Европын холбооны анхны гишүүдийн нэг ч гэсэн одоог хүртэл мөнгөн тэмдэгтээ шилжүүлээгүй байгаа цөөн улсууды нэг. Нэг данийн крон 277 орчим төгрөгтэй тэнцдэг. Крон гэдэг нь англи хэлний титэм буюу crown гэсэн үгнээс гаралтай...
...Энэ бол Скандинавын хамгийн том сүм болох Фредерикийн сүмийн араас авсан зураг. 1740 онд анх баригдаж эхэлсэн гэж байгаа......Дэлхийн 2-р дайнд тэнгисийн цэрэгт оролцсон 1500 орчим цэргүүд, оффицерүүдэд зориулан бүтээсэн хүндэтгэлийн хөшөө...
Энэ бол Нихавн боомт. 1670 онд Данийн хаан 5-р Кристианы тушаалаар Дани-Шведийн дайны олзлогсдоор бариулсан нь энэхүү боомтыг хамгийн эртний хот дотор, хүний гараар бүтээгдсэн боомт гэдэг нэр зүүхэд хүргэдэг. Энэ боомтоос өдгөө жуулчдад зориулсан тайлбарлагчтай усан завины аялал хийгддэг. Энэ завин аялалд суугаад хот дундуур урсах гол, мөн гүүрүүдийн доогуур өнгөрөн Копенгагены бараг үзвэл зохих бүх газруудыг хажуунаас үзэх, тайлбар сонсох боломжтой болдог.
--------------------------------------------------------------------------------------------------------------------------------------------------------...Копенгагены дуурийн театр...2005 онд нээлтээ хийсэн энэхүү дуурийн театр дэлхийн хамгийн шинэлэг бөгөөд шилдэг загвартай дуурийн театруудын нэгт зүй ёсоор тооцогдоно. Хөрөнгө оруулалтын хэмжээ нь 500 сая америк доллар ба үүгээрээ хамгийн үнэтэй дуурийн театрд тооцогддог.
Эдгээр байшингууд бол Нихавн боомт байгуулагдахаас ч өмнө баригдсан маш урт настай барилгууд...Зарим нь 14-р зуун, 15-р зуунд харьяалагддаг. Энд өнөөдөр хамгийн тансаг ресторанууд, үйлчилгээний газрууд төвлөрөн, жуулчдын зайлшгүй очих ёстой төв болон ажиллаж байна....
...Энэ бол Данийн Үндэсний Номын сангийн барилга. Энэ номын сан нь анх 1648 онд 3-р Фридрик хааны тушаалаар байгуулагдсан бөгөөд анх оноогдсон газраа өдийг хүртэл оршсоор байгаа юм. 1482 онд Данийн анх хэвлэгдэж байсан газар баригдсан уг номын сан нь Скандинавын орнууд дундаа хамгийн том нь бөгөөд 6 сая орчим ном, сэтгүүлүүд, 16 сая орчим зурган материалтай аж...Хар Алмаз гэж нэрлэгдсэн уг барилга нь 1999 онд ашиглалтанд орсон бөгөөд Данийн хамгийн үзэсгэлэнтэй газрууды нэг...
...Энэ хашааны цаана Данийн парламентийн ордон байгаа...Үүний тухай доор жич дурьдах болноо...
..Данийн үндэсний банкны барилга. Эдийн засгийн хүч чадлаараа бол Дани улс дэлхийн тэргүүлэгч гүрэнд тооцогдоно. Хэдийгээр татвар авах хэмжээгээрээ дэлхийд дээгүүрт орох ч бүс нутгийн хэмжээний салбаруудаа олон компаниуд энд байгуулан ажилладаг. Томоохон жишээ нь Майкрософт. Нэг хүнд ноогдох ДНБ нь 37,2 мянган доллар /дэлхийд 16-рт/. Дэлхийн банкны тодорхойлсноор зах зээл нь хамгийн уян хатан бөгөөд ажиллахад тохиромжтой бизнесийн зах зээл гэж тодорхойлсон. Энэ нь ажил олох, томилогдох, дэвших тэр ч бүү хэл халагдах өндөр боломжтой гэсэн үг. 2008 оны эцэст гарсан тооцоогоор нийт ажиллах хүчин нь 2,9 сая байсан бөгөөд 2009 онд буюу одоогийн байдлаар ажилгүйдлийн түвшин 6,3 хувь байгаа нь ЕХ-ны дундажаас 2,6 хувиар бага байгаа гэсэн үг юм. Хэдийгээр ашигт малтмал багатай ч төмөрлөг боловсруулах, машины үйлдвэр, хөлөг онгоц, цахилгаан, радиотехникийн бүтээгдэхүүн болон элсэн чихэр, мах, тос зэргийг гарган дэлхийн хэмжээнд гадаад худалдааны эргэлтийн нэг хүн ам тутамд ногдох хэмжээгээрээ эхний 10-т ордог аж....Энэ бол Копенгагены хамгийн үнэтэй орон сууц гэж усан онгоцны тайлбарлагч маань хэлж байсан, яг ямар үнэтэйг нь бүү мэд, төсөөлөхийг ч хүсэхгүй байна нтр...
Little Mermaid буюу Бяцхан усан дагина..Ханс Кристиан Андерсоны бүтээлээс сэдэвлэн урласан, Копенгагены нэрийн хуудас болсон бүтээл. Даанч яг төвөөсөө буюу галт тэрэгний буудлаасаа жаахан зайтай учраас усан онгоцоор л хажуугаар нь өнгөрч сэтгэлээ хуурсан даа хэхэ...2010 оноос Шанхайд болох Экспо үзэсгэлэнд оролцохоор явна гэсэн......Данийн усан флот дэлхийд алдартай. Дэлхийн 2-р дайн болон далайд гарсан мөргөлдөөнүүдэд чухал үүргийг НАТО-ийн гишүүний хувьд Данийн усан флот гүйцэтгэдэг..яг одоо Сомалийн далайн дээрэмчдийн эсрэг ажиллагаанд оролцох багт багтсан байгаа гэж тайлбарлаж байлаа......Алдарт Микаленжелогийн Давид бүтээлийн хуулбар...Оригиналь нь Флоренцид байрладаг бөгөөд олон газар хуулбар нь байдгийн нэг нь Копенгагенд байдаг юм байна, хэзээ нэгэн цагт эх хувилбарыг нь үзнээ л гэчихсэн байгаа..Жинхэнэ төгс эр хүний байвал зохих хэмжээгээр хийгдсэн бүтээл гэгддэг...
..Хуучин тэнгисийн гааль ажиллаж байсан барилга.
..Нихавнд Данийн алдарт зохиолч, бидний "Нугасны муухай дэгдээхий", "Little Mermaid" зэрэг зохиолыг нь амтархан уншиж өссөн Ханс Кристиан Андерсен 1845-1863 он хүртэл 18 жил амьдарсан юм. Нихавны 20-р байр 1938 оноос хойш түүний нэрэмжит болон жуулчдыг соронзон мэт татсаар оршиж байна...
Дани улс бол Дэлхийд хамгийн анх Байгаль орчны тухай хууль баталсан улс юм. Копенгагены Онгоцны буудал дээр буухад л "Дэлхийн хамгийн экологийн таатай хотод тавтай морил" гэсэн бичиг таныг угтана. Европын хамгийн их ногоон байгууламжтай улс..Бараг ой мод доторх хот гээд хэлчихэж болно...Үнэндээ хотын бараг бүх хэсэгт маш их хэмжээг агуулан орших цэцэрлэгт хүрээлэнгүүдэд нь атаархал төрж байлаа. Монголд иймэрхүү ногоон байгууламж барьчихад хийх юмгүй хэдэн залуус нь баар хэсэж, архиа уух нь багаар ч гэсэн хорогдох л байхдаа...
--------------------------------------------------------------------------------------------------------------------------------------------------------

...Энэ бол хотын төв цэцэрлэгт хүрээлэнд байрлах Русенборгийн цамхаг. Данийн сэргэн мандалтын үеийн загвараар баригдсан барилга бөгөөд 1606 онд анх баригдаад өнөөг хүрэхдээ Данийн хааны гэр бүл хэд хэдэн удаа энд амьдарч байсан түүхтэй аж...Өнөөдөр музей болон ажиллаж байна.
...Копенгагенд Европын хамгийн урт дэлгүүрийн гудамж байдаг. Түүнд нь нэг орчихвол мөддөө гарна гэж байхгүй..Дэлхийн хамгийн том брэндүүд, дэлгүүрүүд, ресторанууд овоорч, гудамжинд нь түмэн хүн холхин, хөгжимчдын үнэгүй тоглолт үзнэ...Та хэрвээ дэлгүүр хэсэх дуртай, бас хангалттай мөнгөтэй бол шууд л энэ хотыг зорь...Бүр газрын зурган дээр нь брэндүүдийнх нэрийг бичээд тэмдэглэчихсэн байдаг гээд боддоо, төөрөх ямар ч боломж байхгүй хэхэ....../ямар ч далд санаа агуулаагүй, зүгээр л сонирхолтой зураг болно хэхэ.../...
ХАРИБО, Амттайхан ХАРИБО, Резинен чихрээ гэж нтр...

...Данийн Парламентын ордон..Нийт 179 суудал байдаг бөгөөд Фарерын арал, Гренландаас тус бүр 2 гишүүн сонгогддог, олон намын системтэй орон...Парламентын ордон нь Кристиансбургийн цайзад байрладаг, энд мөн сүм, төв шүүх зэрэг засаг захиргааны хэд хэдэн том төвүүд үйл ажиллагаагаа явуулна. Долоо хоногийн тэгш тоотой өдрүүдэд буюу Мягмар, Пүрэв гарагт гадаад, дотоодын жуулчид ордонд үнэгүй зочлон, зураг авах, танилцах боломжтой байдаг ч би хуваариа буруу тааруулан даваа гарагт очсон учраас харамсалтай нь очиж чадсангүй. Кристиансборгийн энэхүү цайз нь 1167 онд анх түүхэнд тэмдэглэгдэж эхэлсэн бөгөөд Копенгагены цайз, Абсалоны цайз зэргээр нэрээ өөрчилсөөр 1733 онд 6-р Кристиан хаан нэрийг нь солин Кристиансборгийн цайзыг тухайн үеийн уран барилгын хамгийн шинэлэг шийдлээр барин засчээ. Галд 2 удаа, тодруулбал 1794, 1884 онуудад шатаж, сэргээн барьж байсан түүхтэй.
...Данийн Үндэсний Музей. Даваа гарагт харамсалтай нь ажилдаггүй учраас үзэж чадсангүй, дахиад нэг очих шалтагтай л болсон...

Дани улсын Копенгаген хот шинэ үеийн архитектурын өвөрмөц шийдлийг сэргэн мандалтын үе болон дундад зууны үеийн хуучны барилгуудтай хослуулан, тун сонирхолтой шийдлээр баригдсан, төлөвлөгдсөн, зохион байгуулагдсан хот байлаа. Дани улсын тухай төрсөн сэтгэгдэл болон авч болох санаа зэргийг блог дээрээ тусдаа нийтлэл болгон бичих болно...

SurpRise: LRLRL-тэй болсон миний түүх...

2009-08-29T22:13:00.004+08:00

Дэлхийн хамгийн шилдэг хамтлагуудын нэг, бритпоп урсгалын томоохон төлөөлөгч Coldplay хамтлаг өнгөрсөн жил худалдаанд гаргасан 4 дэх цомог Viva La Vida and Death and All His Friends цомгоороо төсөөлөмгүй амжилт олсноо /гарсан эхний долоо хоногтоо л 36 улсын борлуулалтын жагсаалтыг тэргүүлсэн!!!/ тохиолдуулан Viva La Vida дэлхийн аялан тоглолтынхоо үеэр дуулсан дуунуудаасаа бүрдсэн LeftRightLeftRightLeft цомгийн 5-р сарын 15-аас эхлэн /миний төрсөн өдөр шүү дээ гэж, бас л сонин тохиолдол!!!/ тоглолтонд ирсэн хүн болгонд үнэгүй тарааж эхэлсэн юм. Гэсэн ч энэхүү цомгийг, тоглолт амьдаар нь үзэж авах боломжгүй өөрийн гишүүддээ хүргэх зорилгоор www.coldplaying.com хаягаас илүү цомогтой гишүүд нь тэдэнд шуудангаар явуулах аяныг зохион байгуулж эхэлсэн билээ.
Заа тэгээд тодорхой шалгуурт нь багтаад өөрийнхөө нэрийг хүлээлгийн жагсаалтанд оруулчихсан байтал нэг өдөр надад нэг Чикагод байдаг нөхрөөс мэйл ирдэг юм байна.

...Hey, uundaa..Би чамайг жагсаалтанд байхыг харлаа. Надад илүү байгаа. Би бол монголд хайртай, Монголоор бахархдаг, Чингис хаан бол миний баатар. Чи л энэ СД-г авах эрхтэй, гялс хаягаа явуул..."

гэсэн утгатай хэхэ...Би ч шууд л амандаа орсон шар тосыг хэлээрээ түлхчихгүйн тулд удалгүй шуудангийн салбар дээрээ очоод л хаягаа аваад явуулчихлаа гэж. Гэтэл түүнээс хойш сар болтол сураг ирсэнгүй. Ямар ч чимээгүй байсаар би амралтаараа Европ тийш хүлгийн жолоо заллаа...Хариу бас л байдаггүй...Сүүлдээ хөөрхий хошгорсондоо, юу ч болоогүй байхад баахан хүнд зарласандаа бантан дэмий хаягаа өгч, элдэв юманд ашиглаглачихвий дээ гэж бодлоо...Харин 2 сарын дараа дөнгөж гэртээ ирээд хоолоо идэж байтал аав минь надад нэгэн шуудангаар ирсэн боодолтой зүйл өгсөн юм... ...Гайхалтай!!!...Миний СД иржээ. Ирэхдээ захиатай ирж...Захиандаа мань нөхөр хэзээ нэгэн цагт Монголд очноо гэж мөрөөддөг тухайгаа дурсаад надад СД таалагдана гэж найдаж байна хэмээгээд баахан зүйлийг хавсаргасан байлаа. Өөрийн гараар хийсэн эрвээхийнүүд, өөрийн гараар авсан Крис Мартины зурагтай...Үнэхээр сэтгэд хөдөлмөөр гээч...Ямар их сэтгэл, зүтгэл, хөдөлмөр гаргаа вэ?..Зүгээр ч нэг явуулаагүй FIRST CLASS зэрэглэлээр зөөлөвчтэй дугтуйнд хийсэн байх юм...Үнэхээр үлгэр жишээ авмаар, баярламаар, үүрд нандигнан хадгалмаар төсөөлөмгүй бэлэг боллоо...Гайхалтай...Надад яг одоо миний урд СД маань байна...

Вен - Одон орон судлалын өлгий нутгаас...

2009-08-28T13:54:00.012+08:00

Удаан хугацаанд блогтоо нэг нийтлэл байтугай нэг зураг оруулсангүй. Монголдоо ирээд хэд хонохдоо амжуулах, зохицуулах ажил байсантай зэрэгцээд лаптоп гажигтсны улмаас аль эрт энэ блогт бичигдэх ёстой байсан нийтлэлүүд тавигдах боломжгүй болоод байсан юм. За тэгээд энэ асуудлыг шийдсэн болохоор одоо Швед, Дани улсуудаас хийсэн тэмдэглэлээ хүргэж эхлэх гэж байна. Шведэд ирээд байрлаж байсан Ландскрон хотоос холгүйхэн орших "Оресундын сувд" хэмээх нэрээрээ жуулчдын дунд алдаршиж, онгон байгаль, хуучны түүх дурсгалын зүйлсээрээ тэднийг татдаг Вен арал дээр очсон зургууд эхнийх байх болно. Энэхүү арлын тухай товч танилцуулахад 400 орчим байнгын оршин суугчтай, 7,5 km² талбайтай, Данийн Зеланд арал болон Сканиагийн хооронд оршдог жижигхэн арал юм. Ландскрон хотын боомтоос цаг болгон явдаг усан онгоцонд суун 30 минутын турш Оресундын тэнгисээр аялсны эцэст та энэхүү арал дээр очих болно. Энэхүү арал дээр Данийн одон орон судлаач Тайро Брах Данийн хаан 4-р Кристианы тушаалаар /түүний одон орончийн хувиар/ 1571 онд анх ирж, улмаар уг арал дээр Ураниборгийн цайзыг бий болгон, одон орон судлалын ажиглалтын төвүүдийг барьж байгуулж, өөрийн судалгаа шинжилгээг хийж, тэр нь Европын эрдэмтдийн ирж, шинжилгээ хийж, түүнийгээ шүүн хэлэлцдэг гол талбар нь болон хувирсан юм. Уг арлын газар шороо нь үржил шимтэйгээрээ алдартай учраас одоог хүртэл усан үзэм болон бусад төрлийн цэцэг, жимсээрээ алдартай хэвээр байдаг.. ...Норреборг хэмээх усан онгоцонд суун энэхүү аралд 30 минутын жижигхэн аяллын дараа ирлээ гэж...За тэгээд Скандинавын хойгийн улсуудын тугтай боомтон дээрээсээ автобусаар үйлчилдэг, сонирхолтой газруудын ойролцоо зогсдог гэж байгаа......Энэ арал дээр дугуйт аялал хийдгээрээ алдартай. Сургуулиуд амралтаараа юмуу хичээлийнхээ хүрээнд энэ арал дээр их тиймэрхүү аялал хийдэг гэж байсан. Дугуй бол жинхэнэ төрөл төрлөөрөө энд байхаас гадна, дугуйчдад зориулсан тусгай замтай, тэр нь далайнхаа эргээр явж, байгалийн сайхныг, тэнгисийн бишрэм үзэсгэлэнтэй хослуулан харах боломж олгодог хэхэ......Дээр байсан байшин бол сонгодог Швед стилийн байшин, дээвэр нь сүрлэн гэх юм уу даа. Мөн хаалга нь аймар жижигхэн, учир нь анх энэ байшин гарах үед дундаж швед хүн 1 м 50 см өндөртэй байсан гэсэн, тэгээд одоо хүртэл тийм жижигхэн хаалгатай хэвээр үлдсэн аж......Угаас одон орон сонирхогчдын очдог газруудын нэг болохоороо нарны аймгуудын нэр, товч танилцуулга бүхий чулуунуудтай, түүн дээрээ яг энэ цэгээс хэдэн сая гэрлийн жилийн зайд байгаа болон бусад сонирхолтой мэдээллийг бичсэн байдаг. Харин дээрх зураг бол Т.Брахегийн албатуудын барьсан одон орон судлалын цогцолбор байгаа. Хашаанаас бусад нь яг анхныхаа загвараар гэж бичсэн байсан, гэхдээ би итгээгүй нтр..Ураниборгийн цайзыг барьж, түүнийхээ тагт болон гадаа нь од эрхсийг судалдаг байсан ч тэр нь ямар нэг айлчлал юмуу зочин гийчинтэй үед тун хэцүү, тохиромжгүй нөхөл байдалд хүргэдэг учраас шинээр өөр газар барих хэрэгтэй болсон юм байна. Тэгээд цайзнаас холгүйхэн нэгэн газрыг сонгон тухайн үеийнхээ хамгийн дэвшилтэт технологи бүхий дуран болон зай хэмжигч, өнцөг хэмжигч зэрэг багажуудтай Европын анхны одон орон судлалын цогцолборыг барьсан байна. Аль 16-р зууны үед шүү дээ...
...Энэ бол алдарт одон оронч Т.Брахе. Одод руу харан буй байдлаар баригдсан хөшөө..Хэдийгээр дэлхийг нар болон бусад гарагууд тойрон эргэдэг гэх дэлхий төвт үзлийг баримталдаг байсан ч дэлхий болон сарны олон хамаарлыг, хөдөлгөөний эллипс байдал зэргийг судалж үзсэнээрээ мөн энэхүү төвийг байгуулж, шинжлэх ухааны хөгжилд үнэтэй хувь нэмэр оруулснаараа түүхэнд бичигдсэн юм....Ростокийн их сургуульд суралцаж байсан залуу Тайко 1566 онд үдэшлэгээс таран халамцуу үедээ нутаг нэгт өөр нэгэн оюутантай муудалцан, дуэльд дуудан улмаар тулааны дараа хамарныхаа урд хэсэгт шарх авсан гэдэг. Түүнээсээ болон амьдралынхаа үлдсэн он жилүүдэд алт, мөнгө, зэсээр хийсэн хиймэл хамартай явдаг байсан бол 1901 онд түүний булшийг нээхэд хамарных нь оронд хиймэл зэсэн хамар олдсон нь үүнийг баталсан аж. Энэ явдлаас хойш тэрээр альхими болон анагаах ухааныг судлан, өнөөдөр ч дэлхийд хосгүйд тооцогдох цэцэрлэгээ байгуулсан түүхтэй. ...Т.Брахеийн музейд дотор тухайн үеийн нийгэм болон улс төрийн байдлаас авахуулаад ертөнцийг үзэх үзэл болон дайн байлдааны байдлаас авахуулаад мэдээж Т.Брахийн амьдрал, удам, үзэл, ном зэргийн тухай дэлгэрэнгүй мэдээллийг агуулсан гайхалтай музей байлаа...
...Энэ зураг их учиртай. Т.Брахе яагаад одон орон сонирхох болсон бэ гэвэл залуу байхдаа буюу 1572 онд нэгэн сонирхолтой зүйлийг ажигласан нь өдгөө "супернова" буюу шинэ од бий болох явц байлаа. Үүний талаар тэрээр шинжлэх ухааны үндэслэлтэй нийтлэл бичин, ном хэвлүүлэн нэрд гарсан юм. Улмаар Данийн хааны ивээлд багтан Ураниборгийн цайзыг өмчилсөн аж. Гэсэн ч тухайн үед шашныхан Христийн эргэн ирэлт буюу Армагеддон гэж Библи дээр бичсэн байдаг зүйл болох гэж байна гэж их шуугиснаас үндэслэн энэхүү зургийг бий болгосон юм.
...Т.Брахе Альхимич байлаа. Түүний дэлхийн өнцөг булан бүрээс цуглуулсан ургамал бүхий цэцэрлэг нь гагцхүү алт гаргаж авахад зориулагдан туршилтанд оролцож байлаа. Т.Брахе нэрт эмч байлаа. Түүний цэцэрлэгээс өнөөдөр олон улсын улаан номонд орсон үнэтэй ховор ургамлуудыг төвөггүй олж чадна, ямар өвчинд яаж хэрэглэх тухай өөрийнх нь бичсэн номууд ч тэнд хадгалагдан, өнөөгийн анагаах ухаанд үнэтэй хувь нэмрээ оруулсаар байна. Т.Брахе цаг уурч байлаа. Тухайн үедээ тэрээр дэлхий ертөнц, хүн төрөлхтөн ямар нэг механизмын дагуу, тодорхой зүй тогтолтой оршин байдаг гэж үзэн цаг уурыг урьдчилан хэлж, зурхайн ухаанд суралцаж байсан юм. Данийн хаан Кристиан IV-ий үхлийн дараа дараагийн хаан нь өөрийг нь хөөхийг ч мэдээд юмаа бэлдэж байсан гэдэг. Хэн мэдлээ....
Т.Брахе 1601 онд нутгаасаа хөөгдөн, Чехийн Прага хотноо нас баржээ. Түүний үхлийг түүний хамтрагч Т.Брахеийн хамтаар дэлхий болон зарим гарагийн хөдөлгөөний хурдыг математикийн аргаар тооцоолсон Кеплертэй хамаатай ч гэж үзэх нэг нь бий. Хамаг нэр хүнд, алдар гавьяаг өөрөө ганцаар авах гэж шүү дээ. Бас л хэн мэдлээ...

Coming Soon: Tун удахгүй!!!

2009-08-19T09:07:00.002+08:00

ДАХАУ - Хэзээ ч бүү март!!!

2009-08-19T08:30:00.001+08:00

Мюнхен хотоос 20 хүрэхгүй км-ын зайд Дахау хэмээх жижигхэн тосгон оршино. 40000 орчим оршин суугчтай уг хот нэг л зүйлээс бусдаар ялгагдаад байхааргүй энгийн нэгэн газар. Гэвч чухам тэр зүйл нь нийт хүн төрөлхтөнд өмнө нь гаргасан асар том нэгэн алдааг нь сануулж, ахин битгий давтаасай гэсэндээ үеийн үед, үүрд мөнх эмгэнэлт тэр он жилүүдийг чимээгүй өгүүлэн оршин байдаг юм. Миний өгүүлж буй газрын нэр нь Дахаугийн хорих лагер. Дэлхийн 2-р дайны үед Нацистуудын байгуулж барьсан хамгийн эхний бөгөөд хамгийн том хорих лагер....
...Энэхүү хорих лагерийг үзэхээр өдгөө дэлхийн өнцөг булан бүрээс ирэх жуулчдын цуваа тасралтгүй үргэлжилж, энэ жижигхэн тосгоны намуухан байдлыг үргээнэ. Энд халуун амиа алдсан 50 мянга орчим хоригдлуудын сүнсийг сэрээхгүй гэсэндээ, энд хоригдож зүрх сэтгэлээ алдсан 200 орчим хоригдлуудыг хойчийг зовоохгүй гэсэндээ тэнд дуу чимээ гарах нь ч ховор. Хэрхэн, яаж, яагаад гэдэг асуултууд өөрийн эрхгүй урган гарч, зэвүүцэл, уурлал, ухааралтай зэрэгцэн харамсал өөрийн эрхгүй төрнөм...
...Өмнө нь мянга мянган хоригдлуудын оршин суудаг байсан тэр байруудаас 2 нь үлдэн бусдынх нь балгасыг нь хэвээр үлдээн тохижуулжээ. Өглөө эрт босон жагсаад өөрсдийг нь шатаах чандарлах төв, өөрсдийг нь буудах зэвсгийн үйлдвэрт ажиллахаар бэлддэг байсан тэр талбайнх нь эргэн тойронд өндөр модод ургаж...Хааяахан гардаг байсан амралтаараа чадлаараа мөргөж, бүрхэгхэн ирээдүйгээ бурхандаа даатгадаг байсныг нь гэрчлэн 3 ч шашны урсгалын сүмүүд тэнд байрлана...

...Миний үзэх дуртай, үзээд уярдаг, уяраад уйлдаг, уйлаад ухаардаг кинонуудын нэгийг La vita è bella буюу "Амьдрал Сайхан" гэдэг. Энэхүү Итали киноны нэрийг сонсоод танд юу ч бодогдож болох ч ДАХАУ-д чухам тийм л зүйлийн үлдэгдлийг би харсан юм. Яг л тэнд гардаг шиг давхар орнууд, яг л тэнд гардаг шиг бохир угаалгын өрөө гээд л...Хэчнээн хүний нулимс тэнд асгарч, хэчнээн хүний амь тэнд тасарсан гэдгээс жихүүдэс хүрмээр...Өдгөө энэ бүхэн түүх болон нэгэнт хоцорч, чимээгүй аврал эрэн дүнхийн үлджээ...

...Хорих газрын түүх, элдэв тайлбарыг бичсэн замыг дагасаар бид цэцэрлэгт хүрээлэнд орж ирэх болно. Чухам тэндээс бид хоригдлуудыг буудаж, хоригдлуудыг тарчлааж, хоригдлууд дээр туршилт хийдэг байсан өрөөнүүдийг харж болно. Тэдэн дээр элдэв эм, бэлдмэлүүд туршин биологийн зэвсэг хийж, тэдэн дээр элдэв утаа, хийг хэрэглэн химийн зэвсэг бэлдэж байсныг гэрчилсэн өрөөнүүд энд бий. "Нэр нь үл мэдэгдэх хүмүүс"-т зориулсан оршуулгын цогцолбор энд бас бий. Учир нь энэ хорих лагерьт 20000 орчим хүн ор сураггүй алга болсон буюу цогцос нь олдоогүй тул тэднийг хүндэтгэн ийнхүү байрлуулсан аж. Салхины аясаар чимээгүй налайх эдгээр модод ярьдаг байсан бол ямар их "эмгэнэлт" түүхийг хүүрнэх байсан бол???
...Музей байрлах өрөөнд өмнө нь хорих лагер буюу бөөгнөрүүлэх зуслангийн удирдлагууд байрлан, зарим нэгэн туршилтын эрдэм шинжилгээний ажил хийгддэг байсан гэнэ. Энэхүү музейгээс бид дайны шалтгаанаас авахуулаад дайны явцийг мэдэх боломжтойгоос гадна энд хоригдож байсан зарим нэгэн онцлох хоригдлуудын тухай, тэдний бичиж байсан ном, тэмдэглэл, тэдний хэрэглэж байсан бал, шил, тэдний илгээж байсан ил захидал захиа гээд бүгдийг ховор ховор хуучны зурагнуудтай үзэх боломжтой. Хоригдлуудын сэтгэл санааг өөдрөг байлган үйлдвэрийн ажлын эрчимтэй явуулахын тулд "хөлбөмбөгийн тэмцээн" зохиож байсан баримт байхад тэдний ажлыг идэвхжүүлэхийн тулд харгислалын нэг хэлбэр болох "ташуурдалтанд" хэрэглэж байсан ташуур ч тэнд байна.
АНУ-ын цэрэг энэхүү хорих лагерийг 1945 оны 4-р сарын 29-нд АНУ-ын цэргийн 42-р дивиз чөлөөлсөн бөгөөд тэр үеэр авсан гэрэл зургийг энд орууллаа. Тухайн үед АНУ-ын цэргийн генерал, хожмын АНУ-ын ерөнхийлөгч Д.Эйзенхоуэрийн мэдээлснээр "Манай зэвсэгт хүчин тийм ч алдартай биш нэгэн хорих лагерийг чөлөөлөө, тэнд 32 мянга орчим хоригдол байлаа" гэж мэдээлж байлаа. Үнэхээр ч тэнд ширүүн тулалдааны эцэст АНУ-ын цэргийн 42-р дивиз орж ирэн хорих лагерийг чөлөөлөхөд 32000 хоригдол байсан бөгөөд 160, 160-аар нь 20 хуаранд оруулж байжээ. Энэ хотод 1948 он хүртэл АНУ-ын цэргийн бааз байрлаж байгаад оршин амьдрах боломжтой болж, хүмүүс нүүж ирсний дараа ч АНУ цэргүүд үлдэн бүр сургууль ч байгуулж байсан түүх бий. "Дахаугийн Хядлага" хэмээх нэр мөн эндээс үүдэлтэй. АНУ-ын цэргүүдийг бууж өгсөн байсан Германы 15 хамгаалагчдыг алсан гэж буруутгасан ч цэргийн шүүхээс тэдэнд ямар ч шийтгэл оноогоогүй аж....1933 онд байгуулагдахдаа Гитлерийн улс төрийн дайснуудыг хорьдог байснаа удалгүй Еврэйчүүдээр дүүрсэн энэхүү лагерийн жишгээр тухайн үед Европт нацистуудын маш олон лагерууд байгуулагдаж байсан аж. Одоо энд хоригдож байсан хоригдлуудын ажиллаж байсан цаасны үйлдвэр Дахау тосгонд байрладаг. ...Лагерийг тойруулан барьсан хананы дунд 7 ширхэг харуулын цамхаг байрлах бөгөөд тэндээс оргох гэж завдсан, эвгүй хөдөлсөн, сэжигтэй санагдсан хоригдлуудыг буудан хороож байсан гэж төсөөлөгдөнө."May be the example of those who were exterminated were between 1933-1945 because they resisted nacism help to unite the living for the defence to peace and freedom and in respect for their fellow man"
"Пусть пример тех борцов против нацизма кто был замучен здесь с 1933 по 1945 год объединит живых в борьбе за мир за свобод за уважение в человеческой личности"
"Нацизмаас татгалзан эсэргүүцэж, элэг нэгт хүн төрөлхтний энх тайван болон эрх чөлөөний төлөө тэмцснийхээ төлөө 1933-1945 онуудад халуун амиа алдсан хүмүүсээс жишээ авцгаа"
"Arbeit Macht Frei" - "Хөдөлмөр эрх чөлөөг авчирна"...Энэхүү уриа Нацистийн бүх хорих лагеруудын үүдэнд байдаг байсан аж. 1872 онд Германы зохиолч Лоренц Диефенбах өөрийн зохиолыг үүгээр нэрлэсэн байдаг бөгөөд Дэлхийн 1-р дайны үед Германыг нөмөрсөн хямралын үеэр бүх нийтээр эрх тэгш хөдөлмөрлөн, хөдөлмөрөө улс орондоо зориулж чадвал үйлдвэрлэл нэмэгдэн, ажилгүйдэл буурна гэсэн утгатайгаар Германы удирдагчид хэрэглэж ирсэн бөгөөд Нацист нам ч үүнийг нь авч хэрэглэсэн аж. Энэ үг хоригдлуудад бага ч гэсэн сэтгэлийн тэнхээ, итгэл найдвар өгдөг байсан нь гарцаагүй биз...

Дахау одоог хүртэл хүн төрөлхтөнд өөрсдийнх нь өөрсдийхөө гараар бий болгосон аймшигт явдлыг сануулан эмгэнэлтэй хэрнээ гашуун түүхийг агуулан чимээгүй оршсоор...

SoccerReview: Audi Cup-2009

2009-08-14T03:23:00.001+08:00

2009 оны 7-р сарын 29. Дэлхийн автомашин үйлдвэрлэлийн томоохон нүүр царайнуудын нэг АУДИ корпораци байгуулагдсны 100 жилийн ойн нэрэмжит хөлбөмбөгийн АУДИ КАП-2009 тэмцээнд оролцохоор Английн Премьер Лигийн аварга Манчестер Юнайтед, Аргентин төдийгүй Өмнөд Америкийн хөлбөмбөгийн хамгийн цуут багуудын нэг Бока Жуниорс, Италийн Серие А-ын лидерүүдийн нэг АС Милан багууд Германы Бундеслигийн мөнхийн лидер Байерн Мюнхен клубын цэнгэлдэх хүрээлэн болох Аллианз Аренад 69000 хөгжөөн дэмжигчийн өмнө шинэ улирлын өмнөх хамгийн том тоглолтуудаа хийхээр цугларчээ. Тив хоорондын тэмцээний 4 аваргын хооронд болсон энэхүү тэмцээнийг миний бие үзэх завшаан тохиолдож, Аллианз Аренад үзсэн сэтгэгдэл болон товч тойм, дүгнэлтийг та бүхэнд хүргэж байна.
--------------------------------------------------------------------------------------------------------------------------------------------------------- Тэмцээний өмнө
АУДИ корпораци энэ жилийн эхээр тэмцээний товыг зарлан багуудаа урихдаа дэлхийн хөлбөмбөгийн өнгийг тодорхойлогч 3 шилдэг хөлбөмбөгчид буюу Манчестерийн К.Роналду, Миланы Кака, Байерны Ф.Рибери нарыг нэгэн зэрэг цуглуулан 100 жилийн ойн ажиллагаагаа бэлдсэн ажээ. Харамсалтай нь сүүлийн 2 жилийн ФИФА-ийн оны шилдэг хөлбөмбөгчид болох Кака, Роналду нар Испанийг Реал Мадридын төлөө зорин, Ф.Рибери гэмтлийн улмаас тэмцээнд тоглох боломжгүй болсон юм. Гэсэн ч тэмцээн мэргэжилтнүүд болон хөгжөөн дэмжигчдийн таамаглаж байсанчлан Европын шинэ улирлын өнгийг тоорхойлж болохуйц тулаанууд энд өрнөсөн юм.
Хамгийн сонирхол татаж байсан асуудал бол Какагүй Милан, К.Роналдугүй МанЮ ямар тоглолт үзүүлэх нь байсан ч мөн үүнээс дутахгүйгээр Байерны шинэ дасгалжуулагч "тактикийн мэргэжилтэн" Луй Ван Гаалийн анхны "шалгалтаа" хэрхэн өгөх вэ гэдэг нь анхаарлын төвд байлаа. Өмнөд Америкийн төлөөлөл Бока Хуниорсийн хувьд шинэ улирал болон Либертадоресийн тэмцээний бэлтгэлээ хангах болон тэдний лидер Хуан Рикельме ДАШТ-ий сонгон шалгаруулалтанд амжилт муутай тоглож, одоо бүр шигшээ тэмцээнд оролцож чадах уу гэдэг дээрээ тулсан Аргентины шигшээд үнэхээр хэрэгтэй эсэхийг Европчуудын хувьд шинжих нэг ёсны боломж болох байлаа.
--------------------------------------------------------------------------------------------------------------------------------------------------------
- Хагас шигшээ тоглолтууд
Тэмцээний сугалааг энэ оны 3 сард Женевийн Мото Шоун дээр 4 багийн төлөөлөл болон Байернаас У.Саньол, МанЮ-ийн У.Броун, Бокагийн гүйцэтгэх захирал К.Бианчи, Миланы Г.Гаттузо нар татаж нээлтийн тоглолтыг Бокачууд ПЛ-ийн аварга Манчестер Юнайтедийн эсрэг хийх болсон бол талбайн эзэд Миланы эсрэг тоглож хэн нь цом булаалдах боломжтой үлдэх вэ гэдгээ шийдэх болсон юм.
Богино хэмжээний нээлтийн үзүүлбэрийн дараа АУДИ корпорацийн ерөнхийлөгч .......... үг хэлэн тэмцээнийг нээсэн. Урьдчилан таамаглаж байсанчлан Манчестер үндсэн бүрэлдэхүүний хэд хэдэн тоглогчоо амраасан ч хүчирхэг хэвээр л байсан бол Бока үндсэн багаа илгээсэн байлаа. Эртнээс өст Аргентин-Английн хамгийн хүчирхэг 2 клубын тоглолт Рикельмегээр удирдуулсан Бокагийн ялимгүй давуу тоглолтоор эхэлсэн ч 23 дахь минутанд Бразилийн залуу хагас хамгаалагч Андерсон хаалганы 90-ийн буланд гайхалтай хаалттай цохилтыг гүйцэтгэн гоол оруулснаар "улаан чөтгөрүүд" тоглолтыг тэргүүлж эхэлсэн. Удалгүй энэ жил шинээр Уиганаас худалдан авсан, хожмоо К.Роналдугийн үлдээсэн зайг нөхөх учиртай А.Валенси баруун жигүүрээс ухаалаг довтлогоогоороо гоол хийн тооны зөрүүг 2:0 болголоо. 2-р үе эхлээд удалгүй тоглолт нь илт сэргэж, довтлогоо нь эрчимжсэн Аргентинуудын баруун жигүүрийн довтлогоо амжилттай болж Инсуа багийнхаа эхний гоолыг оруулсан ч энэ нь тэдний сүүлчийн амжилт байсан юм. Тэд хэдийгээр бөмбөгийг илүүтэй эрчимжиж, арай идэвхтэй тоглосон хэдий ч үеийн үед найдвартай хамгаалалтаараа гайхагддаг Сир Фергюсоны шавь нар ахиж алдаа гаргасангүй. Бокад сэргэлт арай эрт хэрэгтэй байж, магадгүй 1-р үеийн төгсгөлд үзүүлсэн унтаа тоглолтынхоо оронд...Эцсийн дүн МанЮ 2 - Бока 1.

Манчестер Юнайтед- Бока Хуниорс 2-1 (2-0)
Манчестер Юнайтед Кущчак- Да Сильва (Эвра 77), Кэткарт, Броун (Фердинанд 35), O’ши - Пак (Бербатов 67), Кэррик (Скоулз 77) , Aндерсон (Флечер 77), Валенси (Гиггз 67) - Македа (Нани 67), Рууни

Бока Хуниорс Аббондансьери - Морел, Форлин, Касерес, Сото - Инсуа (Гентан 68), Баттаглиа, Рикельме (Mарино 88), Диаз (Чавез 46) - Палермo (Виатри 82), Нойр (Моуше 46)

Гоолууд: 1-0 Aндерсон (21), 2-0 Валенси (42), 2-1 Инсуа (55)

Энэ тоглолтын дараа 30 минутын завсарлагааны эцэст Аллианз Аренад цугласан жаран мянга хөгжөөн дэмжигчдийг дийлэнхийх нь, мөн миний ч хамгийн хүсэж байсан тоглолт Байерн өөрийн Европын тавцан дахь гол өрсөлдөгчдийн нэг Милантай хийх тоглолт эхэлсэн. Ихээхэн итгэл хүлээлгэж авчирсна голланд мэргэжилтэн болон түүний шинэ болон хуучин цэргүүд энэ өдөр үнэхээр одтой байж Миланы улирлын өмнөх 4 ч тоглолт дараалан ялагдаад байсан цувралыг бут ниргэлтээр 5 болгон нэмсэн юм. Тоглолтын эхний гоолыг сүүлийн үед илт сайжран, үндсэн бүрэлдэхүүнд багтах болоод байгаа залуу довтлогч Т.Мюллер оруулсан бол 2-р үеийн 80 дахь минутанд Б.Швайнштейгер гайхалтай хувийн тоглолтоороо 4 ч Россонериг хууран хөнгөхөн гэгч нь 2 дахь гоолыг хийлээ. уг гоолоос тун удалгүй Милан тийм амархан бууж өгөхгүйгээ харуулан багийн хөдөлгүүрүүдийн нэг А.Пирло нь хаалттай цохилтоос тун хүчтэй бөмбөгийг Х.Буттийн хаалганд зоож хийсэн боловч сэлгээгээр орж ирсэн С.Сене хэний ч танихгүй хэмээх Сенегал залуу багийнхаа 3 дахь бөмбөгийг, эхний гоолын эзэн Т.Мюллер 4 дэх бөмбөгийг хоорондоо ердөө 2хон минутын зайтай хийснээр тоглолтын цэгийг тавьж цэнгэлдэхэд хуран цугласан хөгжөөн дэмжигчдийн цөсийг хөөргөж, оргил цэгт нь хүргэсэн билээ.
Бараг 4хэн бөмбөг алдсан нь аз гэмээр тун муу тоглолтынхоо дараа АС Милан /тэднийг шахуу хуваарийн гайгаар ядралттай байсан гэж зөвтгөх гэж оролдъё/ АУДИ КАП-ын хүрэл медалийн төлөө МанЮ-г чамгүй сандаргасан Бокатай хийх болсон бол Байернчүүд өөрсдийн хамгийн том өрсөлдөгчдийн нэг МанЮ-тай аваргын цомын төлөө тоглох боллоо.

Байерн Мюнхен - АС Милан 4-1 (1-0)
Байерн Мюнхен Бутт - Лам, Ван Буйтен (Демичелис 64), Бадстюбер (Брено 64), Браафхэйд (Швайнштейгер 46) - Алтинтоп (Тимощук 64), Ван Боммель (Oттль 64), Соса (Баумиоанн 64), Праньич - Мюллер, Гомеш (Сене 80)

АС Милан Сторари - Замбротта (Kaлазе 74), Неста (Oнеэвү 64), Tиаго Сильва (Ди Геннаро 74), Фавалли (Оддо 64) - Абате (Антонини 74), Фламинин, Пирло, Янкуловски (Гаттузо 46) - Роналдиньо (Борриелло 46), Пато

Гоолууд: 1-0 Mюллер (12), 2-0 Швайнштейгер (79), 2-1 Пирло (81), 3-1 Сене (89), 4-1 Mюллер (90)

- Финал
Серие А-ын гигант Милан формондоо орохгүй хэвээр л. Тэд Ауди Кап тэмцээний 3-р байрын төлөө тоглолтонд Бокад торгуулийн цохилтоор хожигдсноор ялалт аваагүй тоглолтын тоо 6-д хүрэв. Байернаас хүндхэн хожигдол авсны дараа энэ өдөр гайхалтай тоглолтыг талбайн эхэнд үзүүлсэн. А.Патог энд дурьдая, тэр эхний 10 минутанд төдийгүй тоглолтын турш маш сайн тоглолтыг үзүүлсэн. Эцэст нь 24 дэх минутанд энэ жил шинээр худалдан авсан Бразилийн Тиаго Сильва гоолын салхийг хагалан Милан хошуучилж эхэллээ. Үүний дараа илт сэргэсэн Милан Роналдиньо-Пато нарын хэд хэдэн довтлогооны дараагаар зөрүүг улам нэмэх боломжтой байсан ч хаалгач Р.Аббондансьери энэ өдөр одтой байв. 2-р үеэс Бокагийн дасгалжуулагч А.Базиле тактикийн хэд хэдэн сэлгээ хийн, уйгагүй довтолсны хүчинд 87 дахь минутанд Лукас Виатри залуу хаалгач М.Стораригийн хаалгыг мялааснаар үндсэн цаг 1:1-ээр өндөрлөж, тэмцээний дүрмийн дагуу торгуулийн цохилтоор ялагч тодрох болсон. Ингээд торгуулийн цохилтоор ялагчийг тодруулахад тоглолтын турш сайн тоглолтыг үзүүлсэн Патогийн цохилтыг хашир хаалгач Р.Аббондансьери хааснаар энэ тоглолт өндөрлөсөн юм.
Харин Аваргын төлөө тоглолт Манчестер Юнайтед болон Байерн Мюнхены хооронд өрнөсөн. 2 багийн дасгалжуулагчид өмнөх тоглолтонд бүтэн тоглосон тоглогчдоо амраан, сэлгээнээс гарч хангалттай тоглолт үзүүлсэн зарим тоглогчдыг гаргасан. Тоглолтын эхний үе Байернчүүдийн ерөнхий давамгайлал дор болж, М.Гомеш болон Б.Швайнштейгер нарын довтлогоо гоол болоход ойрхон байсан бол 2-р үед МанЮ илүү тоглолтыг гарган У.Руни, М.Оуэн нар гайхалтай боломжуудыг алдснаар тоглолт өмнөх тоглолтын адил торгуулийн цохилтоор шийдвэрлэгдэх болсон. Ингээд торгуулийн цохилтыг цохиход Эвра, Праньич нар 2-уул дараалан алдаж, улмаар залуу хаалгач М.Ренсинг МанЮ-ын хамгаалагч Ж.Эвансийн цохилтыг хааснаар Л.Ван Гаалийн удирдсан Байерн анхныхаа цомыг өргөсөн юм.

Байерн Мюнхен - Mанчестер Юнайтед 0-0 (7-6 т.ц)
Байерн Мюнхен Ренсинг – Лам (Горлиц 62), Демичелис (Ван Буйтен 62), Брено (Бадстюбер 62), Браафхейд – Тимощук (Оттль 77), Ван Боммель (Алтинтоп 46), Баумиоанн, Швайнштейгер (Праньич 62) – Мюллер (Сене 77), Гомеш (Соса 62)

Mанчестер Юнайтед Ван дер Сар – Гибсон (Валенси 63), Эванс, Фердинанд (Кэткарт 69), Эвра - Нани, Флечер, Скоулз, Гиггз – Бербатов (Андерсон 78), Оуэн (Рууни 78)

Гоолууд: Торгуулийн цохилт: 0-1 Гиггз, 1-1 Баумиоанн, 1-2 Андерсон, 2-2 Браафхейд, 2-3 Нани, 3-3 Алтинтоп, Эвра /алдсан/, Праньич /алдсан/, 3-4 Рууни, 4-4 Соса, 4-5 Флечер, 5-5 Оттль, 5-6 Скоулз, 6-6 Бадстюбер, Эванс missed, 7-6 Ван Буйтен
--------------------------------------------------------------------------------------------------------------------------------------------------------
СЭТГЭГДЭЛ
Энэ өдрийг би хэзээ ч мартахгүй биз ээ...Олон жил хөлбөмбөгөө үнэнчээр сонирхож, ухаан орсон цагаасаа Байерн ФС-ийг унаж тусаж, ухарч уруудаж, мандан дэвжиж, дэвшин шуугиулж байх ямар ч үед нь хаялгүй дэмжин, тэдэнтэй сэтгэл зүрхээрээ цугтаа байж, тэдэнтэй хамт харамсч, тоглож, уйлж, ухаарч, баярлан,хөөрч явсны хэрэг тэр өдөр гарсан болохоор би тэгж бичсэн юм...Тэр өдөр жинхэнэ Мөрөөдлийн тоглолтууд Аллианз Аренад болсон юм...
... Аллианз Аренагийн хувьд 69000 хүний суудалтай 2005 онд ашиглалтанд орсон, Байерн Мюнхен болон Мюнхен 1860 багууд хамтран эзэмшдэг..Мюнхенд төвтэй дэлхийн санхүүгийн хамгийн том үйлчилгээний байгууллагуудын нэг Аллианз корпораци энэ стадионыг өөрийн нэрээр өмчлөх эрхийг 30 жилээр худалдан авсан ажээ...Энгийн үедээ буюу өдрийн цагаар цагаан өнгөтэй...Харин шөнө болохоор 3 өнгөнд хувирдаг,Байерны тоглолт явагдах үеэр улаан, Мюнхен 1860-ын тоглолтын үеэр хөх, цэнхэр,харин шигшээ баг тоглолт хийх үеэр цагаан-шаргал өнгөтэй болдог... Сонирхуулж хэлэхэд Аллианз Аренагийн паркинг буюу машины зогсоол нь Европдоо хамгийн томд тооцогддог гэж байгаа, 4 хэсэг 10000 машины зогсоолтой... Мөн цэнгэлдэх дотор зарагдаж байгаа бүх юмс зөвхөн АренаКард-аар тооцоо нь хийгддэг...Ийм кард аваад түүндээ мөнгө хийж цэнэглээд, ундаа ус, пиво, хоол нтр гээд бүх юмаа авдаг системтэй нь нэлээн таалагдсан... ...Талбайн эзэд яагаад давуу тоглодгийн учрыг бараг тэнд ойлгосон, тасралтгүй багийнхаа дууг дуулж, хөгжөөн дэмжих нь гайхалтай. Тоглогчдынхоо нэрсийг үзэгчид нь нэгэн дуугаар зарлаад л бас сүртэй юм...1-р үед эхэлсэн стадионы давалгаа шүүгчийн шүгэлийн дуугаар л нэг юм зогсож, 2 талаас БАЙЕРН гэж орилох үзэгчдийн дуу, бөмбөг оруулах, амжилттай довтлогоо, хамгаалалт хийхэд баяр хүргэх гээд энд бүх юм онцгой байлаа...
--------------------------------------------------------------------------------------------------------------------------------------------------------
- Дүгнэлт
Дүгнэлт 1: Хаагдахад сар хүрэхгүй хугацаа үлдээд байгаа наймааны зах зээл дээр идэвхтэй ажиллахгүй бол Миланы хувьд энэ улирал түн хүнд өнгөрөх шинжтэй байна. Хэдийгээр И.Абате, М.Сторари нарын залуус нь эрийн цээнд хүрч гараанд гаран тоглож байгаа ч энэ нь Серие А-д хангалтгүй нь тодорхой. Гэссэн ч С.Берлускони клубээ хамгийн шилдэг нь хэмээн зүтгэсээр л. К.Анчелоттигийн халааг авсан залуухан дасгалжуулагч Леонардо харин үүний эсрэг бодолтой байгаа ил тод илэрхийлж байгаа нь сайшаалтай ажилгүй жаахан алдаа гаргавал ажилгүй болчих эрсдэлтэй тулгарч байна. Саяхан Реал Мадридаас голландын К.Хунтелаарыг авсан нь тэдний хүчийг эрс нэмэх нь тодорхой бөгөөд А.Патогийн хамт аюултай довтлогооны хослолыг бүрдүүлэх биз. Холбоодын цомын тэмцээний үеэр гялалзсан Т.Сильваг авснаар дундын шугам мэдэгдэхүйц хүчирхэгжсэн ч Какагийн үлдээгээд явсан тэр орон зайг ойрын үедээ хэн ч өглөж чадахгүй байх. М.Фламиниг ашиглан, А.Пирлог байнгын формтой байлгаснаар, хамгийн гол нь тоглогчид нь гэмтэл авахгүй бол амжилтанд хүрэх илүү боломжтой болох учиртай. Түүнийг явснаар өөр нэг Дэлхийн шилдэг хөлбөмбөгчин Роналдиньогийн үүргийг нэмэгдүүлэх бодолтой тухайгаа Леонардо зарласан. Юутай ч амьд домог Мальдинигүй, хөлбөмбөгийн шидтэн Какагүй, тактикийн мастер Анчелоттигүй Миланыг энэ жил хэрхэн тоглохыг чухамхүү дээрх тоглогчдын форм болон дасгалжулагчийн мэргэн ухаан харуулах биз.
Дүгнэлт 2: К.Роналдугийн дараах МанЮ хэр тоглох бол гэсэн бодол хэн бүхний сонирхлыг татаж байлаа. Энэ тэмцээнд үзүүлсэн тоглолт тэдэнд зарим хариултыг өгсөн биз. А.Валенсигийн форм яг одоогоор маш сайн байна, тэр хэдийгээр CR7 шиг гоол хийхгүй байж болох ч түүний өгдөг дамжуулалтыг, түүний үзүүлэг уран тоглолтыг үзүүлж чадах мэт санагдаж байна. Дээрээс нь алтан жаал М.Оуэн тэдэнд ирсэн, хүн бүхэн түүнийг сайн тоглоно хэмээн дэмжиж, өөрөө ч дараагийн ДАШТ-д орохыг маш их хүсч байгаа нь тодорхой тул У.Руни, Д.Бербатов нартай цуг аюултай довтлогооны шугамыг бүрдүүлэх биз. Залуу хамгаалагч Кэткарт анхны том тоглолт гэхэд чамлахааргүй тоглолт үзүүллээ, Ж.Эванс, Ж.Оши нар шиг МанЮ-ын академийн бүтээгдэхүүн түүнээс их ирээдүй ханхалж байна. Дээрээ нь О.Харгривз эргэж ирнэ, Андерсон Нанид өөрийгөө харуулах боломж гарч ирсэн гээд тэднийг битгий тооцооноосоо хасаарай, улаан чөтгөрүүд хэзээд шилдгээрээ л байдаг.
Дүгнэлт 3: Байерн Европын дэвжээнд эргэн ирэхэд ойртжээ. Аяксийн залуусын дасгалжуулагч, Барсагийн өнөөгийн стилийн эхлэлийг тавилцсан, АЗ хэмээх хэний ч мэдэхгүй багийг Голланд төдийгүй Европын тавцанд таниулсан Л.Ван Гааль тэднийг дасгалжуулж байна. Дээрээс нь Европын хамгийн шилдэг хагас хамгаалагчдын нэг А.Тимощук, гоолич хэмээх Олич, германы хамгийн шилдэг довтлогч гэж хэлж болохуйц М.Гомеш гээд 7 шинэ хүнээр тэд хүчээ сэлбэсэн. Үүн дээр нэмээд залуусыг нь дурьдахгүй бол алдас болох биз. Германы шигшээгийн ирээдүйнүүдийн нэг Баумжо, Т.Мюллер, Х.Бадстюбер нарт боломж олговол тэд алдахыг хүсэхгүй нь лавтай. Гэсэн ч Лусиогийн үлдээсэн орон зайг хэн нөхөх нь тодорхойгүй л байна, одоог хүртэл яагаад явуулсныг нь хэн ч ойлгохгүй хэвээр л...

А.Ундрал /"ХӨЛБӨМБӨГ" сонинд...2009-08-12/

Мюнхен - Дюсселдорф - Копенгаген - Мальмо - Ландскрон

2009-08-10T10:56:00.000+08:00

Шинэ долоо хоногийн мэндийг хүргэе... Уундаа нь Шведэд ирчихсэн нийтлэлээ бичиж байнаа...Уул нь 3 хоногийн өмнө ирсэн л дээ, гэхдээ блогоо шинэчлэх гэж бөөн юм болсоор байгаад одоо л бичиж байна. Мюнхенээс 2 дамжиж онгоцоор Данийн нийслэл Копенгагенд ирээд түүнээсээ гүүрээр /!!??!!/ Шведийн өмнөд эрэг Сканегийн нийслэл Мальмогоор дамжин улмаар Ландсроне хотод ирж байрлалаа. Ингээд аяллын үеэр авсан хэдэн зургийг тавьж байна, тун удахгүй Европын хамгийн анхны одон орон судлалын ажиглалтын төв дээрээс хийсэн нийтлэлээ сонирхуулах болноо...

...Германдаа хамгийн хямд бөгөөд найдвартай агаарын тээвэрт тооцогддог ЭйрБерлины онгоцоор Германы хойд хэсгийн Дюсселдорф хотыг зорилоо, бас л далавчтай ойрхон, гэхдээ хойд талд нь суулаа......Дюсселдорфын Олон улсын онгоцны буудал...1927 онд анх байгуулагдсан, Германы 3 дахь том онгоцны буудал...орчин үеийн маш сонирхолтой дизайнтай барилгатай...өдөрт 750 орчим нислэг буулт хийгддэг, өнгөрсөн жил л гэхэд 18 сая зорчигч энэ буудлаар дайрсан гэж байгаа......Хэхэ, энэ Дани-Шведийн тэнгэр.....Энэ бол Дани-Шведийг холбодог Оресундын гүүр...Европын хамгийн урт гүүрт тооцогдоно, 2 давхар замтай, дээгүүрээ машины зам, доогуур нь галт тэрэгний зам явдаг...дараа нь яг дээрээс нь зураг авах төлөвлөгөөтэй байгаа..Үүний ачаар өртөг хямдтай Шведэд амьдардаг хүмүүс цалин өндөртэй ч өртөг өндөр Данид ажиллах боломжтой болсон гэж байгаа...

...Заа ингээд Дэлхийн хамгийн "цэвэр-ногоон" хот Копенгагенд буулаа...Яг л Англид ирчихсэн юм шиг бүх юм нь англиар байсан нь таатай санагдсан, онгоцны буудал нь 25 онд байгуулагдсан, Скандинавын орнуудынхаа дунд хамгийн ачаалалтайд тооцогддог...өнгөрснө жил л гэхэд 21 сая хүн үйлчлүүлсэн тоо баримттай...

...Онгоцны буудлаасаа шууд галт тэрэгний замаар өнөөх Оресундын гүүрээр дамжаад Мальмо ордог...Онгоцны буудлаас Мальмо хүртэл 24 км гэж байгаан...галт тэрэг нь ч гэсэн миний одоогоор суугаад байгаа хамгийн тохитой, тохилог нь гэж дүгнэсэн хэхэ...Яг одоо Уундаа нь Ландскрон хотод байрлаж байна, энд манай эгчийнх амьдардаг юм. Энэхүү хот нь маш түүхтэй, аль дундад зууны үеэс Швед болон Данийн хооронд эцэс төгсгөлгүй үргэлжилсэн дайны гол цэг, талбар болж байснаараа онцлогтой. Тиймдээ ч энд Данийн хаан Криастан IV-ий барьж байгуулсан цамхаг, хэрэм бий. Мөн энэ хот нь жуулчдыг өөрийн онцлог хэв маягаа хадгалж үлдсэн хуучны барилгуудаараа татдаг бөгөөд яг одоо Серфингийн спортын ДАШТ болж байсныг доор зурган дээр хальт орууллаа. Ландскроны зурагнуудын эхний хэсэгт тэнгисийн эрэг дээрээс наран мандахыг авсан болон Жонатан Ливингстон цахлайтай /хэн гэдгийг нь мэдэх нэгэн нь мэдэх биз дээ хэхэ.../уулзсан зурагнууд байгаа болноо...

MusicReview: Хотын нэрээр нэрлэгдсэн топ 5 дуу

2009-08-10T10:17:00.002+08:00

Өөрийн гэсэн блогтой болчихоод хүссэн зүйлсээ, сонсдог хөгжмөө, сонирхдог спортоо аль эсвэл шинэ мэдээг, гайхалтай бүтээлүүдийн талаар өөрийн үзэл бодлоо, шүүмжлэлээ хуваалцах юмсан гэж бодож явсан хүсэл маань биелэх боломжтой болжээ. Хөгжмийн талаар шинэ мэдээг хүргэх олон сайт байгаа болохоор би "шавар хаагаад" яахав, харин долоо хоног болгон MusicReview булан хөтөлж, өөрийн дотоод ертөнцөөсөө хөгжимтэй холбоотой бүгдийг хуу хаман гарган ирж бичих болно. Ингээд эхнийх нь "Хотын нэрээр нэрлэгдсэн шилдэг 5 дуу"...Бараг хамтлаг болгонд шалтгаан нь янз бүр хотуудын нэрээр нэрлэгдсэн дуунууд байдаг. Э.Преслид Вива Вегас, Фредди Меркурид Барселона гээд л сүүлд Эдиторсийн Мюнхен, Weezer-ийн Беверли Хиллз гэх мэтээр энэ цуврал тасралтгүй үргэлжилнэ. Яагаад ч юм аялж байгаа болохоор, тэгээд ч илүү сонирхолтой байх болов уу гээд эдгээр дуунуудыг нэрлэж байна...

5. The Reindeer Section - Budapest
Магадгүй та энэ хамтлагийн талаар хэзээ ч сонсоогүй байх, ер нь ч сонсохгүй ч байх магадлал тун өндөртэй. Учир нь Шотландын энэ хамтлаг хамгийн сүүлд 2002 оны 12 сард хамтдаа тоглосон юм. Гэвч та ямар үнэтэй эрдэнэсийг анзааралгүй өнгөрүүлэх гэж байснаа энэ дууг нь сонссоны дараа мэдэх болно. Ахархан хугацаанд нийлэн, цөөхөн хэрнээ чанартай уран бүтээл хийсэн энэ хамтлагийн талаар тийм ч их мэдээлэл байдаггүй.
2001 онд бидний сайн мэдэх "Run", "Chasing Cars" зэрэг дуунуудын эзэн Snow Patrol хамтлагийн гоцлол дуучин Gary Lightbody архи уун, бага зэрэг халамцсан байх үедээ тэнд байсан хөгжимчид, дуучдад хандан "Алив бүгдээрээ нийлээд цомог гаргацгаая л даа" гэж хэлэхэд "Тиймээ, тэгье" гэж тэнд байсан хүмүүс нь дэмжснээр энэ "аварга" хамтлаг байгуулагдсан түүхтэй. Маргааш нь хуучин гитараа аваад Lightbody шинэ цомгондоо дуунууд зохиож эхэлсэн юм. 20 хамтлагийн 47 хөгжимчин, дуучин оролцосн Y'All Get Scared Now, Ya Hear! цомог тэр оныхоо 10 сард гарч шүүмжлэгчдээс багагүй үнэлгээ авчээ. Дараагийн цомгоо 2002 онд гаргасан тус хамтлагийн ихэнх дууг Gary Lightbody зохиож, найруулж, үгийг нь бичиж, дуулсан байдаг. Тухайн үед Snow Patrol хамтлаг төдийлөн нэрд гараагүй, Polar Bears нэртэйгээр амжилтанд хүрч чадаагүй 2 ч цомог гаргаад байсан бөгөөд магадгүй энэ төсөл тэдэнд их туршлага өгч, хожмын амжилтын үүдийг ч нээсэн байж болох юм. The Son Of Evil Reindeer хэмээх 2002 онд гаргасан сүүлчийн цомогт нь багтсан Будапешт дууны хувьд намуухан эхлэл бүхий гунигтай үгсийг танд эмэгтэй арын хоолой болон дахилтанд гарч ирэх хоор хамтлагийн хамтаар танд Gary Lightbody хүргэх болно. Утгын хувьд Унгарын нийслэлтэй ямар ч холбоогүй, харин хайрын тухай, хайртайгаа учирсан хэдий ч түүнийгээ илэрхийлэх гэж хэрхэн зовж байгаа хүний тухай дуу гэж ойлгогдмоор...Бүрээ, хонхыг ашиглан гитарын аялгууг чимэглэсэн энэ дуу миний хувьд тус хамтлагийн хамгийн сайн уран бүтээлүүдийн нэг...Бүр ихийг сонсохыг хүсвэл цомгийг нь ч тавьж болох юм, Your Sweet Voice, Grand Parade-ийг заавал сонсоод үзээрэй...Будапешт-Хотуудын нэрээр нэрлэгдсэн хамгийн шилдэг дуунуудын жагсаалтын 5-рт орлоо...
ТАТАХ
--------------------------------------------------------------------------------------------------------------------------------------------------------
4. Coldplay - Cemeteries of London
Гоцлол дуучин Chris Martin-ий өөрийнх нь хэлснээр "Өнөөдрийн дэлхийн хамгийн шилдэг рок хамтлаг, гэхдээ U2-г амарч байх хооронд" гэж энэ жилийн Грэмми авч байхдаа тодорхойлж байсан Coldplay хамтлагийг мэдэхгүй хүн ховор биз. Тэгвэл тэдний дэлхий даяар шуугиан тарьж 2008 онд л 8 сая хувь зарагдсан Viva la Vida and Death and All His Friends цомогт багтсан Cemeteries of London дууг уг жагсаалтандаа оруулж байна.
Басс гитарчин Guy Barryman нэгэн сэтгүүлд өгсөн ярилцлагандаа "Би энэ дууг сонсон төсөөлөхөд 19-р зууны үеийн Лондон санаанд буудаг. Асгартал цутгарах бороо, хар малгатай хүмүүс..." гэж хэлсэн байдаг. 1800-аад оны үед чөтгөр шуламд итгэх, үл итгэх явдал их байсан тухай сонирхсон Крис Мартин түүнийгээ уг дуугаар илэрхийлсэн гэж өөрөө хэлсэн байдаг. Өөрийн албан ёсны сайтаараа дамжуулан 2007 оны 7-р сард шинэ цомгонд Испани, Латин Америк стилийн өвөрмөц дуугаралтыг оруулахаар бэлдэж байгаа гэж мэдэгдсэн бөгөөд Фламенго алга ташилтыг ашигласан энэ дууныхаа бичлэгийг Испанид бүр тодруулбал Барселонагийн сүмд хийсэн аж.
...19-р зууны Лондон. Хүйтэн чулуун байшингууд, өтгөн тарсан битүү манан...Жихүүдэс үлээм салхи хуучин муу замаар дагуулан оршуулгын газарт аваачих болно...Эл хуль чимээгүй, эргэн тойронд юу ч байхгүй, үхдэлүүд...Үхдэлүүд дуулна, бурхдыг харсан гэж дуулна, сүнс нар эргэлдэнэ, амилахыг хүсэн уйлалдана...Лондоны шөнө, Лондоны оршуулгын газар...
ТАТАХ

--------------------------------------------------------------------------------------------------------------------------------------------------------
3. Muse - Stockholm Syndrome
Энэ бол анагаах ухааны салбарт хүлээн зөвшөөрөгдсөн, сэтгэл зүйн шинжлэх ухаанд харьяалагдах өвчний нэр юм. Шведийн Стокхольм хотын Норрмалсторг хотын Кредит банкийг дээрэмдсэн хэрэг 1973 оны 8-р сарын 23-нд гарч, бараг бүх ажилчид болон үйлчлүүлэгчдийг барьцаалсан бөгөөд 1978 оны 8-р сарын 28-нд суллажээ. Гэтэл суллах үед хохирогчид өөрсдийг нь олзолсон хүмүүсийг хамгаалж, сэтгэл санааны хувьд тэдний талд орсон байсан бөгөөд үүнийг тус хэргийн үеэр цагдаагийнханд тусалж байсан сэтгэл зүйч Нильс Бьернот "Стокхольмийн Синдром" гэж анх нэрлэжээ. Хэдийгээр олзны хүмүүс бүгд эсэн мэнд гарсан ч нэг нь амиа хорлож, нэг нь өөрийг нь барьцаалаад, алга болсон хүний нэрээр өөрийнхөө нэрийг сольсон байсан юм. Энэхүү өвчин нь сексийн хүчирхийлэлд их гардаг бөгөөд өөртэй зүй бусаар харьцсан хүмүүсийг хаацайлах, нуух, тэдний талд орох зэргээр илэрдэг аж. Товчоор хэлбэл өөрийг чинь хорьж, дээрэлхэж байгаа хүнийг хайрлах үзэгдэл гэж хэлж болно.Амьдаараа хамгийн сайн дуулдаг хамтлагуудын нэг болох Muse-ийн 3 дахь студийн цомог Absolution цомогт орсон энэ дуунд чухам дээрх үзэгдлийг дуулах болно. Өөртэйгөө тэмцэлдэж, нэг уурлан-тэмцэж-эсэргүүцэх ч нэг хайрлан-мөрөөдөж-дурлаж буй эмгэнэлт эмгэгт хүний тухай тэд дуулна. Гитарын жинхэнэ-мюзе дуугаралтыг М.Белламигийн өвөрмөц-аргаа барсан, гашуудсан хоолойтоор хослуулан та сонсоно."This is the last time I'll forget you/I wish I could." гэх дахилтын хэсэг дээр энэ бүхэн хурдхан дуусахыг хүсэж байгаа ч яаж ч чадахгүйгээ мэдэж байгаа тэгсэн хэрнээ итгэлээ нэгэнт өгсөн аргаа барсан байдлыг харуулсан болохыг харж болно. Дашрамд Q Magazine бүх цаг үеийн хамгийн шилдэг гитарын дуугаралттай 100 дууны жагсаалтын 46-д оруулж байжээ.
ТАТАХ
--------------------------------------------------------------------------------------------------------------------------------------------------------
2. Coldplay - Amsterdam
Ахиад л Coldplay. Хэрвээ та гунигийн дуунд дургүй дэндүү өөдрөг эсвэл хэт гүн бодолд автуулах дуунд сонирхолгүй хийсвэр сэтгэлгээтэй хүн бол сонсохгүй байж болно. Энэ дуу танд юуг ч санагдуулж, мэдрүүлж болно, нэг л зүйл бол тодорхой - Амстердам бол Колдплэй хамтлагийн гаргаж байсан хамгийн шилдэг дуунуудын нэг.
A Rush of Blood To The Head цомог дэндүү сайн цомог байсан болохоор энэ дуу хит болж чадаагүй гэж би боддог. Арга ч үгүй юм Clocks нь Грэмми хүртэж, The Scientist, Speed of Sounds зэрэг дуунууд нь бүх талаараа төгс байж, Warning Sign, Green Eyes дуунууд нь олон ангит алдартай цувралуудын OST болсон юм. Гэсэн ч Амстердам фенүүдийн дунд хамгийн шилдгүүдийн нэг нь хэвээрээ үлджээ.
Дууны утга нь гарчигтайгаа ямар ч холбоогүй, зүгээр л Амстердамд зохиосон юм гэж Крис Мартин хэлсэн байдаг. Гэхдээ ямар ч байсан Амстердам хот түүнд энэ дууг бичихэд нөлөөлсөн гэдэг нь үгнээс нь харагддаг.

Ямар ч амьдрах итгэлгүй, хүсэл мөрөөдөл, тэмүүлэл-урам зориггүй хүний дуу гэж тодорхойлж болох юм. Ямар ч итгэл найдваргүй түүнд дахиж амьдрах чадвар төдийгүй хүсэл үнэхээр алга. Тэр нэгэнт сэтгэл зүрхээрээ үхсэн ч бие нь амьд хэвээрээ л.
Нөгөө талаар хар тамхичны тухай дуу ч гэж ярьдаг. Хар тамины нийслэл Амстердамын нэрээр нэрлэсэн нь ч ийм учиртай байж болох юм. Хар тамхи хэрэглэх хязгааргүй их хүслээ барьж чадахгүй байж ядан суугаа донтогч эсвэл хар тамхи хэрэглэхээсээ ч залхууран залхаж яваа залуугийн тухай, эсвэл хэтэрхий их хэрэглэн, дэндүү их таашаал мэдэрчихээд одоо тэнгэр нурах гэж байгаа юм шиг мэдэрч байгаа хүний ч тухай байж болох юм.
Дууны зохиогч Крис Мартинаас энэ талаас асуухад тодорхой хариулт өгсөн удаа байхгүй бөгөөд харин хамгийн хурдан зохиогдсон дуу л гэж хариулж байжээ. Амстердам магадгүй Амстердамын тухай өгүүлээгүй байж болох ч Амстердамыг танд мэдрүүлэх болно.
ТАТАХ
ТАТАХ /LIVE/
--------------------------------------------------------------------------------------------------------------------------------------------------------

1. Keane - Hamburg Song
Тиймээ, энэ бол мэдээж KEANE...Энэ дууг, энэ хамтлагийг 1-р байрт оруулахгүй бол алдас болох биз. Магадгүй би R&B-г үзэн яддаг болохоороо Уилл Смитийн Миами, М.Жэйксоны Stranger in Moscow, Kate Perry-ийн Waking Up in Vegas зэргийг оруулаагүй, жазз хөгжим тийм ч сайн мэдэхгүй болохоор Франк Синатрагийн Нью Иорк, Нью Иорк болон АББА, Э.Пресли зэргийн сонгодгуудыг багтаагаагүй, сонголтын зай дэндүү бага болохоор Трэвисийн Нью Амстердам, RHCP, REM, U2-г "жийсэн" байж болох ч миний хувьд ямагт KEANE №1 байх болно.

Just shine a light on my life

Хэдийгээр АНУ-д анх зохиогдсон хэдий ч Хамбург хотод аялан тоглолт хийж байх үеэрээ анх демо хувилбараа тоглосон учраас энэ нэрээр нэрлэсэн гэдэг. Хамгийн анх энэ дууг Тим Райс-Оксли өөрийн эхнэртээ зориулж бичихээр төлөвлөж байсан ч тухайн үед хамтлагт үүсээд байсан хүндрэлтэй асуудлууд болон гоцлол дуучин Том Чаплинтай хамаатай харилцааныхаа талаар бичихээр болсон гэдэг.
Энэхүү дуу нь төгөлдөр хуурын классик болон орган дуугаралтыг бөмбөрийн зөөлөн хэмнэлтэй хослуулсан тун энгийн дуугаралттай дуу юм. Under The Iron Sea цомгоос жинхэнэ сонгодог KEANE-ийг мэдрүүлдэг ер бусын дуу.
Энэ дуу бол насан туршдаа үнэнчээр нөхөрлөснө анд нөхдөөсөө салахвий эсвэл өнгөрсөн сайхан дурсамжаа хэзээ ч эргэж ирэхгүйгээр үүрд хаашаа ч юм нисэн одохвий гэсэн айдсыг илэрхийлсэн дуу юм. Яг л Everybody's Chaning шиг дээр гардаг шиг хүн бүхэн өөрчлөгдөж, Атлантик дээр гардаг шиг хүн хөгшрөх болно. Гэхдээ насан туршдаа нандигнах нөхөрлөл хэзээ ч мөхөхгүй бадамлах галтай байдаг учраас чиний сэтгэлийн орон зайд гүн бат байр сууриа эзлэн оршсоор байдаг юм.
ТАТАХ